كەشە اقوردادا بۇقارالىق اقپارات قۇرالدارى سالاسىندا ۇزدىك دەپ تانىلعان جۋرناليستەرگە ەلباسى نۇرسۇلتان نازارباەۆتىڭ ارنايى سىيلىقتارى مەن گرانتتارىن قر مەملەكەتتىك حاتشىسى ادىلبەك جاقسىبەكوۆ تابىستادى.
مەملەكەتتىك حاتشى ەلىمىزدىڭ بارشا باق وكىلدەرىن كاسىبي مەرەكەلەرى, ياعني بايلانىس جانە اقپارات قىزمەتكەرلەرى كۇنىمەن قۇتتىقتاپ, وتاندىق جۋرناليستيكانىڭ نەگىزگى ماقساتى كۇللى قازاقستاندىقتاردىڭ ءبىر جاعادان باس, ءبىر جەڭنەن قول شىعاراتىنداي ۇيىسا ءبىلۋ كەرەكتىگىن كەڭىنەن ناسيحاتتاۋ ەكەنىن ايتتى.
«قازاقستاندىق باق ءوزىنىڭ قالىپتاسۋ كەزەڭىنەن تابىستى ءوتتى. بىراق قازىرگى زامانعى ءتۇرلى جاعدايلار ولاردىڭ الدىنا سوڭعى الەمدىك ترەندتەردى ەسكەرىپ, ساپالى جاڭارۋ سىندى جاڭا مىندەتتەر قويىپ وتىر. اقپاراتتىق تەحنولوگيالار, ينتەرنەت جانە الەۋمەتتىك جەلىلەر اقپارات جەتكىزۋدىڭ قالىبىن جانە جالپى جۋرناليستيكانىڭ قوعامداعى ءرولىن وزگەرتۋ ۇستىندە. قازاقستاندىق مەديا-كەڭىستىككە سوڭعى جاڭالىقتاردى باقىلاپ قانا قويماي, شىنايىلىق پەن ناقتىلىق سياقتى نەگىزگە سۇيەنىپ, كەڭىنەن ساراپتامالىق تالداۋ جاساۋدىڭ ماڭىزى زور» دەدى ادىلبەك جاقسىبەكوۆ.
مەملەكەت باسشىسىنىڭ سىيلىعى «جاس قازاق» گازەتىنىڭ باس رەداكتورى س.سمايىل مەن «ۆرەميا» گازەتىنىڭ باس رەداكتورى ل.تاراكوۆ سىندى ءوز ءىسىنىڭ شەبەرلەرىنە بەرىلسە, «كتك» تەلەارناسىنىڭ استاناداعى تىلشىلەر قوسىنىنىڭ جەتەكشىسى يا.كراسيەنكو مەن «قازاقستان» ۇلتتىق تەلەارناسىنىڭ ءتىلشىسى ج.تولەمىسوۆاعا پرەزيدەنت گرانتى بۇيىردى. سونىمەن قاتار, نۇرسۇلتان نازارباەۆتىڭ العىس حاتى «ايعاق» تەلەراديو كومپانياسىنىڭ, «قازكونتەنت» اكتسيونەرلىك قوعامىنىڭ, «كورە يلبو» گازەتىنىڭ, «مير» مەملەكەتارالىق كومپانياسىنىڭ قازاقستانداعى ۇلتتىق فيليالىنىڭ شىعارماشىلىق ۇجىمدارىنا تابىستالدى. پرەزيدەنت سىيلىعىنىڭ لاۋرەاتتارى 2 ملن تەڭگە, ال گرانت يەگەرلەرى 1 ملن 700 مىڭ تەڭگە كولەمىندەگى اقشالاي ىنتالاندىرۋعا يە بولادى.
سالتاناتتى ءراسىمنىڭ سوڭىندا مەملەكەتتىك حاتشى باق وكىلدەرىنە شىعارماشىلىق تابىس تىلەپ, جۋرناليستىك شەبەرلىكتى ۇدايى جەتىلدىرە وتىرىپ, ەلدە بولىپ جاتقان وزگەرىستەردى نازاردان تىس قالدىرماۋعا شاقىردى.
