باس قالاداعى بەيبىتشىلىك جانە كەلىسىم سارايىندا «ەلوردا جاستارى سىيلىعى – 2019» بايقاۋى ءوتتى. 
جيىن بارىسىندا ءسوز العان شاھار باسشىسى التاي كولگىنوۆ:
– بۇل شارا بيىلعى «جاستار جىلىندا» اتقارىلعان جۇمىستىڭ قورىتىندىسى دەسەك تە بولادى. ارينە, بۇل باعىتتاعى جۇمىستار ءوز جالعاسىن تابا بەرەدى. مەملەكەت تاراپىنان ءوزىن دامىتامىن دەگەن جاستارعا ءتۇرلى مۇمكىندىك قاراستىرىلىپ جاتىر. ءبىزدىڭ جاستارىمىزدىڭ بارلىق سالا بويىنشا اۋىز تولتىرىپ ايتاتىن جەتىستىكتەرى جەتكىلىكتى. مۇنىڭ بارلىعى – ەڭبەكتىڭ ارقاسى, – دەدى.
قىركۇيەكتە باستالعان بايقاۋعا 1 مىڭعا جۋىق ءوتىنىم كەلىپ تۇسكەن. قالالىق اكىمدىكتىڭ جاستارمەن جۇمىس ءبولىمى باسشىسى باقىتجان جۇنىسبەكوۆتىڭ ايتۋىنشا, بايقاۋ نومينانتتارىنا قويىلعان العاشقى تالاپ رەتىندە ۇمىتكەرلەردىڭ 14 پەن 29 جاس ارالىعىندا بولۋى مىندەتتەلىپتى. ەكىنشى كەزەڭدە ۇمىتكەردىڭ ءوز سالاسى بويىنشا جىل بويى جاساعان جۇمىستارى مەن جەتىستىكتەرى ەسەپكە الىنىپ, ولار ارنايى قۇرىلعان كوميسسيانىڭ قاراۋىنا جىبەرىلگەن. ولار 15 نوميناتسيا بويىنشا 3-تەن 5-كە دەيىن ۇمىتكەردى تاڭداپ العان. ودان سوڭ ونلاين داۋىس بەرۋ كەزەڭى باستالىپ, اقتىق سىندا ەڭ كوپ داۋىس جيناعان جەڭىمپازدار انىقتالدى.
سايىس ناتيجەسىندە «ەلوردا جاستارى سىيلىعى – 2019» بايقاۋىنىڭ جەڭىمپازدارى بولىپ «ەسترادا» اتالىمىندا – ميراس جۇگىنىسوۆ, «عىلىم» اتالىمىندا – قۋانىش ەرساحانوۆ, «جۋرناليستيكا» اتالىمىندا – ريزا دانيار, «كينو جانە تەاتر» اتالىمىندا – سامات ازىمقۇلوۆ, «ۇلتتىق ونەر» اتالىمىندا – اسەل الىبەكوۆا, «سپورت» اتالىمىندا – ماديار مۋسايفوۆ, «مەملەكەتتىك قىزمەت» اتالىمىندا – تاڭشولپان ەرمانوۆا, «الەۋمەتتىك سالانىڭ ۇزدىك قىزمەتكەرى» اتالىمىندا – جۇنىساليەۆتەر وتباسى, «قوعامدىق قىزمەت» اتالىمىندا – اسىلبەك ءابدۋراشيتوۆ, «ءوندىرىستىڭ ۇزدىك قىزمەتكەرى» اتالىمىندا – سابينا وتاروۆا, «زاماناۋي شىعارماشىلىق ونەر» اتالىمىندا – اقبوتا توقتاسىنوۆا, «ۇزدىك ستۋدەنت» اتالىمىندا – ابدراۋف ورال, «ۇزدىك جاستار تەاترى» اتالىمىندا – «شاڭىراق» تەاترى, «جاس كاسىپكەر» اتالىمىندا – ايگەرىم باپانوۆا جانە «جىل ۆولونتەرى» اتالىمىندا ميراس مۇرات تانىلدى.
