ۇلتتىق مۋزەيدە «وتكەندى ەسكە الۋ – بولاشاققا جول» جوباسى اياسىندا شىعىس قازاقستان مەن الماتى وبلىستارى مۇراجايلارىنىڭ كوشپەلى كورمەسى اشىلدى.
باس قالاعا كوش تارتىپ كەلگەن ەكى ءوڭىردىڭ كورمەسى ەرەكشە كوز تارتادى. اسىرەسە, «جيدەباي-ءبورىلى» مەملەكەتتىك قورىق-مۇراجايىنىڭ جادىگەرلەرىن قىزىقتاي بەرگىڭىز كەلەدى. بۇل كورمە «ۇلى تۇلعالار ۇندەستىگى» دەپ اتالادى. مۇندا حاكىم اتامىزدىڭ ءومىرى مەن شىعارماشىلىعىنا ارنالعان تىڭ دەرەكتەر كوپشىلىكتىڭ نازارىن اۋداردى. ابايدىڭ اينالاسى ونەر مەن ادەبيەتتىڭ قازانداي قايناپ جاتقان ورتاسى بولعانىن بىلەمىز. سول جايىندا ءبىراز دۇنيەلەرگە قانىق بولدىق. اقىن 1885 جىلى سەمەيدەگى ولكەتانۋ مۋزەيىنە تاپسىرعان زاتتاردى كوزىمىز شالدى. ونىڭ ىشىنەن شىنىاياق, قاپ, سىبىزعى جانە شاكىرتى الماعامبەتتىڭ ءۇش شەكتى دومبىراسى بار. بۇدان بولەك, اتامىزدىڭ قولى تيگەن اراب گرافيكاسىمەن, تۇرىك تىلىندە جازىلعان كىتاپتار قويىلعان. سونداي-اق, ابايدىڭ ءوزى جازدىرتىپ وقىعان «ءتارىجمان» گازەتىنىڭ ەكى سانىنىڭ تۇپتەمەسىن كوردىك. بيىل ويشىل اقىن شاكارىم قۇدايبەردىۇلىنىڭ تۋعانىنا 160 جىل تولىپ وتىر. سوعان وراي, كورنەكتى تۇلعاعا ارنالعان جىلجىمالى كورمە ازىرلەنگەن. بۇل بۇعان دەيىن الماتىدا, وڭتۇستىك وڭىردە جۇرتشىلىققا ۇسىنىلعان ەكەن. قورىتا ايتقاندا, شىعىستان كەلگەن كورمەدە اباي مەن شاكارىمنىڭ سان قىرلى الەمىن اشاتىن ەكسپوناتتارعا كوڭىلىمىز تولدى.
حالقىمىز «جەر ءجانناتى – جەتىسۋ» دەپ بەكەر ايتپاعان. تابيعاتى عانا سۇلۋ ەمەس, تاعىلىمدى تاريحقا دا باي ولكەدەن كەلگەن كورمە «جەتىسۋدىڭ 20 مۇراجايى» دەپ ايتىلادى. مۋزەي قىزمەتكەرلەرى باس شاھارعا 350 جادىگەر الىپ كەلگەن. ولاردىڭ اراسىندا ەلباسىنىڭ, شوقان ءۋاليحانوۆتىڭ, ءسۇيىنباي ارونۇلىنىڭ, جامبىل جاباەۆتىڭ, ءىلياس جانسۇگىروۆتىڭ, مۇقان تولەباەۆتىڭ, دىنمۇحامەد قوناەۆتىڭ, مۇقاعالي ماقاتاەۆتىڭ جانە تاعى باسقا دا اڭىزعا اينالعان ارداقتىلاردىڭ ءومىرى مەن قىزمەتىنە بايلانىستى بىرەگەي ەكسپوناتتار قويىلعان. قىسقاسى, «مىڭ ەستىگەننەن ءبىر كورگەن ارتىق» دەمەكشى, كورمەنى بارىپ كورسەڭىز, كوپ دۇنيەدەن وي تۇيەسىز. ال كورمە 8 شىلدەگە دەيىن جالعاسادى.
