بىرنەشە الەۋمەتتىك جانە ينفراقۇرىلىم نىساندارىن ارالاپ كورگەن قالا اكىمى ناقتى تاپسىرمالار بەردى. ەڭ الدىمەن شاھار باسشىسى شالكودە, 2/1 كوشەسىندەگى «پرومىشلەننىي» تۇرعىن الابىنا ات باسىن بۇردى.
اسەت يسەكەشەۆ ءتۇرلى ءتيىستى باسقارمالارعا جانە دە «استانا اكك» اق-نا گۇلزاردىڭ اينالمالى الاڭىن كەڭەيتۋ قۇرىلىسىنىڭ جوسپارىن جاساۋدى تاپسىردى. سونداي-اق, جىلى ايالداما, «1000 ورىن» باعدارلاماسى بويىنشا پاۆيلون, گۇلزار سالۋ ءۇشىن شالكودە كوشەسىنىڭ وڭ جاعى مەن شارباقتى كوشەسىنىڭ قيىلىسىنداعى جەر ۋچاسكەلەرىن قايتارىپ الۋدى قاراستىرۋ كەرەكتىگىن ايتتى.
اۋدان اكىمىنە جەرگىلىكتى تۇرعىنداردان كەلىپ تۇسكەن وتىنىشتەر بويىنشا كوپفۋنكتسيونالدى بالالار الاڭى تانىستىرىلدى. اكىم وسى رەتتە اۋدانداعى ۇيلەردىڭ الدىن كوركەيتۋ كەرەكتىگىن دە ەسكە سالا كەتتى.
ءارى قاراي ارالاۋ قوبىلاندى باتىر مەن بۋراباي كوشەسىنىڭ قيىلىسىنداعى جول سالىنۋى ءتيىس جەردە جالعاسىن تاپتى. اكىم بۇل جۇمىستاردى اياقتاۋدى جاۋاپتى تۇلعالارعا تابىستادى. بۇدان كەيىن كۇيشى دينا مەن ابىلاي حان كوشەلەرىنىڭ قيىلىسىنا كەلىپ, جول قۇرىلىسىن اياقتاۋدا بارلىق شارانى قولدانۋ قاجەتتىگىن پىسىقتادى. اكىم پۋشكين كوشەسىندەگى «سوتسيۋم» تۇرعىن ءۇي كەشەنىندەگى كوشەنى دە جوندەۋ كەرەكتىگىن تاپسىردى. وسى ورايدا, الماتى اۋدانى اكىمى قۇرىلىستى جۇزەگە اسىرۋ ءۇشىن جاقىن ارادا ءوزىنىڭ جوسپارىن ۇسىنۋى ءتيىس.
بۇدان سوڭ الاش تاسجولىنداعى قالالىق بازارلاردىڭ جاۋاپتى تۇلعالارى مەن باسشىلارىنا ساۋدا ورىندارىن تارتىپكە, رەتكە كەلتىرۋىن تاپسىردى ءارى ول جەرلەرگە جاياۋ جۇرگىنشىلەر ءۇشىن جول بەلگىسىن ورناتىپ, اۆتوتۇراق سالۋدى تاپسىرىپ, ونى قالاي ورىندالعانى جونىندە ەسەپتى كۇتەتىنىن ايتتى.
قىسقاسى, اكىم بەرگەن بارلىق تاپسىرما استانا قالاسىنىڭ سىرتقى كەلبەتىن جاقسارتۋعا, ەلورداعا كەلگەن قوناقتار مەن تۇرعىندارىنىڭ قاۋىپسىزدىگى مەن جايلىلىعى ءۇشىن جاسالىنىپ جاتىر.
«اقشام-اقپارات»
