بيىلعى قارتتار كۇنى استانادا ەرەكشە تويلاندى. كۇندىز فلەشموب بيلەگەن اتا-اجەلەر تۇستە مەرەكەلىك داستارقاننان ءدام تاتتى. قالالىق قاريالار ءارى قاراي «جاستار» سارايىندا وتكەن «شىن جۇرەكتەن شىققان اسەرلى سوزدەر» كونتسەرتىن تاماشالادى.
ەڭ الدىمەن 300-گە جۋىق زەينەتكەر «ارداگەرلەر سالاۋاتتى ءومىر سالتىن قولدايدى» تاقىرىبىنداعى فلەشموبقا قاتىستى. بۇل شاراعا ۇيىتقى بولعان قالالىق ارداگەرلەر كەڭەسى مەن الماتى, سارىارقا, ەسىل اۋداندارىنىڭ ارداگەرلەر كەڭەسى. سونىمەن بىرگە قارتتار كۇنىندەگى سپورتتىق شاراعا مادەنيەت, مۇراعاتتار جانە قۇجاتتاما باسقارماسى مەن دەنەشىنىقتىرۋ جانە سپورت باسقارماسى قولداۋ كورسەتكەن.
جاستارعا سەكىلدى جاسامىستارعا دا دەنەشىنىقتىرۋ تاڭسىق ەمەس. «بۇگىنگى فلەشموب – جالعاسىن تابۋى ءتيىس جاقسى باستاما. زامانداستارىمىزدىڭ اراسىندا قارتايعاندا جۇگىرىپ, جاتتىعۋ جاساۋعا ۇيالىپ, نە بولماسا ءبىر جەرىمدى اۋىرتىپ الام دەپ قورقاتىندار بار. بۇل ءبىر سەرىگۋ عوي. ونى ەندى كۇندەلىكتى ادەتكە اينالدىرۋ كەرەك. ماسەلەن, ءوزىمنىڭ فيتنەسكە قاتىسىپ جۇرگەنىمە بيىل مىنە ءۇش جىل» دەيدى ءوزىن نينا يۆانوۆنا دەپ تانىستىرعان اجە. ال, قالالىق ارداگەرلەر كەڭەسى توراعاسىنىڭ ورىنباسارى ەسبولات دۇيسەنوۆ قارتتاردىڭ زەرىگىپ بوس وتىراتىن ۋاقىتى جوق دەيدى. «شاحمات وينايدى, قىستا شاڭعىمەن جارىسادى, ارامىزدا سپورت شەبەرلەرى دە بارشىلىق» دەيدى ول.
بۇدان بولەك, جەتپىستىڭ جەلكەنىن كەرگەن جۇزگە جۋىق ارداگەر قالا مەيمانحانالارىنىڭ بىرىندە ۇيىمداستىرىلعان وتىرىستا قوناق بولدى. ولاردىڭ قاتارىندا س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ قۇرمەتتى ۇستازدارى, بىلىكتى قىزمەتكەرلەرى بولدى. تۇلەكتەر كلۋبى بۇل يگى شارانى ءۇشىنشى جىل قاتارىنان وتكىزىپ كەلەدى. اتالمىش وقۋ ورنىنداعى تۇلەكتەر كلۋبى توراعاسىنىڭ ورىنباسارى الەكساندر مايەردىڭ ايتۋىنشا, ۋنيۆەرسيتەتتىڭ ءار جىلداعى شاكىرتتەرى قارتتار كۇنىندەگى تويدى وزدەرى كوتەرگەن. ماسەلەن, كەلگەن اتا-اجەلەرگە العىس حات تابىستالدى, 10 مىڭ تەڭگە كولەمىندە سىيلىق پەن جيىندا تۇسكە فوتوسۋرەتتەر ەستەلىك رەتىندە بەرىلدى.
ال, تۇستەن كەيىن 1 مىڭعا جۋىق استانالىق ارداگەر «جاستار» سارايىندا جينالدى. بۇل جەردە مەيرام يەلەرى قولونەر كورمەسىن تاماشالادى. كورمەگە قويىلعان وريگامي, ورىلگەن سەبەت, قۇراق كورپە, ويۋلانعان جاستىق, قازاقى قورجىن, ءتۇرلى اشەكەي, كەستەلەنىپ تىگىلگەن كارتينالار سىندى سان ءتۇرلى بۇيىمداردى ەلوردالىق ارداگەرلەر قاتارىنداعى اجەلەر جاساعان.
مەرەكەلىك كونتسەرتتە «جاستار» سارايىنىڭ شىعارماشىلىق ۇجىمدارى, استانالىق ەڭبەك ارداگەرلەرىنىڭ حورى, مەملەكەتتىك «ناز» بي تەاترى مەن ەلوردالىق تسيرك ارتىستەرى ونەر كورسەتتى.
– بۇگىندە استانادا 72 مىڭ زەينەتكەر بار. قالا اكىمدىگى ولاردىڭ بار جاعدايىن جاساۋعا ەرەكشە كوڭىل ءبولىپ كەلەدى, – دەيدى قالا اكىمىنىڭ ورىنباسارى ەرمەك امانشاەۆ. ونىڭ ايتۋىنشا, مەرەكەگە وراي قارتتىق جاسقا كەلگەن استانالىق 56500 زەينەتكەردىڭ زەينەتاقىسىنا قوسىمشا 5 مىڭ تەڭگە اۋدارىلادى.
ءمادينا جاقىپ
