قانات وكسىكباەۆ, Jوو.kz جوباسىنىڭ اۆتورى: تالاپكەرلەردىڭ تەگىن ءبىلىم الۋىنا كومەكتەسەمىز
كوكتەم كەلە سالىسىمەن مەكتەپ بىتىرۋشىلەر بولاشاق ماماندىقتارى مەن وقۋ ورىندارى جايلى جان-جاقتان اقپارات ىزدەپ, قامدانا باستايتىنى بەلگىلى. الايدا مۇنداي مالىمەتتەردىڭ ءبارىن ءبىر جەردەن تابۋ قيىن: ءار جىلدا بولىنگەن گرانتتار ءتىزىمى, ولارعا ءتۇسۋدىڭ شەكتىك بالى, جوو ورنالاسقان قالالار سەكىلدى دەرەكتەردى تالاپكەرلەر الۋان ءتۇرلى سايتتار مەن گازەت بەتتەرىن اقتارىپ وتىرىپ ىزدەۋگە ءماجبۇر. وسى ماسەلەنى ەسكەرگەن قانات وكسىكباەۆ جاقىندا Joo.kz اتتى جوبانى جاساپ شىعاردى. اڭگىمە بارىسىندا ول بىزگە اتالعان ستارتاپتىڭ ەرەكشەلىگى مەن ماقساتىن ايتىپ بەردى.
يدەيا قالاي تۋدى؟
2017 جىلى ءبىر دوسىممەن كەزدەسكەن ەدىم. كوڭىل كۇيى ءتۇسىپ كەتكەن. ءمان-جايدى بىلسەم, قارىنداسى وقۋ ءبىتىرىپ, ۇبت-دان 68 بالل الىپتى. ۋايىمى – گرانتقا ءۇمىت جوق, ال اقىلى تۇردە وقىتۋعا قالتالارى كوتەرمەيدى.
سوسىن ەكەۋمىز ينتەرنەتتەن گرانتقا قاتىستى اقپارات ىزدەۋگە كىرىستىك. اقىرىندا بارلىق مۇمكىنشىلىكتەردى اسىقپاي سارالاپ, گرانتقا ىلىگۋ ىقتيمالدىعى ەڭ جوعارى ءتورت ماماندىققا قۇجات تاپسىردىق. ناتيجەسىندە الگى قارىنداسىمىز ءۇشىنشى تاڭداعان ماماندىعى بويىنشا مەملەكەتتىك گرانت يەگەرى اتاندى. اكە-شەشەسىنىڭ قۋانىشىندا شەك جوق.
وسى جاعدايدان سوڭ تالاپكەرلەرگە جوو مەن ماماندىقتار جايلى تولىققاندى مالىمەت بەرەتىن, سونداي-اق ولاردىڭ ۇبت-دا جيناعان بالى بويىنشا گرانت يەلەنۋ مۇمكىندىكتەرىن سارالاپ بەرەتىن پورتال اشۋدى ويلاستىردىم.
پورتال قانداي مالىمەتتى ۇسىنادى؟
Joo.kz پورتالىندا وتاندىق جوو, ولارداعى وقۋ اقىسىنىڭ جىلدىق ورتاشا مولشەرى, جاتاقحاناسى جانە اسكەري كافەدراسىنىڭ بار-جوقتىعى, ستۋدەنتتەرىنىڭ سانى, ءار ماماندىقتىڭ قاي جەردە وقىتىلاتىنى جانە ولارعا ءتۇسۋ ءۇشىن قاجەتتى تاڭداۋ ءپانى ءتارىزدى مالىمەت جان-جاقتى كورسەتىلگەن. ادەتتە, تالاپكەرلەر تاراپىنان «IT سالاسىن وقىتاتىن قانداي ۋنيۆەرسيتەتتەر بار؟» نەمەسە «قازاق ءتىلى مەن ادەبيەتى ءپانىن تاڭداسام, قانداي ماماندىقتارعا تۇسە الام؟» دەگەن سىقىلدى سۇراقتاردى كوپ ەستيمىز. پورتالدىڭ جوعارىداعىداي بولىمدەرى وسىنىڭ بارىنە جاۋاپ بەرەدى.
مۇنىمەن قوسا, سايت Big Data سياقتى زاماناۋي تەحنولوگيالاردى قولدانا وتىرىپ, 2014 جىلدان بەرگى ۇبت-عا قاتىستى بارلىق ستاتيستيكا بويىنشا ساراپتاما جاساۋعا قاۋقارلى. ياعني تالاپكەر ءوزىنىڭ جيناعان بالى مەن تاڭداۋ ءپانىن ەنگىزۋ ارقىلى قانداي ۋنيۆەرسيتەتتىڭ قانداي ماماندىعىنا ءتۇسۋ ىقتيمالدىعى جوعارى ەكەنىن انىقتاي الادى.
اناليز 90 پايىز دالدىكتى كورسەتتى
پورتال freemium بيزنەس مودەلى بويىنشا جۇمىس ىستەيدى. بۇل تەرمين اعىلشىننىڭ «free» («تەگىن») جانە «premium» («جوعارى ساپالى») دەگەن سوزدەرىنىڭ قوسىندىسىنان شىققان. تالاپكەرلەر پورتالدىڭ ءبىراز قىزمەتىن تەگىن پايدالانا الادى, ال وزدەرىنىڭ قانداي ماماندىقتارعا تۇسۋگە مۇمكىندىگى بارىن بىلگىسى كەلىپ, جەكە ساراپتاما جاساتام دەسە, بۇل قىزمەت اقىلى. ءار بالانىڭ ءبىر جىلدىڭ ورتاشا چەگى شامامەن 5 مىڭ تەڭگەنىڭ اينالاسىندا شىعادى. ءتورت جىل بويى گرانت بولىمىندە ءبىلىم الۋىنىڭ ارقاسىندا جەتكىنشەك قانشا قارجىسىن ۇنەمدەيتىنىن ەسكەرسەك, بۇل – وتە ارزان سوما. ادەتتە, جىل سايىن تالاپكەرلەردى «وقۋعا ءتۇسىرىپ بەرۋگە ۋادە بەرەتىن» الاياقتاردىڭ ساۋداسى قىزادى, مۇنىڭ دا باستى سەبەبى – مەكتەپ تۇلەكتەرىنە ارنالعان اقپاراتتى ءتۇگەلىمەن ءبىر جەرگە جيناقتايتىن سەنىمدى دەرەككوزدىڭ جوقتىعىنان.
ءبىز جىل سايىن قولدا بار 2014 جىلدان بەرگى ءمالىمەتتى پايدالانىپ, بولجام جاسايمىز. گرانت ءتىزىمى شىققاننان كەيىن سالىستىرساق, الگى بولجامدارىمىزدىڭ شامامەن 90 پايىزى ءدال كەلەدى.
ون كۇندە – 1353 سۇرانىس
بىلتىرعى جانە الدىڭعى جىلى ءبىز وسى جوبامىزدىڭ قانشالىقتى سۇرانىسقا يە بولاتىنىن تەكسەرمەك ماقساتىندا پورتالدىڭ اۆتوماتتاندىرىلعان نۇسقاسىن جاسادىق. سايت ءالى تولىق جاسالىپ بىتپەسە دە, جان-جاقتان اعىلعان سۇراقتارعا كومىلىپ قالدىق. مىسالى, 2018 جىلى ون كۇننىڭ ىشىندە تۇلەكتەردەن 1353 ءوتىنىش كەلىپ ءتۇستى. دەمەك, بۇل – قازاقستاندىق مەكتەپ بىتىرۋشىلەرى شىنىمەن دە ءبىز ۇسىناتىن اقپاراتقا ءزارۋ دەگەن ءسوز. بۇلاردان بولەك, الەۋمەتتىك جەلىلەردەگى رەسمي پاراقشالارىمىزعا دا دامىل جوق. تالاپكەرلەر كوبىنەسە بولاشاق ماماندىقتارىنا ءتۇسۋدىڭ شەكتىك بالىن, تاڭداعان پاندەرىنە سايكەس كەلەتىن ماماندىقتار ءتىزىمىن, بەلگىلى ءبىر ماماندىقتى وقىپ بىتىرگەن سوڭ قانداي جەرلەردە جۇمىس ىستەي الاتىنىن سۇرايدى. سونداي-اق, «جۋرناليستيكاعا ءتۇسۋ ءۇشىن شىعارماشىلىق ەمتيحاندا نە ىستەۋىم كەرەك؟», «ءتىلدى تەزىرەك مەڭگەرۋ ءۇشىن قانداي كەڭەس بەرەسىزدەر؟», «ماماندىق تاڭداۋدا قاتەلەسۋ دەگەن ۇرەيدەن قالاي ارىلۋعا بولادى؟» دەگەن ءتارىزدى ارنايى ماماننىڭ جاۋابىن قاجەت ەتەتىن سۇراقتار دا تۇسەدى.
مەن بيىلعى تالاپكەر ەدىم.قازاق ت ,قازاق ادەبيەت ءپانىن تاڭداپ 68ۇپاي الدم,سەرپىنگە ىلىگە الامنبا؟