قالاداعى تەمىر قاقپاعى ۇرلانىپ اشىق قالعان قۇدىقتاردىڭ ماسەلەسى كۇن تارتىبىنەن تۇسپەي كەلەدى. استانا قالاسىنىڭ پوليتسيا دەپارتامەنتى ليۋكتەردى ۇرلاۋدىڭ الدىن الۋ جانە جولىن كەسۋ بويىنشا جەدەل-رەيدتىك ءىس-شارالاردى ءجيى وتكىزەتىن بولدى.
پوليتسيا ورگاندارى مەملەكەتتىك كىرىستەر دەپارتامەنتىنىڭ وكىلدەرىمەن بىرلەسىپ, مەتالل سىنىقتارىن قابىلداۋ پۋنكتتەرىن تەكسەرۋ بويىنشا اۋقىمدى ءىس-شارالار وتكىزۋدە. قولدانىستاعى ليۋكتەردە مەتالل تورلار ورناتىلادى. بۇل ونىڭ قاقپاعى ۇرلانعان جاعدايدا قۇدىققا ادامداردىڭ, جانۋارلاردىڭ, بوگدە زاتتاردىڭ قۇلاۋىنان قورعاۋ قۇرالى بولىپ تابىلادى. بۇگىنگى تاڭدا 9 مىڭنان استامى تورلارمەن جابدىقتالعان. مەتالل تورلار تەرەڭدىگى قاۋىپ توندىرمەيتىن قۇدىقتارعا ورناتىلمايدى. وسى رەتتە, پوليمەرلىك-قۇمدى بۇيىمداردان قاۋىپسىزدىك تەحنيكاسى مەن ەكولوگيالىق نورمالاردى ەسكەرە وتىرىپ كومپوزيتتىك ماتەريالداردان جاسالعان ليۋكتەر ورناتۋ قاراستىرىلۋدا. مۇنداي ليۋكتەر مەتالل سىنىعى رەتىندە جارامسىز بولىپ تابىلادى, سوندىقتان ولاردى ۇرلاۋ فاكتىلەرى بارىنشا ازايۋى ءتيىس. الايدا پوليمەرلى-قۇمدى ليۋكتەر ۇلكەن جۇكتەمەگە توتەپ بەرە المايدى, سوندىقتان جاڭا جوبالاردى ىسكە اسىرۋ كەزىندە ولار تەك قانا تروتۋارلاردا پايدالانىلاتىن بولادى.
