جاقسىنىڭ جاعاسىنان المايىق

وسى دۇنيەنى جازۋعا ءبىر ساپتا جۇرگەن ارىپتەسىمنىڭ الەۋمەتتىك جەلىدە جاريالاعان جازباسى سەبەپ بولدى. قالامداس دوسىم ەلگە سىيلى, تانىمال اقىن اعامىزدىڭ جۋرناليسكە بەرگەن سۇحباتىنداعى: «ءيا, كازينوعا باراتىنىم راس. كەيدە وعان ۇتۋعا نەمەسە تىنىعۋ ءۇشىن بارام» دەگەن ءسوزى ءۇشىن ونى تەرىس اتقا مىنگىزىپ, «قازىر پايعامبار جاسىنان اسقان اعالارىمىزدا بۇرىنعى قاريالاردىڭ بويىنداعى قازاقى قاسيەت ازايىپ بارادى» دەگەن سىڭايدا شىمشىپ وتەدى. وسىنى باسقا الەۋمەتتىك جەلى قولدانۋشىلارى ءىلىپ اكەتىپ, ابىرويلى ازاماتتى ءبىراز «جەرگە» اپارىپ تاس­تايدى. ونىڭ ىشىندە عايبات ايتىلعان پىكىرلەر دە بار. جالپى, ادامدى جاقىن ءبىل­مەي سىرتىنان ءسوز ايتۋ ادام­گەرشىلىككە لايىقتى ءمى­نەز ەمەس.
بالا كۇنىمىزدە ءبىز دە قازاقى تاربيەنىڭ قاينارى سانالعان اتا-اجەلەرىمىزدى كورىپ وستىك. ولار قانشا دەگەنمەن كوشپەندى ءداۋىردىڭ شەت جاعاسىن كورگەن, قازاقىلىقتى بەرىك ۇستاعان جاندار بولدى. قازىر زامان, ۋاقىت وزگەردى. ەندى الپىستاعى اعا-اپالارىمىزعا ءدال سولارداي بولمادى دەپ كىنا تاعۋ دا دۇرىس ەمەس. بابالارىمىز «زامانىنا قاراي ادامى» دەگەندى بەكەر ايتپاعان.
كەيىنگى كەزدەرى الەۋمەتتىك جەلىدە وسى ءبىر جاعىمسىز قىلىق ءجيى بايقالادى. ەسىمى ەلگە بەلگىلى ءبىر ازامات ءسال ءسۇرىنىپ كەتسە, بىردەن مۇقاتۋعا نەمەسە ارتىق-اۋىس ايتقان پىكىرى ءۇشىن كەكەتۋگە دايىن تۇرامىز. نەشە ءتۇرلى پوست جازىپ, تابالاپ شىعا كەلەمىز. ونىڭ بۇعان دەيىن ەلگە جاساعان قايىرىمىن, جاقسىلىعىن كورمەيمىز. جۇمىر باستى پەندە بولعاننان كەيىن كەز كەلگەن ادام ومىردە شالىس باسپاي, قاتەلەسپەي تۇرا المايدى. وسىندايدا حالقىمىزدىڭ: «جاپالاق ماقتانسا, جاردان قويان الدىم دەر. جامان ماقتانسا, جاقسىنىڭ جاعاسىنان الدىم دەر» دەگەن ءسوزى ويىمىزعا ورالادى.
جالپى, بۇل ادەت – وتارشىلدىقتان قالعان ەسكى دەرتتەردىڭ ءبىرى. وتىز جىلعا جۋىق ازات ەل بولساق تا بۇدان قۇتىلعان جوقپىز. قايتا ۇدەپ بارا ما دەپ قورقامىن. قازاقتىڭ تالاي يگى جاقسىلارىنان وسىلاي كوز جازىپ قالدىق.
بەلگىلى ءانشى توقتار سە­رىكوۆ ورىندايتىن ءبىر تەرمەدە: «جاقسىلار جاقسىمىن دەپ ايتا المايدى, جاماندار جاقسىمىن دەپ ايقايلايدى. جۇرگەن سوڭ كۇندە ءجۇرىپ باۋىرىندا, تاۋلاردىڭ بيىكتىگى بايقالمايدى» دەگەن ورالىمدى شۋماقتار بار. وسىندا قانشاما ماعىنا, وي جاتىر. سوندىقتان جاقسىنىڭ جاعاسىنان الماي, ونىڭ قادىرىن تىرىسىندە باعالاي بىلەيىك.