«ايەل ىشكى ىستەر سالاسىندا ماماندىعىن جاقسى كورسە عانا جۇمىس ىستەي الادى» دەيدى ەلوردا ىرگەسىندەگى ەتس-166/1 مەكەمەسىنىڭ تاربيە جۇمىسى ءبولىمىنىڭ باستىعى, ادىلەت مايورى قاراشاش سىزدىقوۆا. اباقتىداعى بۇل قىزمەت قاۋىپتى ماماندىقتىڭ قاتارىنا جاتادى.
قاراشاش قاريپولقىزى ەڭبەك جولىن 2002 جىلى ستەپنوي كەنتىندەگى ەتس-166/26 مەكەمەسىندە باقىلاۋشى بولىپ باستاعان. «العاشقى ايلىعىم 5900 تەڭگە بولاتىن» دەپ ەسىنە الدى ادىلەت مايورى. «قۇدايعا شۇكىر, قازىر مەملەكەت باسپانامەن قامتاماسىز ەتىپ وتىر, ايلىعىمىز دا كوڭىلگە قونىمدى» دەيدى ول.
كوكشە اكادەمياسىن زاڭگەر ماماندىعى بويىنشا ءتامامداعان قاراشاش 2005 جىلى كوكشەتاۋداعى تەرگەۋ يزولياتورىنىڭ ارنايى ەسەپ بولىمىنە اۋىسىپ, 2008 جىلى سول قالاداعى «قونىس» كولونياسىندا سوتتالعانداردىڭ اراسىندا ەڭبەكتى ۇيىمداستىرۋ بولىمىندە جۇمىسىن جالعاستىردى. كەيىن سول ءبولىمدى باسقارعان. ال استانا قالاسىنداعى ەتس-166/1 مەكەمەسىنە ءبولىم باستىعى بولىپ 2014 جىلى اۋىستى.
«دەمالىس, مەرەكە كۇندەرى, ءتىپتى كەي كەزدەردە تۇندە دە جۇمىسقا شاقىرتادى. جولداسىم وسى سالادا قىزمەت اتقارعاندىقتان, تۇسىنىستىكپەن قارايدى. ماپەلەپ ءوسىرىپ وتىرعان قىزىمنىڭ قالاۋى بولاشاقتا ىشكى ىستەر سالاسى بولسا, قولدايمىن» دەيدى ول.
قاراشاش سىزدىقوۆانىڭ «ماماندىعىم قاۋىپتى» دەيتىن ءجونى بار. ومىرىندە ەش ۇمىتا المايتىن, قىزمەت بارىسىندا كەزدەسكەن قايعىلى جاعداي تۋرالى ايتقاندا, ءبىز دە تىتىركەنىپ قالدىق. كوكشەدەگى «قونىس» كولونياسىندا ءبىر بولىمدە قاتار ىستەيتىن 21 جاستاعى جاساق باستىعى بولعان قىزدى سوتتالعانداردىڭ ءبىرى ايۋاندىقپەن ولتىرگەندە, جانىن قويارعا جەر تاپپاعان. ماماندىققا ادالدىعى عانا ساقتاپ كەلەدى.
قاراشاش قاريپولقىزىنىڭ ىشكى ىستەر سالاسىندا ۇلگى تۇتار تۇلعاسى بار, ول – ادىلەت پولكوۆنيگى دۋلات احمەتوۆ. العاش رەت جۇمىسقا العان ۇستازى, قازىر زەينەتتە ەكەن. سول كىسىدەن ۇيرەنگەنىم كوپ دەيدى. ارينە, ادامنىڭ بولدىم, تولدىم دەگەنى – توقىراعانى. سوندىقتان «ءۇيرەنگەنىمنەن, ءۇيرەنەرىم كوپ» دەپ ىزدەنۋدەن جالىقپايتىن قاراشاش سىزدىقوۆا بۇگىندە ءوزى باسقارىپ وتىرعان ءبولىم قىزمەتكەرلەرىن ۇيرەتۋدەن جالىققان ەمەس. قاراشاشتاي قايسار قىزدارىمىز بار كەزدە ەلىمىزدىڭ ىشكى ىستەر سالاسىنداعى «جاۋاپكەرشىلىك» دەگەن ۇعىمنىڭ نىعايا تۇسەرى انىق.
گۇلميرا ايماعانبەت
