تاۋەلسىزدىكتىڭ 25 جىلدىعىن تويلاۋ قارساڭىندا ەلوردادا ءوتىپ جاتقان «استانا – مەيىرىمدى قالا» قايىرىمدىلىق اكتسياسىنان قالالىق ءماسليحاتتىڭ دەپۋتاتى, «الكون+» جشس-ءنىڭ ديرەكتورى امان ايۋپوۆ تا تىس قالماي, شاھارداعى مۇمكىندىگى شەكتەۋلى, از قامتىلعان تۇرعىندارعا جانە قاريالارعا كومەك كورسەتتى.
دەپۋتات باستاعان ءبىر توپ ازامات الدىمەن كوزى ناشار كورەتىن قارت ەرلى-زايىپتىنىڭ شاڭىراعىنا باس سۇقتى. وگلاديندەر وتباسى تۇراتىن پاتەردىڭ تەرەزەلەرىن جاڭا پلاستيكالىق تەرەزەلەرگە اۋىستىرىپ بەردى. ءۇيدىڭ وتاعاسى پەتر وگلادين جاسىنىڭ ەگدە تارتقانىنا, كورۋ قابىلەتىنىڭ تومەندىگىنە قاراماستان, «ۆسترەچا» دۇكەنىنىڭ ماڭىندا نان ساتادى. ال جارى ليۋدميلا بولسا ءۇي شارۋاسىنداعى ادام.
بۇل تۇرعىنداردىڭ ءبارى №17 سايلاۋ وكرۋگىنىڭ دەپۋتاتى امان ايۋپوۆتىڭ قوعامدىق قابىلداۋ بارىسىندا تالاپ-تىلەكتەرىن جەتكىزگەن ەدى. سول وتىنىشتەر بويىنشا ميىنىڭ دامۋىندا اۋىتقۋ بار 8 جاسار بالا مەن ارباعا تاڭىلعان قارت تۇراتىن ۇيلەردىڭ كىرەبەرىستەرىنە پاندۋستار ورناتىلدى. سونداي-اق, تىل ارداگەرى, مۇگەدەك ا.بەسقاراەۆانىڭ ۇيىنە كىرىپ-شىعۋى ءۇشىن شاعىن ليفت ءتارىزدى ارنايى كوتەرگىش قۇرال جاسالدى.
– ءبىز ءاردايىم اۋدانداعى تۇرعىنداردىڭ جاعدايىنان حاباردار بولىپ وتىرامىز. رەتى كەلسە, ناقتى ىستەرمەن كومەك قولىن سوزۋعا تىرىسامىز. ەلوردادا باستالعان «استانا – مەيىرىمدى قالا» ناۋقانى كەزىندە وسى ايماقتىڭ جۇرتتىڭ ءبىرازىنا سىي-سياپات جاسادىق. سونىڭ ىشىندە 1-توپ مۇگەدەگى اناتولي سەنچيليۋعا سەرۋەندەۋگە ارنالعان قولاربا جانە تۋعاننان سال اۋرۋىمەن اۋىرعان يۆان بۋرەتسكە ۆەلوترەناجەر تارتۋ ەتتىك. ول ەكەۋى دە مۇمكىندىگىنە قاراماستان, شارۋامەن اينالىسادى. ءبىرى اعاش ويۋدى جانە كادەسىي جاساۋدى كاسىپ قىلسا, ەكىنشىسى كولىك جۇرگىزىپ, جاسى ەگدە تارتقان شەشەسىنە قولعابىس بولىپ ءجۇر, – دەدى امان ايۋپوۆ.
سونىمەن قاتار, وگرۋگتىڭ ارداگەرلەرىنە ەستۋ اپپاراتتارى ۇلەستىرىلدى. وسىنداي سىيلىققا يە بولعان اقساقال شورتانباي حامزين بەلسەندى ازاماتتارعا العىسىن جاۋدىرىپ, ىستەرىنە بەرەكە تىلەدى.
ورىنبەك وتەمۇرات
