بۇگىن ەلوردادا قازاقستان حالقى اسسامبلەياسى استانا قالالىق فيليالىنىڭ XVII سەسسياسى وتەدى. بيىلعى جيىن ەلباسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى حالقىمىزعا ارناعان جولداۋىن تالقىلاۋعا ارنالعان. اتالمىش شاراعا قالا باسشىسى باقىت سۇلتانوۆ جانە ءماسليحات دەپۋتاتتارى, باسقارما باسشىلارى, ۇكىمەتتىك ەمەس ۇيىمدار مەن ەتنومادەني بىرلەستىكتەر وكىلدەرى قاتىسادى دەپ كۇتىلۋدە.
قازاقستان حالقى اسسامبلەياسى العاشقى قۇرىلعان كۇننەن باستاپ, بارلىق ەتنوس وكىلدەرىن ورتاق ماقساتقا ۇيىستىرىپ, ەل دامۋىنا ايتارلىقتاي ۇلەس قوسىپ كەلەدى. بۇگىندە باس شاھاردا 22 ەتنومادەني بىرلەستىك تىركەلگەن. كەيبىر بىرلەستىكتەردە جاستار قاناتى جۇمىس ىستەيدى. اسسامبلەيانىڭ قالالىق فيليالى ولارمەن تىعىز بايلانىس جاساپ, ءتۇرلى مادەني شارالاردى بىرلەسىپ وتكىزىپ ءجۇر. اسىرەسە, ەلوردانىڭ 20 جىلدىق مەرەيتويىنا وراي كوپتەگەن شارالارۇيىمداستىرىلدى.
«مەملەكەت باسشىسىنىڭ ۇستىمىزدەگى جىلدىڭ 5-ءشى قازان كۇنى جاريالانعان قازاقستان حالقىنا ارناعان جولداۋىندا ەلىمىزدىڭ ورنىقتى ودان ءارى دامۋىنا بايلانىستى پاراساتتى ويلار ايتىلعان. ادامداردىڭ تابىسى مەن تۇرمىس ساپاسىن ارتتىرۋعا قاتىستى ناقتى مىندەتتەر قويىلدى. اسىرەسە, ءبىلىم جانە دەنساۋلىق سالاسىن جاقسارتۋعا باسىمدىق بەرىلدى. ساپالى ءارى قولجەتىمدى تۇرعىن ءۇي ماسەلەسى دە كوتەرىلدى. وسى كەلەلى ماسەلەلەردىڭ ءبارى – بۇگىن وتەتىن سەسسيادا كەڭىرەك قوزعالادى» دەدى استانا قالالىق قازاقستان حالقى اسسامبلەياسى حاتشىلىعىنىڭ مەڭگەرۋشىسى ءلاززات قۇسايىنوۆا.
