استانادا تمد-عا قاتىسۋشى ەلدەردىڭ شىعارماشىلىق جانە عىلىمي زيالى قاۋىمنىڭ ءحىىى فورۋمى ءوتتى. قازاقستاننىڭ ەلورداسى – اتالمىش فورۋمدى ءۇشىنشى رەت قابىلداعان تمد كەڭىستىگىندەگى جالعىز قالا. القالى جيىنعا بۇل جولى دوستاستىق ەلدەرىنەن 200-گە جۋىق دەلەگات جينالدى. فورۋمدى مەملەكەتتىك حاتشى گۇلشارا ابدىقالىقوۆا اشىپ, قازاقستان پرەزيدەنتى نۇرسۇلتان نازارباەۆتىڭ قاتىسۋشىلارعا قۇتتىقتاۋىن وقىپ بەردى.
گۇلشارا ابدىقالىقوۆا بيىل كۇي اتاسى – قۇرمانعازىنىڭ 200 جىلدىعى, قازاق ادەبيەتىنىڭ جارىق جۇلدىزى ماعجان جۇماباەۆتىڭ جانە كەڭەس وداعىنىڭ باتىرى يۆان پانفيلوۆتىڭ 125 جىلدىعى قازاقستاندا عانا ەمەس, تمد كەڭىستىگىندە اتاپ وتىلەتىنىن, بۇل فورۋم مادەنيەتتەردىڭ دامۋىنا, مەملەكەتتەردىڭ جاقىنداسۋىنا ۇلكەن ۇلەس قوساتىنىن ايتىپ, تمد ەلدەرىنىڭ گۋمانيتارلىق سالاداعى بىرلەسكەن جۇمىستارىنا ارنالعان كورمەنى ارالادى.
تمد-عا قاتىسۋشى ەلدەردىڭ حالىقارالىق گۋمانيتارلىق ىنتىماقتاستىق قورى باسقارماسىنىڭ تەڭ توراعاسى, رف پرەزيدەنتىنىڭ حالىقارالىق مادەني ىنتىماقتاستىق جونىندەگى ارنايى وكىلى ميحايل شۆىدكوي رەسەي باسشىسى ۆلاديمير ءپۋتيننىڭ قۇتتىقتاۋىن جەتكىزدى. حالىقارالىق گۋمانيتارلىق ىنتىماقتاستىق قورى باسقارماسىنىڭ توراعاسى, رەسەي فەدەراتسياسىنداعى ازەربايجان رەسپۋبليكاسىنىڭ توتەنشە جانە وكىلەتتى ەلشىسى پولاد بيۋلبيۋل وگلى قازاقستانعا كەلگەلى وسى جەردىڭ جىلىلىعىن, جەرگىلىكتى حالىقتىڭ ىستىق قۇشاعىن سەزىنگەنىن ايتىپ, فورۋم ماقساتىنا توقتالدى.
قر مادەنيەت جانە سپورت ءمينيسترى ارىستانبەك مۇحامەديۇلى «تمد-داعى ديالوگ – ءححى عاسىرداعى گۋمانيتارلىق ىنتىماقتاستىقتىڭ كەلەشەگى» تاقىرىبىمەن ءوتىپ وتىرعان بۇل فورۋم استانانىڭ 20 جىلدىعىمەن تۇسپا-تۇس كەلىپ وتىرعانىن اتاپ ءوتىپ, بىلتىر «ەكسپو-2017» حالىقارالىق مامانداندىرىلعان كورمەسى اياسىندا دوستاستىق ەلدەرىنىڭ ەلوردادا وتكىزگەن شارالارىنا توقتالدى.
سۇندەت بايعوجين, ديماش قۇدايبەرگەن, ماريا مۋدرياك سىندى دارىندى انشىلەرىمىزدىڭ داڭقى تمد كەڭىستىگىنەن اسقانىن ايتتى. «استانا وپەرا» جانە «استانا بالەت» تەاترلارىنىڭ وزىق ونەرىن كورشىلەس ەلدەر مويىنداعانىن جەتكىزدى. قازاقستان مەن رەسەي بىرىگىپ تۇسىرگەن «28 پانفيلوۆشى» ءفيلمى 2016 جىلى رەسەيدىڭ ۇزدىك ءفيلمى بولىپ تانىلعانىن ايتتى. بيىل قوس ەل استانانىڭ مەرەيتويىنا ارناپ, ەلوردانىڭ قالىپتاسۋى تۋرالى سىر شەرتەتىن 6 سەريالى «ماحاببات. ءۇمىت. استانا» جانە ۇلى وتان سوعىسى جىلدارى الماتىعا كوشىرىلگەن ماسكەۋلىك ەكى كينوستۋديا جايلى «ەۆاكۋاتسيا» اتالاتىن فيلمدەردى ءتۇسىرىپ جاتقانىن ايتتى. قازاقستان-رەسەي كينورەجيسسەرى ۆلاديمير دۆورتسەۆويدىڭ «ايكا» فيلمىنە تۇسكەن قازاق اكتريساسى سامال ەسلاموۆانىڭ كاننداعى تابىسىن ەسكە الدى.
استانادا جىل سايىن وتەتىن «ەۋرازيا» كينوفەستيۆالىنەن تمد ەلدەرى قالمايتىنىن ايتقان مينيستر وتكەن اپتادا ازەربايجان تىلىندە جارىق كورىپ, باكۋدە تۇساۋى كەسىلگەن ماحمۇت قاسىمبەكتىڭ «نۇرسۇلتان نازارباەۆ. ءومىربايان» كىتابىن وقىرماندار جىلى قابىلداعانىن جەتكىزدى. «رۋحاني جاڭعىرۋ» باعدارلاماسىنىڭ اياسىندا اتقارىلىپ وتىرعان جۇمىستاردى قىسقاشا تانىستىرىپ ءوتتى. سونىڭ ىشىندە «بيبيسي» تەلەارناسى ەلىمىز جايلى تۇسىرگەن فيلمدەرگە, مۋزەيلەردىڭ بىرىككەن جوباسىنا توقتالدى. جيىرمادان استام ەلدە قازاقستاننىڭ مادەنيەت جانە ادەبيەت ورتالىقتارى اشىلعانىن تىلگە تيەك ەتتى. بۇكىل ەل بويىنشا استانانىڭ 20 جىلدىعىنا ارنالعان 1800-دەن اسا شارا وتەتىنىن, مادەنيەت جانە سپورت مينيسترلىگى 100 جوبا دايىنداعانىن ايتتى.
فورۋم تاقىرىپتارىنىڭ ءبىرى قازاقستان ەلورداسىنىڭ 20 جىلدىعىنا جانە استانانىڭ مادەنيەت ينستيتۋتتارىنىڭ قالىپتاسۋى مەن دامۋىنىڭ تاجىريبەسىنە ارنالدى. استانامەن قۇرداس, وسىدان 20 جىل بۇرىن ەلوردادا اشىلعان قازاق ۇلتتىق ونەر ۋنيۆەرسيتەتىنىڭ رەكتورى, قازاقستاننىڭ ەڭبەك ەرى ايمان مۇساقوجاەۆا «دوستاستىق جۇلدىزدارى» مەملەكەتارالىق سىيلىعىنىڭ لاۋرەاتى اتاندى.
امانعالي قالجانوۆ
