جىل باسىنان بەرى نۇر-سۇلتاننان ەكىباستۇز قالاسىنا 103 كوپبالالى وتباسى قونىس اۋدارىپ, 600-دەن استام ادام جاڭا جەردە قونىس تويىن تويلادى. جۇمىسقا قابىلەتتى ەرەسەكتەردىڭ 80 پايىزى جۇمىسپەن قامتاماسىز ەتىلدى.
بۇل ەلىمىزدە كەڭ ءورىس العان «ەڭبەك» باعدارلاماسىنىڭ اياسىندا جۇزەگە استى. قر ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى ەرجان جىلقىباەۆتىڭ ايتۋىنشا, بۇل باعدارلاما بويىنشا سولتۇستىك وڭىرگە 4000 ادام قونىس اۋدارىپ, ونىڭ 65 پايىزى جۇمىسقا ورنالاستى.
ايتا كەتەر بولساق, پاۆلودار وبلىسىندا «Nurly Ertis» جوباسىمەن ەكىباستۇزعا ەلوردادان كوشكەندەردىڭ بالالارىن بالاباقشاعا تەگىن قابىلداپ, مەكتەپ كيىمى مەن قۇرال-جابدىقتارمەن قامتاماسىز ەتتى. مەكتەپ جاسىنداعى 11-سىنىپقا دەيىنگى بالالارعا تەگىن تاماق بەرىلەدى. وتباسىنداعى ەرەسەكتەردىڭ بىرىنە كولىكتىك جول بيلەتتەرى بەرىلىپ, العان پاتەرىن بەس جىلدان كەيىن باستاپقى جارناسىز-اق جەكەشەلەندىرۋ قاراستىرىلعان.
«بۇل باعدارلاما تيىمدىلىگىن كورسەتتى. وسى جىلدىڭ اياعىنا دەيىن نۇر-سۇلتان قالاسىنان تاعى دا 200-دەن استام ادامدى ەكىباستۇز قالاسىنا كوشىرۋ جوسپارلانۋدا» دەدى ەرجان جىلقىباەۆ.
ونىڭ مالىمەتىنشە, بيىل سولتۇستىك قازاقستان وبلىسىنا 428 ءۇيدىڭ قۇرىلىسىنا جۇمسالاتىن 3 ملرد تەڭگە اۋدارىلعان. قونىس اۋدارعان وتباسى مۇشەلەرىنە ءبىر رەتتىك (35 اەك) 88 مىڭ تەڭگە تولەماقى بەرىلەدى.
