قايىرىمدىلىق كورسەتتى
– ءبىزدىڭ ۇيىمنىڭ نەگىزگى ماقساتى – اۋعانستان سوعىسىندا قازا بولعان استانالىق جاۋىنگەر-ينتەرناتسيوناليستەردىڭ اتا-انالارىنا, سونداي-اق وسى سوعىستىڭ سالدارىنان مۇگەدەك بولىپ قالعان مايدانداس ازاماتتارعا الەۋمەتتىك قولداۋ كورسەتۋ بولىپ سانالادى. وسى رەتتە دەمەۋشىلەردىڭ كومەگى ارقىلى ماتەريالدىق جاردەم بەرۋدى داستۇرگە اينالدىرىپ وتىرمىز. مىنە, وسى جولى دا «ينتەرگاز-تسەنترالنايا ازيا» اق ءبىزدىڭ ۇيىمنىڭ وتىنىشىنە ءمان بەرىپ, قاراجات ءبولدى. سول قاراجاتتى اتا-انالاردى شاقىرىپ, ۇلەستىردىك, – دەيدى «اۋعانستان سوعىسى مۇگەدەكتەرى مەن ارداگەرلەرى وداعى» قوعامدىق بىرلەستىگىنىڭ توراعاسى مۇراتبەك ءامىرجانوۆ.
وسى شارا بارىسىندا 13 اتا-انا 100 مىڭ تەڭگەدەن قايىرىمدىلىق كومەك الدى. سوعىس دالاسىندا ەرلىكپەن قازا تاپقان بالالارىنىڭ ورنىن جوقتاتپاي, جىل بويى ءتۇرلى شارالارعا شاقىرىپ, رۋحاني ءارى ماتەريالدىق قولداۋ كورسەتىپ جۇرگەن ۇيىم باسشىلىعىنا اتا-انالار العىستارىن جەتكىزدى. شارا سوڭى داستارحان باسىندا جالعاسىپ, ەستەلىك اڭگىمە ايتۋعا ۇلاستى.
عالىم قوجابەكوۆ