حالىققا ەسەپ بەرگەن ادىلەت ءمينيسترى مارات بەكەتاەۆ شەتەلگە شىعاتىن قازاقستاندىقتار ءۇشىن جاعىمدى جاڭالىقتى جاريا ەتتى. ول زاڭ بويىنشا شەتەلگە شىعۋعا شەكتەۋدى الىپ تاستاۋعا ءۇش كۇن ىشىندە رۇقسات بەرىلەتىنىن مالىمدەدى.
«ەگەر شەتەلگە شىعاتىن ادام سالىق بويىنشا بارلىق قارىزدارىن تولەسە, سوت ورىنداۋشىلارى ءۇش جۇمىس كۇنى ىشىندە شەكتەۋدى الىپ تاستاۋى قاجەت. ياعني, بارلىق قارىزدار تولەنسە دە, اپتالاپ شەكتەۋ الىنباعان جاعدايلار دا كەزدەستى. بۇدان بىلاي, ءۇش كۇندە شەكتەۋدى الىپ تاستاماعان سوت ورىنداۋشىنىڭ وزىنە سانكتسيا سالىنادى» دەپ ءتۇسىندىردى ماسەلەنىڭ ءمانىسىن مينيستر.
قازىرگى كەزدە سوت شەشىمدەرىن ورىنداۋ شارالارى باستالعاندا قارىز بولعان ادامعا حابار جىبەرىلەدى. ياعني, ول ءوزىنىڭ قارىزىنا قاتىستى ءتيىستى شارالاردىڭ قولعا الىنعانىن ءبىلىپ وتىرادى. «بۇرىن بۇل دا تۇيتكىلدى ماسەلە ەدى. ازاماتتار ەسكى مەكەنجايلارى بويىنشا جىلجىمايتىن مۇلىككە قارىزىنىڭ جينالىپ قالعانىن بىلمەي جۇرە بەرەتىن. اۋەجايعا بارىپ, شەتەلگە ۇشۋعا تولقۇجاتىن تەكسەرتكەن كەزدە بىراق بىلەتىندى» دەپ اتاپ ءوتتى مارات بەكەتاەۆ. راسىندا دا, بۇرىن سوت ورىنداۋشىلارى شەكتەۋدى قاي ۋاقىتتا الىپ تاستايتىنىن وزدەرى شەشىپ كەلدى. ايتا كەتەلىك, 4 مىڭعا جۋىق سالىعىن تولەمەگەن قازاقستاندىقتارعا شەتەلگە شىعۋعا شەكتەۋ قويىلعان بولاتىن.
سوت ورىنداۋشىلاردىڭ قىزمەتىنە قاتىستى زاڭ جوباسى پارلامەنتتىڭ قاراۋىندا جاتىر. سول جوبادا سوت ورىنداۋ شىلاردىڭ قىزمەتىنە سانكتسيا سالۋدى الىپ تاستاۋ تۋرالى ۇسىنىس بار. مارات بەكەتاەۆ سوت ورىنداۋشىلار ينستيتۋتىن دامىتۋ جۇمىستارى ودان ءارى جالعاساتىنىن جەتكىزدى. ءمينيستردىڭ ايتۋىنشا, زاڭ جوباسىندا سوت ورىنداۋشىلارىن جاۋاپكەرشىلىككە تارتۋ تەتىكتەرى دە قاراس تىرىلعان. وكىلەتتىكتەردىڭ ءبىراز بولىگى سوتتان سوت ورىنداۋشىلاردىڭ قۇزىرىنا بەرىلەدى. ۆەدومستۆو باسشىسى سوت ورىنداۋشىلاردىڭ قىزمەتىن تسيفرلاندىرۋ باعىتىنداعى ءىسشارالار دا بەلسەندى جۇرگىزىلىپ جاتقانىن ايتتى. مىسالى, قازىر جىلجىمايتىن مۇلىككە ەلەكتروندىق فورماتپەن تىيىم سالىنادى.
تولەن تىلەۋباي
