قاراعاندى وبلىسى ەلوردانىڭ 20 جىلدىق مەرەيتويىنا اشىق اسپان استىنداعى مۇراجاي مەن «قازاق ەلىنە مىڭ العىس» اتتى مونۋمەنت سىيلايدى. بۇل تۋرالى وبلىس اكىمى ەرلان قوشانوۆ استاناداعى ورتالىق كوممۋنيكاتسيالار قىزمەتىندە وتكەن بريفينگ بارىسىندا مالىمدەدى.
– ءبىر ايدان سوڭ ءبىز استانانىڭ 20 جىلدىق مەرەيتويىن اتاپ وتەمىز. قاراعاندىلىقتار ەلورداعا سىيلىق ازىرلەپ وتىر. ول – «ۇلىتاۋ» اللەياسى مەن «قازاق ەلىنە مىڭ العىس» اتتى مونۋمەنت. اللەيا ۇلىتاۋدىڭ باستى كورىكتى نىساندارىن كورۋگە بولاتىن اشىق اسپان استىنداعى مۇراجاي رەتىندە بولادى. باستى توسىنسىي ءامىر تەمىردىڭ جازۋى باسىلعان التىن شوقى ءدوڭىنىڭ باسىندا بولعان تاستىڭ كوشىرمەسى بولماق. ول تاستىڭ تۇپنۇسقاسى ەرميتاجدا ساقتالعان.
– عالىمدار تاس تاقتا 1391 جىلى ءامىر تەمىردىڭ التىن ورداعا شىققان اتاقتى جورىعى كەزىندە ورناتىلعان دەگەن بولجام جاساۋدا. جانە دە ول ارتەفاكتىنىڭ كوشىرمەسى العاش رەت كوپشىلىككە قولجەتىمدى جەردە قالىڭ حالىق نازارىنا ۇسىنىلماق. سونداي-اق, اللەيادا تاريحى 4 مىڭنان استام جىلعا تەرەڭدەيتىن تەرەكتى-اۋليە جانە بايقوڭىر پەتروگليفتەرى ورىن الادى, – دەدى ايماق باسشىسى.
«قازاق ەلىنە مىڭ العىس» مونۋمەنتى قازىرگى تاڭدا قاراعاندى كوركەمونەر كومبيناتىندا جاسالىپ جاتىر. ول قۋعىن-سۇرگىن زامانىندا قازاقستانعا جەر اۋدارىلعان كوپتەگەن ۇلت وكىلدەرىن باۋىرىنا باسقان قازاق حالقىنىڭ مەيىرىمدىلىگىن بەينەلەيدى. اتالعان نىسانداردى تۇرعىزۋعا وبلىستاعى كاسىپكەرلەر دەمەۋشىلىك كورسەتۋدە.
