«ۇيالى بايلانىس قىزمەتىن تۇتىنۋشىلار 2018 جىلدىڭ سوڭىنا دەيىن ءوز قۇرىلعىسىن تىركەۋدەن وتكىزۋگە مىندەتتى. ويتكەنى 2019 جىلدىڭ 1 قاڭتارىنان باستاپ تىركەلمەگەن ابونەنتتەرگە قىزمەت كورسەتىلمەيدى» دەپ مالىمدەدى اقپارات جانە كوممۋنيكاتسيالار ءمينيسترى داۋرەن اباەۆ حالىققا ەسەپ بەرۋى كەزدەسۋىندە.
ارينە, مۇنداي كەزدە حالىقتىڭ دۇرلىگەتىنى بەلگىلى. مينيستر ونى بولدىرماس ءۇشىن تىركەۋ شاراسىن جەڭىلدەتىپ, ونلاين تارتىبىندە جۇرگىزۋ كەرەكتىگىن جەتكىزدى. ايتارلىعى, اقپارات جانە كوممۋنيكاتسيالار مينيسترلىگى تىركەۋ شارالارىن بيىل شىلدە ايىندا باستاماق. «بۇل شارانى شىلدە ايىندا باستايمىز. ءىس جۇزىندە بارلىق ماسەلە پىسىقتالدى. سىزدەرگە سمس-حابارلاما كەلەدى. ابونەنتتەر سونى راستاۋى قاجەت. ەگەر قانداي دا ءبىر تۇسىنبەۋشىلىك تۋىنداسا, جاقىن جەردەگى وپەراتوردىڭ قىزمەتىنە جۇگىنەسىزدەر» دەپ ءتۇسىندىردى د.اباەۆ.
دەمەك, شىلدە ايىنان باستاپ ءاربىر ۇيالى تەلەفوننىڭ IMEI-كودى ونى ساتىپ العان ادامنىڭ جەكە سايكەستەندىرۋ ءنومىرى (جسن) مەن ابونەنتتىڭ نومىرىنە جالعانادى. 2016 جىلى ۇيالى تەلەفونداردى تىركەۋدىڭ جاڭا ەرەجەلەرى ەنگىزىلگەنى ءمالىم. ول ەرەجەلەر ۇيالى تەلەفوندار ۇرلىعىن ايتارلىقتاي ازايتادى دەپ بولجانعان. ويتكەنى تەلەفونى ۇرلانعان ادام پوليتسياعا ارىز بەرگەننەن كەيىن, ىشكى ىستەر ورگاندارى تەلەفوندى بۇعاتتاپ تاستاي الاتىن-دى. الايدا داۋرەن اباەۆ جالعىز IMEI-كودتى تىركەۋ ماسەلەنى شەشپەيتىنىن اشىق ايتتى. «جاڭا نورما تولىق كۇشىمەن جۇمىس ىستەۋى ءۇشىن ءار قۇرىلعىنىڭ IMEI-كودىن جسن-گە جانە ابونەنتتىڭ نومىرىنە جالعاۋ قاجەت. بۇل جەردە ءبىز IMEI-كودتاردى جاساۋدا ۇلىبريتانيا, تۇركيا, ازەربايجان, ۋكراينا سياقتى مەملەكەتتەردىڭ تاجىريبەسىن ەسكەردىك» دەدى مينيستر.
