Education For All ينكليۋزيۆتى ءبىلىم بەرۋ ورتالىعى نازارباەۆ ۋنيۆەرسيتەتىنىڭ كامپۋسىندا ەكىنشى جىل قاتارىنان جۇمىس ىستەپ كەلەدى. ءبىلىم بەرۋ قىزمەتىمەن قاتار اتالعان ورتالىق ينكليۋزيۆتى تەاتر جوباسىن دا جۇرگىزەدى, بۇگىندە ولاردىڭ رەپەرتۋارىندا بىرنەشە پەسا مەن ميۋزيكل بار.
بۇل ۇيىمدى نازارباەۆ ۋنيۆەرسيتەتىندەگى گۋمانيتارلىق جانە الەۋمەتتىك عىلىمدار مەكتەبىنىڭ تۇلەگى كاميلا رولان اشقان. ونىڭ ايتۋىنشا, ەلىمىزدە 70 مىڭنان اسا بالا مۇگەدەك ستاتۋسى بويىنشا تىركەۋدە تۇر. ولاردىڭ 20 پايىزى جالپى ءبىلىم بەرەتىن مەكتەپتەرگە بارسا, قالعاندارى ۇيدە وقىتىلادى. ال بۇل جايت جەتكىنشەكتەردىڭ كوممۋنيكاتسيالىق قابىلەتتەرىنىڭ دامۋىنا, دوستار تابۋىنا, باسەكەگە قابىلەتتى ءبىلىم الۋىنا كەدەرگى تۋعىزاتىنى انىق.
– مەن 2012 جىلدان بەرى قىزىل جارتى اي قوعامىنىڭ ۆولونتەرى رەتىندە تۇرمىسى تومەن وتباسىلار مەن ميگرانتتاردىڭ بالالارىن وقىتۋ ءجونىندەگى جوبامەن اينالىستىم. ءتورت جىلدان كەيىن ينكليۋزيۆتى ءبىلىم بەرۋ سالاسىندا ماگيستراتۋرا باعدارلاماسىنا ءتۇسۋدى شەشتىم. بۇل مەن ءۇشىن اتالعان ءبىلىم بەرۋ مودەلىن ەنگىزۋدەگى پروبلەمالاردى تولىقتاي تۇسىنۋگە جانە ولاردى جەڭۋدە كەرەك قارىم-قابىلەتتەردى مەڭگەرۋگە كوپ كومەكتەستى. جەكە ۇكىمەتتىك ەمەس سەكتوردا قازاقستان ءۇشىن جاڭا تاجىريبەلەردى بارىنشا ەركىن قولدانۋعا بولاتىنىن تۇسىنگەن سوڭ, Education For All اتتى قوعامدىق ۇيىمدى اشتىم, – دەيدى كاميلا.
قازىرگى تاڭدا ورتالىقتا داۋن سيندرومى بار بالالار, اۋتيزممەن اۋىراتىن ۇل-قىزدار, گيپەربەلسەندى جاسوسپىرىمدەر جانە تۇرمىسى تومەن وتباسىدان شىققان جەتكىنشەكتەر وقىتىلۋدا.
– قوعامنىڭ بۇكىل مۇشەلەرىنىڭ مۇمكىندىكتەرى تەڭ بولۋى كەرەك. وسى ماقسات – مەنى جانە مەنىڭ كوماندامدى شابىتتاندىراتىن ەڭ نەگىزگى كۇش, – دەپ اعىنان جارىلادى كاميلا. – بىردە ءوز جۇمىسىمىزدى تانىستىرۋ ءۇشىن پرەسس-كونفەرەنتسيا ۇيىمداستىرىپ, جۋرناليستەردىڭ سۇراقتارىنا جاۋاپ بەرىپ جاتقانىمدا, زالدا وتىرعان ەرەكشە بالانىڭ اناسى كوزىنە جاس الدى. ول ءبىزدىڭ الگى بالاعا پاتسيەنت نەمەسە ۇيرەنۋى قيىن مۇگەدەك ادام رەتىندە ەمەس, ۇلكەن پوتەنتسيالى بار تۇلعا رەتىندە قاراعانىمىز ءۇشىن جىلاعان ەدى. مەنىڭ سوندا جۇرەگىم شىم ەتە ءتۇستى. مەكتەپتە ءبىلىم الۋ قۇقىعى بارلىق ازامات ءۇشىن قالىپتى جاعداي بولۋى كەرەك قوي. الداعى ۋاقىتتا مەن وسىعان جول اشقىم كەلەدى.
