بۇدان بىلاي قالا تۇرعىندارى مەن قوناقتارى قالالىق اۆتوبۋس سالوندارىندا ءموبيلدى ينتەرنەتتى تولىق پايدالانا الادى. وسىعان بايلانىستى كەشە قوعامدىق كولىكتى ينتەرنەتپەن جابدىقتاۋ جونىندەگى «Wi-Fi Bus Astana» رەسمي تانىستىرىلىمى ءوتتى دەپ حابارلايدى قالا اكىمىنىڭ ءباسپاسوز قىزمەتى.
جوبا اياسىندا بۇگىندە 400 قوعامدىق كولىكتە «WiFi» جەلىسى ىسكە قوسىلدى. شىلدەنىڭ سوڭىنا دەيىن ەلوردانىڭ بارلىق اۆتوبۋس پاركىن ينتەرنەتپەن قامتۋ جوسپارلانعان.
– استانا كۇنى قارساڭىندا قالا اكىمدىگىنىڭ تاپسىرماسىمەن «Wi-Fi Bus» جوباسىن ىسكە قوسامىز. ەلباسى استانانى الەمنىڭ 50 اقىلدى قالاسىنىڭ قاتارىنا ەنگىزۋ جونىندە تاپسىرما بەردى, وسىعان بايلانىستى اقىلدى قالا ءبىرىنشى كەزەكتە قالا تۇرعىندارى مەن قوناقتارىنا قولايلى جاعداي جاساۋدا. بۇگىنگى تاڭدا حالىقتىڭ زاماناۋي ءومىر ءسۇرۋ ءۇردىسى كەز كەلگەن جەردە جوعارى جىلدامدىقتى ءموبيلدى ينتەرنەتتى قاجەت ەتەدى. وسىنى ەسكەرە وتىرىپ, قالا اكىمدىگى جۇيەلى تۇردە قالانىڭ قوعامدىق ورىندارىندا ينەرنەتتىڭ قولجەتىمدىلىگىن قامتاماسىز ەتۋ شارالارىن قولعا الدى, – دەدى «استانا Innovations» اق باسقارما توراعاسى ءالتايىر ۋىزباەۆ.
جوبانى استانا اكىمدىگىنىڭ قولداۋىمەن «Beeline قازاقستان» كومپانياسى جۇزەگە اسىرىپ وتىر. جوبا سەرىكتەستەرى – «استانا Innovations» اق يننوۆاتسيالىق دامۋ وپەراتورى جانە «استانا LRT» جشس ەلوردانىڭ كولىك ينفراقۇرىلىمىن دامىتۋ وپەراتورى.
اتالعان جوبا ەلوردادا «اقىلدى قالا» تۇجىرىمداماسىن ەنگىزۋدىڭ تاعى ءبىر كەزەڭى بولىپ تابىلادى. «استانا LRT» باسقارما توراعاسى تالعات ارداننىڭ ايتۋىنشا, «WiFi Bus» جوباسى استانادا ەلوردانىڭ كولىك جۇيەسىن كەشەندى تۇردە جاڭعىرتۋ اياسىندا جۇزەگە اسىرىلۋدا.
– قالا اكىمدىگى مەن ءبىرىنشى كەزەكتە جولاۋشىلار كولىگى جانە اۆتوموبيل جولدارى باسقارماسى بىرىگىپ قوزعالىس قۇرامىن جاڭارتۋ جونىندە جوسپارلى جۇمىستار جۇرگىزەدى, ياعني, پايدالانۋ تالاپتارىنا ساي كەلمەيتىن ەسكى اۆتوبۋستار قولدانىستان شىعارىلىپ, ينفراقۇرىلىم جاڭارتىلادى, – دەدى تالعات اردان.
«Wi-Fi Bus» جوباسى 2013 جىلى قولعا الىنعان ەدى. سودان بەرى ەلىمىزدىڭ قوستاناي, كوكشەتاۋ, قاراعاندى, قىزىلوردا, پەتروپاۆل, تۇركىستان, ورال جانە الماتى سياقتى سەگىز قالاسىندا ەكى جۇزگە جۋىق اۆتوبۋس Wi-Fi جەلىسىمەن قامتىلدى.
