قازىر ەلىمىزدە ءتۇرلى سالاداعى الاياقتىق اسقىنىپ تۇر. اسىرەسە, ينتەرنەت سالاسىنداعى الدامشىلىق حالىقتى قان قاقساتىپ, سان مىڭ ادامدى سان سوقتىرىپ ءجۇر.
جاقىندا الماتى قالاسىندا تۇراتىن ءىنىمىز حابارلاستى. جەتىساي ءوڭىرىنىڭ ءبىر ازاماتى «اناما تەلەفون شالىپ الايىنشى, مەنىڭ تەلەفونىمدا توق قالماپتى» دەگەن سوڭ, تەلەفونىن بەرىپتى. ول ءىنىمنىڭ كوزىنشە اناسىنا ۆيدەوبايلانىسقا شىعىپ, 2-3 مينۋت سويلەسكەن. بىراق وسى ارالىقتا كاسپي گولدىنان 1,8 ميلليون تەڭگەسىن سىپىرىپ الىپ كەتكەن. بۇل جاعدايدى ول كەتكەننەن كەيىن بايقاعان ءىنىمىز تىزگىن ۇشىمەن پوليتسياعا حابارلاسىپ, ءىستى مالىمدەگەن. ولار ءىستى تىركەۋگە الىپ, الدامشىنى تابامىز دەپ ۋادە بەرگەنىمەن, سودان بەرى 20 كۇن وتسە دە, ءىستى قاراۋعا جاۋاپتى پوليتسيا قىزمەتكەرى ءونىمدى جۇمىس جاساماعان. مەن حابارلاسام دا «تەكسەرىپ جاتىرمىز, ءبىز ونىڭ اتى-ءجونىن انىقتادىق» دەيدى جايباراقات. «20 كۇندە اتقارعان جۇمىستارىڭىز وسى ما؟ ونىڭ اتى كىم ەكەنىن, بايلانىس تەلەفونىن, كەرەك دەسەڭىز, اناسىنىڭ, اعاسىنىڭ بايلانىس نومىرىمەن قوسا, تۇراتىن مەكەنجايىن, فوتوسۋرەتىن دە قوسا بەرگەن جوقپىز با؟» دەسەم, «مەن ساعان ەسەپ بەرۋگە مىندەتتى ەمەسپىن» دەپ تەلەفونىن جابا سالادى. مۇنى ەستىپ ماعان «ادىلەتتى قازاقستاننىڭ زاڭ اتقارۋشىلارىنىڭ ءتۇرى وسى ما؟» دەگەن وي كەلدى. ارينە, مۇنداي جاعداي تەك الماتىدا عانا ەمەس, قازاقستاننىڭ بارلىق وڭىرىندە ءجيى كەزدەسەدى.
الدامشى ارەكەتتىڭ الدىن الۋ ءۇشىن حالىق سەرگەك, زاڭ اتقارۋ قىزمەتكەرلەرى شيراق بولۋى كەرەك. اسىرەسە, جوعارىداعىداي الاياقتىق ارەكەتتەرى بايقالعاندا, قاعازباستى بولىپ وتىرا بەرمەي, جەدەل ىسكە كوشىپ, الدامشىنى ءىزىن سۋىتپاي قولعا تۇسىرمەسە جانە ونى اۋىر جازالاماسا, الدامشىلىققا توسقاۋىل قويا المايمىز. ارينە, الدامشى, الاياقتار بارلىق مەملەكەتتە بار. بىراق ولار قازاقستانداعى سياقتى جۇرتتى سارساڭعا سالىپ, زياندالۋشىلاردى زارىقتىرىپ كۇتتىرىپ, «سوزا بەرسە, توزا بەردى» جاسامايدى. كەرەك دەسەڭىز, جۇرت اۋزىندا «ءبىزدىڭ ەلدىڭ زاڭ اتقارۋشىلارى كەلتىرىلگەن زياننىڭ مولشەرىنە قاراپ جۇمىس ىستەيدى, كەيدە ۇرىمەن, الاياقتىڭ وزىمەن استاسىپ, ارام ولجانى بولىسەدى» دەگەن ءسوز دە ءجيى ايتىلادى. «حالىق ايتسا قالىپ ايتپايدى» دەگەندەي, بۇل ءسوز دە تەگىن شىقپاسا كەرەك. زاڭ اتقارۋشىلارىمىز مۇنداي اشكوز بولسا, الاياقتار الىنەن اسپاي قايتەدى؟! «قازاننان قاقپاق كەتسە, يتتەن ۇيات كەتەدى» دەگەن وسى دا.
قىسقاسى, زاڭ اتقارۋشىلارىمىزدىڭ زاڭدىق تانىمنىڭ تومەندىگى, حالىقتىڭ باس اماندىعىن, مال-مۇلكىن, مۇددەسىن قورعاۋ سانا-سەزىمىنىڭ السىزدىگى دە ەلىمىزدە الاياقتىڭ ورشۋىنە سەبەپ بولىپ تۇر. بۇل اينالىپ كەلىپ, ادىلەتتى قازاقستاننىڭ ابىرويىنا نۇقسان كەلتىرىپ, بيلىكتىڭ ەل جۇرەگىندەگى سەنىمىنە دە سەلكەۋ ءتۇسىرىپ وتىر. بۇل دا ويلاناتىن ماسەلە.
