بىردە اقتاڭگەر اقىن عافۋ قايىربەكوۆتى ەل جاقتان ءبىر ءىنىسى ىزدەپ كەلەدى. ءوزى بىلدەي ءبىر سوۆحوزدىڭ دوكەي باسشىسى ەكەن. اقىن اعامىز ءىنىسىن ەرتىپ مەيرامحاناعا بارادى. سول جەرگە اۋىلدان كەلگەن دامنەن اۋىز ءتيسىن دەپ جاقىن سىيلاسىپ جۇرگەن اعا-ىنىلەرىن شاقىرادى. ولاردىڭ اراسىندا سىرباي ماۋلەنوۆ, اقسەلەۋ سەيدىمبەك سەكىلدى بەلگىلى قالامگەرلەر بار. قىزىق بولعاندا, ەلدەن كەلگەن ديرەكتور داستارقانداس بولىپ وتىرعان ازاماتتاردىڭ ەش بىرەۋىن تانىمايدى. ومىرىندە كىتاپ بەتىن اشپاعان, ادەبيەت پەن مادەنيەتتەن ساڭىلاۋى جوق جان بولسا كەرەك.
وسىعان ەپتەپ قىسىلىپ قالعان عافەكەڭ ءسوزدى ءوزى الىپ, جينالعاندارعا ونى تانىستىرادى. – مىناۋ – مەنىڭ اۋىلدان كەلگەن باۋىرىم. ءوزى ءتاۋىر جىگىت. داۋلەتتى, مىرزا ازامات. سوسىن بۇل تازا ادام. تازا بولعاندا دا مولدىرەپ تۇرعان سۋداي تاپ-تازا, – دەيدى سىر بىلدىرمەي.
سودان كەيىن اقسەلەۋ اعاعا: – سەندەر مادەنيەت, ادەبيەت, ۇلتتىڭ تاريحى, حالىقتىڭ شەجىرەسى, قازاقتىڭ سالت-ءداستۇرى, تاعى وسىنداي بىردەڭەلەردى ايتىپ باس قاتىرىپ جۇرسىڭدەر. ال مەنىڭ ءىنىمنىڭ وندايمەن ءىسى جوق. تازا ادام. سەندەر ايتقان دۇنيەگە پىسقىرمايدى. بۇعان ءوزى باسقارىپ وتىرعان كەڭشاردىڭ شارۋاسى وڭ بولسا, بالا-شاعاسى امان بولسا, ءتورت قۇبىلاسى تۇگەل. قالعان نارسەگە جان اۋىرتپايدى. تازا ازامات بولعاننان كەيىن سويتەدى, – دەپ ءسوزىن جاندىرا تۇسەدى. وتىرعاندار اقىننىڭ استارلاپ ايتقان اششى مىسقىلىنا ءماز بولادى. تۇيسىگى جوق جىگىتتىڭ ءوزى عافەكەڭە ريزاشىلىعىن بىلدىرەدى.
بۇل وقيعا وتكەن عاسىردىڭ توقسانىنشى جىلدارى بولعان. ودان بەرى دە ءبىراز ۋاقىت ءوتتى. قازىر قوعامدا وسىنداي ەشتەڭەمەن شارۋاسى جوق «تازا» جىگىتتەردىڭ قاتارى كوبەيدى. ءتىپتى سولاردىڭ قۇمالاعى ءجۇرىپ تۇر دەسە دە بولادى. ويتكەنى ولاردىڭ دەنى بيلىك باسىندا وتىر. عافۋ اتامىز سونى قالاي بىلگەن. اقىن اۋليە دەگەن وسى شىعار…
ازامات ەسەنجول
