قالالىق ءماسليحاتتىڭ تۇراقتى كوميسسياسى وتىرىسىندا «استانا باس جوسپارى عىلىمي-زەرتتەۋ ينستيتۋتى» جشس ديرەكتورىنىڭ ورىنباسارى ا.پيروجكوۆ قالا قۇرىلىسى رەگلامەنتىن بەكىتۋ تۋرالى جەرگىلىكتى سايلانبالى ورگان شەشىمىنە وزگەرتۋلەر مەن تولىقتىرۋلار ەنگىزۋ تۋرالى ۇسىنىستى جەتكىزدى.
قالا اۋماعىنىڭ 20 پايىزىن كوشەلەر الىپ جاتىر. بارلىق الەمدە كوشەلەر اۋدانداردى ءبىر-بىرىنە جالعاپ تۇرۋ قىزمەتىن اتقارادى. ءسويتىپ كوشەلەردىڭ كەلبەتى قالا قۇرىلىمىنداعى بارلىق ەلەمەنتتەردىڭ ىشىندە باستى قوعامدىق كەڭىستىكتەردى قۇرايدى.
بايانداماشىنىڭ ايتۋىنشا, قازىرگى زامانعى قالا سالۋ ستاندارتىندا كوشە قوزعالىسى مەن اباتتاندىرۋ اۋماقتارى ءبىرىزدى ستاندارتتارعا سۇيەنىپ جوبالانادى. اباتتاندىرۋ ەلەمەنتتەرى مەن كوشە كەڭىستىگىن ستاندارتتاۋ تالاپتارى قالا اۋماعىنىڭ جانە كوشە-جول تورابىنىڭ جىكتەلۋىنە سايكەس قالىپتاستىرىلۋى كەرەك.
بىراق قالا سالۋ كەزىندە جوعارىدا ايتىلعان تالاپتار تولىق ساقتالماعان. كولىك پەن جاياۋ جۇرگىنشىلەرگە ارنالعان قوزعالىس باعىتتارى ايقىن بولىنبەگەن. كەيبىر نىسانداردىڭ ءساتسىز ورنالاسۋى سالدارىنان تروتۋارلاردىڭ كەي تۇستارى تىم جىڭىشكەرىپ كەتكەن, ول جاياۋ ادامداردىڭ ءجۇرىپ-تۇرۋىنا قولايسىزدىق كەلتىرەدى, ءتىپتى ومىرلەرىنە قاۋىپ ءتوندىرۋى دە مۇمكىن. سونداي-اق اۆتوسۇيگىشتەر كولىكتەرىن تروتۋارلارعا ىشكەرلەي قويىپ كەتەتىنى تاعى بار, بۇل دا جاياۋ قوزعالىسقا كەدەرگى كەلتىرەدى.
– قالاداعى كەيبىر عيماراتتار مەن قۇرىلىستاردىڭ قاسبەتتەرى توزعان. كىشى ساۋلەت نىساندارى, ديزاين ەلەمەنتتەرى جەتكىلىكسىز. ولاردىڭ ستيلدەرىندە بىركەلكىلىك جوق. قايسىبىر نىساندار كاسىبي تۇرعىدان قولاپايسىز ورىندالعان, – دەدى ا.پيروجكوۆ.
شەتەلدىڭ تاجىريبەسىنە سۇيەنسەك, كوشەلەردى جوبالاعاندا كەلەسىدەي جايتتار ەسكەرىلۋى ءتيىس: قوزعالىس بولىگى, جاياۋ جۇرگىنشىلەرگە ارنالعان تروتۋار, ۆەلوسيپەد سوقپاقتارى, كولىك ايالدامالارى, كوشە جيھازدارى, ناۆيگاتسيا ەلەمەنتتەرى, جاياۋ جۇرگىنشىلەرگە ارنالعان وتپەلەر, كوشەلەردىڭ اباتتاندىرۋلارى, كوشە جانە ساۋلەت نىساندارىنىڭ جارىقتاندىرۋلارى, جاسىل جەلەكتەر, كوشە كەڭىستىگىن اباتتاندىرۋ كەزىندەگى لاندشافت ديزايندارى. بايانداماشى وزدەرى ۇسىنىپ وتىرعان جوبادا وسى تالاپتاردىڭ بارلىعى ەسكەرىلگەنىن جەتكىزدى.
