استانادا تۇرمىستىق قالدىقتاردى سۇرىپتاپ تاستاۋ جوباسى ماۋسىم ايىنىڭ سوڭىندا جۇزەگە اسىرىلا باستاعان بولاتىن. ناتيجەسىندە تۇرعىن ۇيلەردىڭ اۋلالارىنا سارى جانە جاسىل ءتۇستى كونتەينەرلەر ورناتىلۋدا.
جوبا بويىنشا سارى كونتەينەرگە قاعاز, پلاستيك, اينەك سياقتى قۇرعاق زاتتار تاستالسا, جاسىل كونتەينەرگە دىمقىل تارتاتىن ورگانيكالىق قالدىقتار سالىنادى. قاناتقاقتى جوبانىڭ ناتيجەسىندە قايتا وڭدەۋ زاۋىتىندا تۇرمىستىق قالدىقتىڭ 45 پايىزىن پايداعا جاراتۋ كوزدەلۋدە. ال بۇعان دەيىن قالدىقتىڭ تەك 10 پايىزى عانا وڭدەۋگە جارامدى بولىپ كەلگەن.
سارى كونتەينەرلەردەگى قالدىقتاردى «Clean City NC» جشس كومپانياسىنا تيەسىلى 25 Iveco ماركالى ارنايى جۇك كولىكتەرى «KazRecycleService» جشس-كە تاسىمالدايدى. وندا قالدىقتار قوسىمشا سۇرىپتالىپ, شيكىزات دايىندالىپ, ودان وتاندىق كاسىپورىندار شەلەك, قار تازالاۋعا ارنالعان كۇرەك سياقتى تۇرمىستىق زاتتار جاساپ شىعارادى.
«وكم وپەراتورى» جشس ماماندارىنىڭ مالىمەتىنشە, شىلدە ايىندا ەلوردادان 265,38 توننا قالدىق قالا سىرتىنا شىعارىلىپتى. ونىڭ 45 پايىزى قاعاز بولسا, 28 پايىزى – پلاستيك, 17 پايىزى – اينەك, 10 پايىزى جالپى قالدىق كورىنەدى.
«تۇرعىنداردىڭ باسىم كوپشىلىگى قوقىس جاشىگىنە قاعاز بەن پلاستيكتى كوپ تاستايدى ەكەن. ال قالدىقتى سۇرىپتاپ تاستاۋ جاعىنان ازىرگە ەسىل اۋدانىنىڭ تۇرعىندارى بەلسەندىلىك تانىتۋدا. ويتكەنى بۇل جوبا ەڭ العاش رەت وسى اۋداندا جۇزەگە اسىرىلىپ, تۇرعىندارعا ءتۇسىندىرۋ جۇمىستارى ءجيى جۇرگىزىلگەن بولاتىن. جوبانى جۇزەگە اسىرۋداعى العاشقى ايدىڭ ناتيجەسى جامان ەمەس. استانالىقتار سۇرىپتاپ تاستاۋعا قولداۋ ءبىلدىرىپ جاتىر. دەگەنمەن بۇل تۋرالى ناسيحات جۇمىستارىن ءالى دە جالعاستىرۋ كەرەك» دەيدى «وكم وپەراتورى» جشس ماماندارى.
قازىرگى تاڭدا استانادا 404 جاڭا كونتەينەر ورناتىلعان. ونىڭ 128-ءى ەسىل اۋدانىنىڭ ەنشىسىندە بولسا, بايقوڭىر اۋدانىندا – 75, سارىارقا اۋدانىندا 201 كونتەينەر قويىلعان. ال الماتى اۋدانىنا مۇنداي كونتەينەرلەر 7 تامىزدان باستاپ ورناتىلماق. جالپى, جىل سوڭىنا دەيىن قالا بويىنشا 6 مىڭنان اسا جاڭا كونتەينەر قويىلاتىن بولادى. وسى باعاتقا 1,72 ملرد تەڭگە قارجى ءبولىنىپتى.
