ەلىمىزدىڭ ەكى ءوڭىرى – استانا قالاسى مەن الماتى وبلىسىندا تۇرمىستىق قاتتى قالدىقتاردى وڭدەۋ بويىنشا پيلوتتىق جوبا ىسكە قوسىلدى. ءتيىستى مەموراندۋمعا ەلوردا اكىمى اسەت يسەكەشەۆ جانە الماتى وبلىسىنىڭ اكىمى اماندىق باتالوۆ قول قويدى.
ەكسپو قالاشىعىندا وتكەن كەزدەسۋدىڭ باستى ماقساتى – الەمدەگى ەڭ وزىق تەحنولوگيالاردى قولدانا وتىرىپ, قالدىقتاردى ءتيىمدى باسقاراتىن ايماقتىق يننوۆاتسيالىق جۇيەنى قۇرۋ. «وپەراتور روپ» كومپانياسىمەن بىرىگىپ جاسالاتىن باعدارلامانىڭ ەڭ وزەكتى ماسەلەسى – تۇرمىستىق قالدىقتاردى شىعاراتىن كولىكتىڭ قوزعالىسىن باقىلايتىن اقپاراتتىق جۇيەنىڭ ەنگىزىلۋىندە.
– ەكسپو كورمەسى – قالانىڭ دامۋىنا سەپتىگىن تيگىزەتىن الدىڭعى قاتارلى تەحنولوگيالاردى ەنگىزۋ ءۇشىن تاپتىرماس مۇمكىندىك. ەلباسى ارقاشان ەكولوگيا ماسەلەسىن دە, قالدىقتاردى ءتيىمدى ءارى قاۋىپسىز وڭدەۋدى دە ءجىتى باقىلاۋدا ۇستايدى. سوندىقتان قالا اكىمدىگى ەلورداداعى قالدىقتاردى باسقارۋ جۇيەسىن جەتىلدىرۋدى قولعا الىپ جاتىر. بۇل قالدىقتاردى سۇرىپتاۋدان باستاپ, ولاردى يننوۆاتسيالىق تەحنولوگيالار نەگىزىندە وڭدەۋگە دەيىن قاداعالايتىن باعدارلاما, – دەدى القالى جيىندا ءسوز العان استانا قالاسىنىڭ اكىمى اسەت يسەكەشەۆ.
قالا باسشىسىنىڭ ايتۋىنشا, بۇگىنگى تاڭدا قالدىقتاردى باسقارۋ جۇيەسى الەمدە جوعارى قارقىنمەن دامىپ كەلەدى. «بۇل تاقىرىپقا قاتىستى ەكسپو اياسىندا ون شاقتى كەزدەسۋ ۇيىمداستىردىق. فينليانديا, گەرمانيا, يتاليا سىندى ەلدەردىڭ وسى سالاداعى تاجىريبەسىمەن تانىسىپ, ادىستەرىن زەرتتەپ جاتىرمىز» دەدى ول.
– استانادا قابىلدانعان باعدارلاماعا قالدىقتاردى جيناۋ, تاسىمالداۋ, وڭدەۋ جانە پوليگونعا كومۋ كىرەدى. قالا اۋماعى 24 ايماققا ءبولىنىپ, اربىرەۋىندە 10 مىڭنان استام قوقىس جاشىگى ورناتىلدى. كۇن سايىن مىڭداعان توننا تۇرمىستىق قاتتى قالدىقتى شىعارۋ ءۇشىن 70 ارنايى تەحنيكا جۇمىلدىرىلادى.
اسەت يسەكەشەۆ باعدارلاما ەكى كەزەڭدە جۇزەگە اساتىنىن جەتكىزدى. ءبىرىنشى كەزەڭ وسى جىلى قالدىقتاردى وڭدەۋ كەشەندەرىن قوسىمشا تەحنولوگيالاردىڭ كومەگىمەن جاڭارتۋعا ارنالسا, ەكىنشى كەزەڭدە 2019 جىلعا قاراي ورگانيكالىق قالدىقتاردى اشىتۋ مەن قوقىس گازىن قايتا وڭدەۋ ارقىلى قايتا وڭدەۋ تەرەڭدىگىن 75 پايىزعا دەيىن كوبەيتۋ كوزدەلگەن.
گۇلدانا تالعاتقىزى
