بىردە Facebook-تەن مىناداي جارنامانى وقىدىم: «قارجى اكادەمياسىنىڭ ستۋدەنتتەرىنە دينارا ءساتجان شەشەندىك ونەردەن ءدارىس وقيدى» دەپ جازىپتى. ويلانىپ قالدىم. دينارا حانىم نە شەشەندىك ونەردى تەرەڭ زەرتتەگەن عالىم, نە بۇگىنگىنىڭ حاس شەشەنى بولسا, اڭگىمە باسقا. مەنىڭشە, ول جەرگە دينارا ەمەس, قازاقتىڭ شەشەندىك ونەرىن جىلدار بويى زەرتتەپ جۇرگەن سەرىك نەگيموۆ, ءانشى, قوعام قايراتكەرى بەكبولات تىلەۋحان بارسا ءجون بولار ەدى.
قازىر كىمنىڭ شىن تۇلعا نەمەسە تۇلعا ەمەستىگىن ايىرا المايتىن بولدىق. سەبەبى جاسوسپىرىمدەر مەن جاستار ومىردەگى ەمەس, Instagram-داعى «تۇلعالارعا» كوبىرەك ەلىكتەيدى. تەلەديدار دا شىنايى تۇلعادان گورى ەسترادا انشىلەرىن كورسەتكەندى قولاي كورەدى. حالىقتىڭ اقشاسىنا كۇن كورەتىن مەملەكەتتىك تەلەارنالار جالعان قۇندىلىقتاردى ناسيحاتتاۋدا. كۇن سايىن ناسيحات قۇرالدارى جەردەگى جۇلدىزداردىڭ ءىشىپ-جەگەنىن, ءجۇرىپ-تۇرعانىن كورسەتە بەرگەن سوڭ, بالانى قالاي كىنالايسىڭ؟
جاستاردىڭ دەنى بايان ەسەنتاەۆانى جازۋشى, دينارا ءساتجاندى شەشەن دەپ ويلايدى. بالكىم, ولار ءوز ومىرىنەن كىتاپ جازىپ, جۇرتقا اۋزىنىڭ سۋى قۇرىپ اڭگىمەلەيتىن شىعار. بىراق اركىمگە «جازۋشى» دەگەن ءسوزدى تىركەي بەرۋ دۇرىس پا؟ اركىم ءوز ورنىندا وتىرۋى كەرەك. ال بۇگىن ەكىنىڭ ءبىرى – جازۋشى نە تۇلعا, ساياساتكەر نەمەسە قايراتكەر. ولاردىڭ بارلىعى ۇلتقا قىزمەت ەتىپ ءجۇر مە؟ ماسەلە – سوندا.
مەنىڭشە, ۇلتتى دۇرىس جولعا باعىتتايتىن تۇلعا, زيالى قايراتكەر ءوزىنىڭ قوعامدا ونەگەلى ومىرىمەن, ايتقان سوزدەرىمەن, جازعان كىتاپتارىمەن, ىستەگەن ىستەرىمەن جاس ۇرپاققا ۇلگى بولۋى ءتيىس. سوندا ولاردى حالىقتىڭ ءوزى تۇلعا دەپ تانيدى. مىسالى, الاش ارداقتىلارى وزدەرىن تۇلعا, قايراتكەر دەپ ساناعان جوق. وزدەرى تاڭداعان ماماندىققا, مەملەكەتتىك مۇددەگە ءومىرىن ارنادى. ۇلتتىڭ كەلەشەگى ءۇشىن باسىن قاتەرگە تىكتى. ءسويتىپ كەلتە عۇمىرىندا ەلىنە پايداسىن تيگىزدى. سوندىقتان شىن تۇلعانى تانۋ, مويىنداۋ دەگەندى ەشقاشان ەسىمىزدەن شىعارماعانىمىز ابزال.
