فەيسبۋكتە «قاينار ولجايدىڭ ساباقتارى» توبى اشىلىپ, العاشقى جازبالارى تۇسكەندە, ەسىمىزگە مۇقاعالي ماقاتاەۆتىڭ ءابدىلدا تاجىباەۆقا ارنالعان ولەڭى ءتۇستى. بىراق بۇل جەردە قايناردىڭ قولىندا اسا ەمەس, قالام. ال بىلايشا «اشۋلى گروزنىي پاتشادايىن» ءابدىلدا «جىرداعى جالعاندىقپەن مىلتىقتاسسا», قاينار گازەت, سايت ماقالاسىنداعى نەمەسە تەلەجۋرناليستەردىڭ ماتىنىندەگى قاتەلەرمەن كۇرەسەدى.
«لەنينشىل جاس» گازەتىندە كوررەكتورلىقتان باستادىق. سوندىقتان قاتە اتاۋلىعا جانىمىز قاس» دەيدى بۇل تۋرالى بەلگىلى ءجۋرناليستىڭ ءوزى. مۇقاعالي جامان جىر جازاتىن بولسا, ءابدىلدا اعاسىنىڭ اق تاياعى ارقاسىندا ويناي ما دەپ قاۋىپتەنسە, ءبىز قازىر ماقالادا قاتە جىبەرىپ قوياتىن بولساق, قايناردىڭ قالامىنان قورقاتىن بولدىق.
…اعا دەگەن ءۇش ارىپكە جەتىپپىز,
اقىل دەگەن ءتورت ءارىپتى ايتا الماي, – دەپ تۇيىندەيدى «ءارىپ پەن ۇعىم» اتالاتىن اتاقتى ولەڭىن اقىن دوسىمىز رۋسلان نۇرباي. اعالىق جاسقا جەتكەن قايناردىڭ قالامىنان قورىقساق تا, ءوز باسىمىز مۇنى اقىل رەتىندە ۇعامىز. ماسەلەن, توبىنداعى «رەداكتسيالاۋدىڭ اشىق ساباعى», «اۋدارماعا اباي بولايىق», «گازەتتى قالاي شىعارۋ كەرەك؟» سياقتى جازبالار كىم-كىمگە بولسىن پايدالى. ال جۋرناليستەرگە تىپتەن كەرەك كەڭەستەر.
ەڭبەك جولىن قوي باعۋدان باستادى (بىرنەشە جىل بۇرىن سول تۋرالى «قوي باققان قيىن» اتتى كىتاپ شىعاردى). قاينار ولجايعا ودان وي باققان جەڭىل ءتيدى مە دەپ ويلايمىز كەيدە. اۋىلىنان الماتىعا عاشىقتىق دەرتى الىپ كەلگەن. «ارمان بولعان قىزدى كورگەندە ءبىر جارىم جىلعى سەزىمگە سۋىق سۋ قۇيىلعانىن سەزدىك. ەندى ءبىر ءتىرى اقىندى كورىپ اۋىلعا قايتپاق ەدىك. تۇمانباي اعامىزعا سالەم بەرىپ, الدىندا تۇرىپ وننان استام ولەڭىن جاتقا وقىعان سوڭ, قولىمىزدان جەتەكتەپ جۋرفاكتىڭ دەكانى قوجاكەەۆكە اپارعان. «ءبىر بالانى وقۋعا الساڭ, مىنانى ال. ءوزى تۇرماق اتاسىن تانىمايمىن. وسى قارا بالادان كەرەمەت جۋرناليست شىعادى» دەگەن. الايدا ءبىزدى وقۋعا العان سوڭعى ءسوزدى قوجاكەەۆ ەمەس, رەكتور جولداسبەكوۆ ايتتى. سودان باستاپ ءاربىر ماقالامىزدى تۇمانباي اعا وقيتىنداي كۇيدە وتىرىپ جازىپ كەلەمىز. ماڭگىلىك موتيۆاتسيا!» دەپ ەسكە الادى سول كەزەڭدى ءوزى.
بۇل جەردە جىرعا عاشىقتىعى كومەكتەسكەن. ولەڭدى جازۋعا كەلگەندە ءوزى دە قارا جاياۋ ەمەس. بەلگىلى جۋرناليست, عالىم باۋىرجان ومارۇلى «كەڭ ءورىس» اتتى ەسسەسىندە قايناردىڭ اتاسى ولجاي اقساقال كۋرسك تۇبىندەگى شايقاستا ءبىر قولىن قالدىرىپ, ەلگە جارالانىپ قايتقانىن, اۋرۋحانادا ەسىن جيعان سوڭ ءبىر قولى جوق ەكەنىن كورىپ, ەكىنشى قولىمەن اۋىلعا ولەڭمەن حات جازعانىن, كەيىپكەرىمىزدىڭ اكەسى قالياقپاردىڭ ءىنىسى قوڭىرعازى ءبىراۋىز ولەڭ شىعارعانىن, اجەسى حانىميا كونە زاماننان جەتكەن ولەڭ-جىرلاردى كوپ بىلگەن كىسى بولعانىن جازادى. وسىعان قاراپ قاينار ولجايعا اقىندىق قانمەن كەلگەنىن پايىمدايمىز. الايدا ولەڭدەرىن جاريالامايدى. ءبىر وتىرىستا جىرىن ءوز اۋزىنان ەستىگەن ەدىك. «كوپىر» دەپ اتالاتىن سول ولەڭىن ۇناتىپ, فەيسبۋكتە جاريالاۋدى سۇرادىق. باقساق, بۇل ولەڭ جەتپىسىنشى جىلدار سوڭىندا قازاق راديوسى ارقىلى وقىلعان ەكەن. جاستار پوەزياسى تۋرالى حاباردى جۇرگىزۋشى امانحان ءالىم ماقتاعان. سەمەيدە وبلىستىق گازەتتە پراكتيكادا جۇرگەندە مەرعالي يبراەۆ اعاسىنىڭ الدىندا وقىپ, جاقسى ءسوز ەستىگەن.
ماقالالارىندا دا اقىنداردىڭ ولەڭ شۋماقتارى ءجيى كەزدەسەدى. ماتەريالدارى ءبىزدى سونىسىمەن دە تارتادى. تاقىرىپ قويۋعا دا شەبەر. ءوزى ايتپاقشى, «سۋرەتتى قيمىلداتقان كينونىڭ ءبىزدىڭ ەلدەگى اتاسى امەن حايداروۆ» تۋرالى جازعان العاشقى ماقالالارىنىڭ ءبىرى «قيىن ونەردى قۇلاعىنان باستاعان» دەپ اتالسا, ءارى قاراي «شىراق سوڭىنداعى سۇراق» دەپ عارىشقا سامعايدى. ءبىزدىڭ ماقالامىزعا دا جاقسى تاقىرىپ قويىپ بەرگەنى بار. اقىن ءداۋىتالى ستامبەكوۆتىڭ تۋعانىنا 70 تولۋىنا وراي جازعانىمىزعا «ارقادا تۋىپ, الاتاۋدا تۇلەدى» دەگەن تاقىرىپ قويعانبىز. گازەتكە سول تاقىرىپپەن شىعىپ كەتكەن. سونى وقىعان قاينار اعا «جۇمىر جەردەگى جانە ءبىر بۇيراباس» دەپ قويىلسا ءجون بولاتىنىن ايتتى. ەندى كىتاپ شىعاراتىن بولساق, سول ماقالانى اعانىڭ قويعان تاقىرىبىمەن ەنگىزەمىز دەپ جوسپارلاپ وتىرمىز.
سەيداحمەت بەردىقۇلوۆ, شەرحان مۇرتازا سىندى مايتالمان قالامگەرلەردىڭ مەكتەبىنەن وتكەنى باعى دەپ ويلايمىز. «بوزاڭنان ىزدەيدى كوز بەردىقۇلوۆتى», «مۇز داۋىرىنەن مۇرتازا داۋىرىنە دەيىن» دەگەن ەسسەلەردى جازىپ, ۇستازدارىنىڭ الدىندا پارىزىن ورىندادى.
جالپى, قاينار ولجايدىڭ قالامى كەز كەلگەن تاقىرىپتا جورعالاي كەتەدى. كەزىندە, مىسالى, كىردى قالاي جۋ كەرەكتىگى تۋرالى «ءدارىسىن» فەيسبۋكتەن وقىپ, مۇنى دا جازۋعا بولادى ەكەن دەپ تاڭعالعانبىز. ۇستازىمىز تالعات باتىرحان گازەتىمىزدە جۇرگەندە «قيالي دۇنيە نەگە جازبايسىڭدار؟» دەۋشى ەدى, ال قايناردىڭ قالامىنان شىققان قيالي دۇنيەلەر كوپ. سوعان دا سۇيسىنەمىز.
وكىنىشتىسى, قاينار ولجايدىڭ بىردە-ءبىر كىتابى قولىمىزعا تۇسپەدى. ماقالالارىن الەۋمەتتىك جەلىدەن نەمەسە گازەتتەردەن عانا وقيمىز. سوندىقتان شىعارماشىلىعىن تولىق تانيمىز دەپ ايتا المايمىز. كەزىندە قاينار اقمىلتىق جۋرناليست جۇماتاي سابىرجانۇلىنا «جۇكە, وقىرماندارىڭىزدىڭ ەڭ ناشارى مەن بولايىن» دەگەن تىلەك ايتقان ەدى. شىن مانىندە ولاي ەمەستىگىن بىلەتىن ارىپتەسى سوعان قاتتى ريزا بولعان. ءبىز قازىر وسى ءسوزدى سىزگە, قاينەكە, قايتالاپ ايتۋعا ءماجبۇرمىز. وعان كەلىسەسىز بە, كەلىسپەيسىز بە, ءوزىڭىز بىلەسىز. كاسىبي مەرەكەمىزبەن قاتار كەلگەن مەرەيتويىڭىز قۇتتى بولسىن!
