مەملەكەت باسشىسى قۇقىقتىق ءتارتىپ ورگاندارى باسشىلارىمەن كەزدەسۋ بارىسىندا ەلدە زاڭدىلىقتى ساقتاۋدى, ازاماتتاردىڭ قۇقىقتىق ساناسى مەن قۇقىقتىق مادەنيەتىن كوتەرۋدى قامتاماسىز ەتۋدى تاپسىردى. سونىمەن قاتار «زاڭدىلىق جانە ءتارتىپ» قاعيداسى قازاقستاندىق قوعامنىڭ يدەولوگيالىق, ساياسي جولسىلتەمەسى بولۋى ءتيىس دەپ اتاپ كورسەتتى.
وسى رەتتە قۇقىق بۇزۋشىلىققا «نولدىك توزىمدىلىك» قاعيداسىن نىعايتۋ, كوشەلەر مەن باسقا قوعامدىق ورىنداردا ءتيىستى قوعامدىق ءتارتىپتى ساقتاۋ ماقساتىندا بيىل 20-30 قاراشادا رەسپۋبليكا اۋماعىندا «قۇقىقتىق ءتارتىپ» جەدەل-پروفيلاكتيكالىق الدىن الۋ ءىس-شاراسى وتۋدە. وعان جەرگىلىكتى اتقارۋشى ورگاندار, Amanat پارتياسىنىڭ وڭىرلىك فيليالدارى, ۇەۇ-دار, جاستار قوزعالىستارى, باق وكىلدەرى, بلوگەرلەر, قوعامدىق پىكىر كوشباسشىلارى, ۆولونتەرلەر مەن قۇقىق قورعاۋ باعىتىنداعى قوعامدىق قۇرىلىم مۇشەلەرى قاتىسۋدا.
ءىس-شارا اياسىندا استانادا سونداي كەزەكتى رەيدتىڭ ءوتۋ بارىسىنا كۋا بولدىق. سارىارقا اۋدانى اكىمدىگى, اۋداندىق پروكۋراتۋرا, اۋداننىڭ پروباتسيا قىزمەتى, ۆولونتەرلەر, قوعامدىق كومەكشىلەر, بلوگەرلەر, پاترۋلدىك پوليتسيا, پوليتسيا باسقارماسى باسشىلىعى, ۋچاسكەلىك پوليتسەيلەر «ساپارجاي» اۆتوۆوكزالى اۋماعىنا جينالىپ, رەيدتى باستادى.
سارىارقا اۋدانى اكىمدىگى اپپاراتىنىڭ باس مامانى دامير ءحيسماتۋلليننىڭ ايتۋىنشا, وسى الدىن الۋ ءىس-شاراسى باستالعالى بەرى 4 كۇندە 500-دەن استام اكىمشىلىك قۇقىق بۇزۋشىلىق فاكتىسى تىركەلىپتى. ونىڭ ىشىندە ۆانداليزم بويىنشا 5 فاكت, ۇساق بۇزاقىلىق بويىنشا 4 فاكت انىقتالعان.
رەيدكە قاتىسۋشىلار الدىمەن گەتە-ءبىرجان سال كوشەلەرىنىڭ ماڭايىندا ۆانداليزم, قايىر تىلەۋ, جەڭگەتايلىق, ىشىمدىك ءىشۋ, قوعامدىق ورىنداردا تەمەكى شەگۋ, بوتەن بىرەۋدىڭ مۇلكىن قاساقانا ءبۇلدىرۋ, ەلگە ورتاق ورىنداردى لاستاۋ سىندى قۇقىق بۇزۋشىلىق فاكتىلەرى بويىنشا پروفيلاكتيكالىق جۇمىستار جۇرگىزدى. ودان ءارى اتالعان توپ قاراساي باتىر كوشەسىمەن بويلاي ەل ىشىندە «ارمان» شاعىن اۋدانى اتالاتىن قالا بولىگىنە بارىپ, ينتەرنەت-الاياقتىقتان ساقتانۋ, وتباسى-تۇرمىس قاتىناسىنىڭ بۇزىلۋى, تىنىشتىقتى بۇزۋ, قوعامدىق مۇلىكتى ءبۇلدىرۋ بويىنشا قۇقىق بۇزۋشىلىقتارعا وراي پروفيلاكتيكالىق جۇمىستار وتكىزدى. رەيدكە قاتىسۋشىلار بارعان ءۇشىنشى نىسان رەسپۋبليكا داڭعىلى بويىنداعى «ستامبۋل» كافەسى مەن «جىگەر» قوناقۇيى بولدى. سەبەبى وسى عيماراتتاردا دا توبەلەس, بۇزاقىلىق, ۇساق قۇقىق بۇزۋشىلىق ءجيى بولاتىنى تۋرالى شاعىم كوپ تۇسەدى. جۇما كۇنگى رەيدتىڭ سوڭعى نىسانى ەسىل وزەنىنىڭ جاعالاۋى بولدى, ەلدى تارتىپكە شاقىرۋشىلار ارباتتان باستاپ وزەن جاعالاي ءجۇرىپ, حالىققا ءتۇسىندىرۋ جۇمىسىن جۇرگىزدى. تۋرا وسىنداي رەيدتەر استانا قالاسىنىڭ وزگە اۋداندارىندا دا ءوتىپ جاتىر.
