تابيعاتتىڭ تىلسىم كۇشىن بولجاۋ مۇمكىن ەمەس-اۋ. بيىلعى قىس باستالعالى نۇر-سۇلتان قالاسىندا قاردىڭ ءتۇسىمى قالىڭ-اق. تىنىمسىز, جاپالاقتاپ جاۋا بەرەدى, جاۋا بەرەدى. كۇن سايىن قالا سىرتىنا شىعارىلىپ جاتسا دا, تاۋسىلاتىن قار جوق.
«وتكەن دەمالىس كۇندەرى ەلوردادا قاردىڭ ءبىر ايلىق نورماسى جاۋدى. قالانىڭ كوممۋنالدىق قىزمەتتەرى تاۋلىك بويى كۇشەيتىلگەن رەجيمدە جۇمىس ىستەپ كەلەدى. ءبىر عانا سارىارقا اۋدانىنىڭ قار پوليگونىنا تاۋلىگىنە 200-300 ساموسۆالعا دەيىن قار شىعارىلادى, ولاردىڭ ارقايسىسى 8 رەيسكە دەيىن جاسايدى» دەپ حابارلادى ەلوردا ينفو ءتىلشىسى.
ەلوردانىڭ ءار اۋدانىنا قار شىعارۋعا ارنالعان ارنايى پوليگون بەكىتىلگەن. ماسەلەن, ولاردىڭ ءبىرى كوكتال تۇرعىن الابىنا جاقىن جەردە ورنالاسقان. مۇندا سارىارقا اۋدانىندا جينالعان قار شىعارىلادى. «بۇگىن سارىارقا اۋدانى بويىنشا قار پوليگونىنا 119 مىڭ تەكشە مەتردەن استام قار شىعارىلدى. قار كوپ جاۋعان كۇندەرى ءبىر اۋىسىمدا 5 مىڭنان 7 مىڭ تەكشە مەترگە دەيىن, ال از جاۋعان كۇندەرى 2-3 مىڭ تەكشە مەتر قار جەتكىزىلەدى» دەيدى سارىارقا اۋدانى اكىمدىگىنىڭ كوممۋنالدىق شارۋاشىلىق ءبولىمىنىڭ باسشىسى تيمۋر شودانوۆ.
سوڭعى مالىمەتكە قاراساق, اۋدان اۋماعىنان تاۋلىگىنە پوليگونعا 200-دەن 300-گە دەيىن كاماز قار شىعارىلادى. ولاردىڭ ارقايسىسى كۇنىنە ورتا ەسەپپەن 6-8 رەيس جاسايدى ەكەن.
قالا بويىنشا قار ارتۋشى ماشينا جۇرگىزۋشىلەرى مەن شوپىرلار, سونداي-اق تازالىقشى جۇمىسشىلار ەكى اۋىسىممەن جۇمىس جۇرگىزۋدە. اتاپ ايتقاندا, تاڭەرتەڭگى 6-دان كەشكى 6-عا دەيىن كۇندىزگى, ال كەشكى 21:00-دەن تاڭعى 5-6-عا دەيىن تۇنگى اۋىسىم جۇمىس ىستەيدى.
پوليگون اۋماعىنا بارىپ كەلگەن ەلوردا ينفو ءتىلشىسى ايگەرىم مۇساتاەۆا قاردىڭ تاۋ-تاۋ بولىپ جينالىپ جاتقانىن ايتىپ, ديسپەتچەرلەر جۇمىسى دا تىنىمسىز ەكەنىن جەتكىزدى.
«جۇرگىزۋشىلەردىڭ جول قاعازىندا ءمورتابان-ساعات كەلۋ ۋاقىتىن اۆتوماتتى تۇردە بەلگىلەيدى. كۇنىنە ءتۇرلى ماشينالار كەلەدى, ولاردىڭ وزىنە لايىق كۋباتۋراسى بار. رەيستەردى بەلگىلەپ العان سوڭ جۇمىس كۇنىنىڭ سوڭىندا كۋباتۋرانى ەسەپتەپ, جينالعان اقپاراتتى ديسپەتچەرلىك ورتالىققا تاپسىرامىز» دەيدى «استانا تازالىق» جشس قار پوليگونىنىڭ وپەراتورى ازامات قىزداربەكوۆ.
وپەراتوردىڭ ايتۋىنشا, بيىلعى قىستا وتكەن جىلعىدان كوپ قار جاۋدى. ماشينالار كۇندىز دە, تۇندە دە بىردەي مولشەردە قار شىعارادى.
– تاڭەرتەڭنەن جاسىل سۋلى-نۋلى جەلەكتەن قار تاسىپ ءجۇرمىن. مىناۋ ءتورتىنشى رەيسىم. كەشكە دەيىن تاعى ءبىر شىعارىپ ۇلگەرەمىن. قار اۋىر, ويتكەنى تىم دىمقىل. جالپى, قار ءتۇسىمى كوپ. كوبىرەك شىعارۋعا دا بولار ەدى, بىراق كۇندىز كولىكتەر كوپ جۇرەتىندىكتەن كەپتەلىستە تۇرىپ قالا بەرەمىز, – دەيدى بىزبەن اڭگىمەسىندە كاماز جۇرگىزۋشىسى سەرىك ءالجانوۆ.
قاردىڭ قالىڭ جاۋعانى جۇرتشىلىقتى دا بەيعام قالدىرىپ جاتقان جوق. جەكە سەكتوردا تۇراتىندار ءۇي اۋلاسىنداعى قاردى كوشە بويىنا شىعارىپ جاتىر.
– بىرنەشە كۇن جاۋعان قار, وعان قوسا بۇرقاسىن ەداۋىر ابىگەرگە سالىپ وتىر. مۇنداي قار كوپتەن بەرى تۇسپەپ ەدى. اۋدان باسشىلىعىنىڭ ايتۋىمەن اۋلاداعى قاردى ۇلكەن كوشەگە شىعارىپ جاتىرمىز. ول جاقتان ماشينامەن تاسىپ اكەتۋدە. قازىر شىعارماساق, وندا قار استىندا قالامىز عوي, – دەيدى «پرومىشلەننىي» تۇرعىن الابىنىڭ تۇرعىنى, زەينەتكەر ءساليما جۇماعۇلقىزى.
جالپى, ماماندار بيىلعى قىس ەرەكشە قارلى بولادى دەپ بولجاپ وتىر. وتكەن جىلمەن سالىستىرعاندا قار كوپ تۇسەتىنى ايتىلادى. ولاي بولسا, قار قاربالاسىنا كوپشىلىك بولىپ اتسالىسايىق, اۆتوجۇرگىزۋشىلەر قار تاسۋشى كولىكتەرگە جول بەرىپ, قارعا سۇرىنگەن قاريالار مەن بالالاردى دەمەپ جىبەرسە, نۇر ۇستىنە نۇر بولار ەدى.
