ۋاسيليا تولەۋعازىقىزى, استانا قالاسىنداعى №75 مەكتەپگيمنازيانىڭ قازاق ءتىلى مەن ادەبيەتى ءپانى مۇعالىمى:
بيىلعى وقۋ جىلىنىڭ باسىندا پەداگوگ ماماندارى اتتەستاتسيادان وتكىزۋ تۋرالى – قر بعم ءمينيسترىنىڭ №152 بۇيرىعى جاريالاندى. كۇشىنە ەنىپ, ءبىلىم وشاقتارىنا تارادى. ۇجىممەن بىرگە ەستىدىك, قۋاندىق تا, جۇرەكسىندىك تە. ويتكەنى ەموتسيالىق تۇرعىدا جاقسى دا, جامان دا جاقتارى بولدى. جىل سايىن, ءتىپتى 6 اي سايىن ءبىز نەگە اتتەستاتسيادان وتە بەرۋىمىز كەرەك؟ 5 جىل سايىن ونسىز دا ۇستازدار قاۋىمى بىلىكتىلىگىمىزدى دالەلدەپ ءجۇرمىز عوي. وزىمە بۇل سىناقتىڭ كەزەڭ سايىن وتە بەرەتىنى ۇنامادى. قايتا-قايتا نەگە ءبىلىمىمىزدى دالەلدەيمىز؟! ءبىز نەگە قايتا-قايتا كۇپكىگە توعىتىلعان توقتى قۇساپ ءجۇرۋىمىز كەرەك؟ بىرنەشە ارىپتەستەرىممەن بىرگە وسىنى قولدامادىق. ءوزىم اتتەستاتسيادان وتۋگە ءوتىنىش جازبادىم. ويتكەنى ءبىرىنشى تاپسىرعان ارىپتەستەرىمنىڭ كوبى سىناق تاپسىرا المادى. ال ءبىلىمىن دالەلدەگەندەر بوركىن اسپانعا اتا قۋاندى.
تيىمسىزدىگىن ايتسام, مەنىڭ جۇمىس تاجىريبەم جەتكىلىكتى. وسى ۋاقىتقا دەيىن عىلىمي ماقالا جازدىم, سىنىپ الدىم, ءارتۇرلى كۋرس وقىدىم. سوسىن بىلىكتىلىك سەرتيفيكاتىمدى بەس جىل سايىن جاڭارتىپ تۇردىم. ءسويتىپ جۇرگەن ادامعا, مىناۋ 6 اي سايىنعى پارمەن جۇيكەگە سالماق. ارينە, ول ەرىكتى تۇردە. بىراق, ارىپتەسىڭنىڭ اقشاسى كوبەيىپ جاتقانىن كورەسىڭ, سوسىن تىپىرشيسىڭ. دايىندالاسىڭ, شارشايسىڭ. وتسەڭ, تاعى مەيلى. بىلتىردان بەرى وقۋشىلارمەن قانشاما تاماشا جۇمىس اتقاردىم. اراسىندا ۇبت-عا دايىندايمىز. سويتە تۇرا, بىلىك-بىلىگىمدى تايعا تاڭبا باسقانداي بولسا دا, جۇمىسىممەن قوسا نەگە جۇكتەمەگە سالۋىم قاجەت؟
ءتيىمدى جاعى دا بار عوي… ماسەلەن, ءبىلىمىڭىزدى دالەلدەسەڭىز, جالاقىعا 30, 35, 40, 45 پايىز كولەمىندە ۇستەماقى قوسىلۋى مۇمكىن… بىراق سول ايلىعىمىز دا تومەندەۋ بولىپ تۇر عوي قازىرگى ۋاقىتتا. وسى كۇزدە ءوزىمدى-ءوزىم سىناپ كورگىم كەلگەن, دايىندىعىم پىسىق تالمادى. ەندى كورەرمىز ءبىر جاعىنان رەتى كەلگەندە…
كەلە-كەلە سىناق پەن قاعازباستىلىقتان بالالارعا ساباق بەرۋگە ۋاقىت قالماي ما دەپ قورقامىن.
