پۋتين-ترامپ: كەزدەسۋ ورنى بەلگىلى
رەسەي پرەزيدەنتى ۆلاديمير پۋتين مەن اقش پرەزيدەنتى دونالد ترامپتىڭ ءبىرىنشى تولىق فورماتتى كەزدەسۋى وتەتىن جەر مەن ۋاقىتى بەلگىلەندى.
كەشە بەلگىلى بولعانىنداي, ەكى الىپ ەل باسشىلارىنىڭ ءسامميتى حەلسينكيدە 16 شىلدە كۇنى وتەدى. بۇعان دەيىن ولار ءبىر-بىرىمەن ءارتۇرلى شارالار بارىسىندا كەزدەسىپ كەلدى. ءبىر جىل بۇرىن, 2017 جىلعى قاراشادا, ۆەتنامدا وتكەن سامميتتە قىسقاشا سويلەسىپ ۇلگەردى. دەگەنمەن ەكىجاقتى كەزدەسۋدىڭ جەكە فورماتى ءبىرازدان بەرى ويلاستىرىلىپ ءجۇر ەدى.
اق ءۇي مەن كرەمل بۇل كەزدەسۋدى ءىس جۇزىندە ەكىجاقتى كەلىسسوزدى باستاپ بەرەتىن قادام بولادى دەپ ەسەپتەپ وتىر. الايدا ماسكەۋ الدا تۇرعان سامميتتە حالىقارالىق وزەكتى ماسەلەلەر تالقىلانادى دەسە, ۆاشينگتون قاۋىپسىزدىك ماسەلەلەرى العا تارتىلاتىنىن ايتىپ وتىر.
ەكى ليدەردىڭ كەزدەسۋى قارساڭىندا اقش پرەزيدەنتىنىڭ ۇلتتىق قاۋىپسىزدىك جونىندەگى كەڭەسشىسى دجون بولتون رەسەيگە كەلىپ, ۆلاديمير پۋتينمەن, سىرتقى ىستەر ءمينيسترى سەرگەي لاۆروۆپەن, رەسەي ۇلتتىق قاۋىپسىزدىگى كەڭەسىنىڭ مۇشەلەرىمەن كەزدەسىپ كەتتى.
ەكى پرەزيدەنت كەزدەسۋىنىڭ تولىق مازمۇنى الداعى ەكى اپتانىڭ ىشىندە انىقتالادى.
رەسەيگە قارسى سانكتسيا قانداي؟
بۇل ماسەلەنى اقش پەن ءۇندىستان قورعانىس جانە سىرتقى ساياسي ۆەدومستۆو باسشىلارى الدا وتەتىن كەزدەسۋدە تالقىلايتىن بولادى.
جيىن «2+2» فورماتىندا وتەدى. وندا رەسەيگە قارسى سانكتسيالاردىڭ قانداي دەڭگەيدە بولاتىنى جانە نيۋ-دەليدىڭ رەسەيدەن س-400 «تريۋمف» زەنيتتى راكەتالارىن ساتىپ الۋى جايى قارالادى. اقش-تىڭ بۇۇ جانىنداعى تۇراقتى وكىلى نيككي حەيلي وسىلاي دەدى.
«2+2 فورماتى ديالوگىنىڭ ءوزى وسىنداي سەبەپتەرمەن قۇرىلعان, وندا وسىنداي ماسەلەلەر تالداناتىن بولادى» دەدى ول NDTV تەلەارناسىنا بەرگەن سۇحباتىندا. ونىڭ ايتۋىنشا, ۆاشينگتون «ءۇندىستان مەن رەسەيدىڭ ۇزاق ۋاقىتقا سوزىلعان ءوزارا قارىم-قاتىناسى بار ەكەنىن مويىندايدى». «الايدا قۇراما شتاتتار ءوزىنىڭ وزەكتى ماسەلە ساناعان نارسەلەرىنە كوزقاراسىن بىلدىرۋگە ءتيىس… رەسەيمەن ارادا بولعان كوپتەگەن وقيعالار كونگرەستىڭ وعان قارسى سانكتسيا جاساۋ جونىندە شەشىم قابىلداۋىنا اپارىپ جەتكىزدى» دەدى وكىل.
ماۋسىم ايىنىڭ باسىندا ءۇندىستان قورعانىس ءمينيسترى نيرمالا سيتحارامان حانىم رەسەيدەن زر س-400 راكەتالارىن ساتىپ الۋ جونىندەگى كەلىسسوزدىڭ شەشۋشى كەزەڭگە قادام باسقانىن مالىمدەگەن بولاتىن.
تۇركيا سيرياعا كومەككە شاقىردى
تۇركيا رەسەي مەن يراندى سيريانىڭ وڭتۇستىك-باتىسىنداعى جاعدايعا ارالاسۋدى شاقىردى.
انكارا سيريا ۇكىمەتى اسكەرلەرىنىڭ دەراا جانە كۋنەيتەرا اۋداندارىندا جاساپ جاتقان شابۋىلدارىن توقتاتۋعا كومەكتەسۋدى سۇرايدى. استانا ۇدەرىسىندە سيرياداعى احۋالدىڭ كەپىلى بولعان ەلدەر ەندى بۇل ماسەلەگە دە ارالاسۋلارى كەرەك.
جۇما كۇنى تاراتىلعان مالىمدەمەدە اتالعان اۋدانداردا تۇراتىن ونداعان ادامنىڭ جازىقسىز قازاعا ۇشىراپ جاتقانى ايتىلادى. «ءبىز بۇل وقيعانى ۇلكەن الاڭداۋشىلىقپەن, دابىلمەن قابىلداپ, ادامشىلىقتان ادا بۇل شابۋىلداردى باتىل ايىپتاپ وتىرمىز» دەلىنگەن مالىمدەمەدە.
