نۇر-سۇلتان قالاسىندا العاش رەت قالالىق دامۋ اكسەلەراتورى ىسكە قوسىلدى.
بۇل – 100 كۇن ىشىندە جۇيەلى جانە ستراتەگيالىق ماسەلەلەر شەشىمدەرىن ىزدەۋ جانە ىسكە اسىرۋ اياسىندا اكىم مەن ورىنباسارلارىنىڭ جەتەكشىلىگىمەن اكىمدىك قىزمەتكەرلەرى, سىرتقى ساراپشىلار, بەلسەندى تۇرعىندار ءوزارا جۇمىس جاسايتىن ورتاق الاڭ.
قالالىق اكسەلەراتور اياسىندا شەشىلۋى ءتيىس ەلورداداعى 8 تۇيتكىل جوسپارعا الىندى. ولار: اشىق قۇدىقتار, قاڭعىباس ءۇي جانۋارلارى, قوعامدىق كولىك, دەنساۋلىق ساقتاۋ ماسەلەلەرى, سۋ باسۋدىڭ الدىن الۋ, قاردى نەمەسە قاتقان مۇزدى تازالاۋ, كوشە جارىعى جانە پيك قىزمەتى.
قالا بيلىگى تۇرعىنداردى 8 تۇيتكىلدىڭ ءتۇيىنىن تارقاتۋ ءۇشىن وزدەرىنىڭ ۇسىنىستارى مەن يدەيالارىن ايتۋعا, بۇل تۇرعىدا بەلسەندىلىك تانىتۋعا, قالالىق اكسەلەراتوردىڭ جۇمىس جيىندارىنا قاتىسۋعا شاقىرادى.
«استانالىق اكسەلەراتوردىڭ ءبىرىنشى جيىنى 27 مامىر كۇنى وتەدى. ەلوردانىڭ جاقسارۋىنا ءوز ۇلەسىڭىزدى قوسقىڭىز كەلسە, accelerator@ikomekastana.kz ەلەكتروندى مەكەنجايىنا ءتۇيىندەمەڭىزدى جانە جۇمىس توبىنا قوسۋ تۋرالى ىلەسپە حاتىڭىزدى جولداۋىڭىز قاجەت. سول سياقتى + 7 771 103 30 33 نومىرىنە دە حابارلاسۋعا بولادى» دەيدى «iKomek109» مونيتورينگ جانە جەدەل ارەكەت ەتۋ ورتالىعى ماماندارى.
سونداي-اق جىل باسىندا بەلسەندى تۇرعىندارعا قالانى جاقسارتۋعا اتسالىسۋعا مۇمكىندىك بەرەتىن سارىارقا اۋدانى اكىمدىگىنىڭ «بيۋدجەت پروتسەسىنە قاتىسۋ» قاناتقاقتى جوباسى دا ىسكە قوسىلعان بولاتىن.
«جوبالار بەرۋدە بەلسەندىلىك تانىتقان بارلىق تۇرعىندارعا العىس بىلدىرەمىز. «بيۋدجەت پروتسەسىنە قاتىسۋ» ءبىزدىڭ تۇرعىندارعا اۋداندى دامىتۋعا جانە قالالىقتاردىڭ تۇرمىس ساپاسىن جاقسارتۋ ءۇشىن ءوز باستامالارىن ۇسىنۋعا مۇمكىندىك بەردى» دەيدى سارىارقا اۋدانى اكىمدىگىنىڭ ماماندارى.
جوبانىڭ ءبىرىنشى كەزەڭىندە 22 جوبا ىرىكتەلىپ الىنسا, ەكىنشى كەزەڭدە تۇرعىندار 15 جوبانى داۋىس بەرۋ ارقىلى تاڭداعان. ال ءۇشىنشى كەزەڭدە اۋدان اكىمدىگىنىڭ ساراپتامالىق كەڭەسى ودان ءارى ىسكە اسىرىلاتىن جوبالاردى ءۇش كۇن ىشىندە ىرىكتەپ الادى.
