ماسكەۋدەگى استانا كۇندەرى اياسىندا 20 قىركۇيەكتە «كوسموس» كينوكونتسەرت زالىندا وتاندىق كورەرمەندەردىڭ زور العىسىنا بولەنگەن «جاۋجۇرەك مىڭ بالا» ءفيلمى كورسەتىلدى.
مادەني شارانىڭ اشىلۋىنا استانا قالاسى اكىمىنىڭ ورىنباسارى ەرمەك امانشاەۆ قاتىستى.
– ماسكەۋدە استانانىڭ مادەني كۇندەرى تابىستى وتۋدە. شارا اياسىندا بىرنەشە باعدارلامالار جوسپارلانعان. ماقساتىمىزدا – ەكى قالا اراسىنداعى رۋحاني, مادەني بايلانىستى نىعايتىپ, ودان ءارى دامىتا بەرۋ. بۇگىن سىزدەرگە سوڭعى جىلدارى ءتۇسىرلىپ, حالقىمىزدىڭ ىستىق ىقىلاسىنا بولەنگەن ەكى كوركەم تۋىندىنى الىپ كەلدىك. وندا ءبىزدىڭ ەلىمىزدىڭ تەرەڭ تاريحى بەينەلەنگەن. تالاي زوبالاڭدى كورگەن جۇرتىمىزدىڭ باسىنان كەشكەن وقيعا كينو تىلىندە سيپاتتالادى. ودان سان عاسىر بويى ساقتالىپ كەلە جاتقان باي اسىل مۇرامىز بەن سالت-ءداستۇرىمىزدى تاماشالاي الاسىز. ۇلتىمىزدىڭ قايسارلىعىن كورەسىز. سوندىقتان دا كەلگەن كورەرمەندەرگە ريزاشلىعىمدى بىلدىرەمىن,- دەدى ول.
ارينە, سوڭعى جىلدارى وتاندىق كينو دەگەندە الدىمەن اۋىزمىزعا تالانتتى رەجيسسەر اقان ساتاەۆتىڭ «جاۋجۇرەك مىڭ بالا» ءفيلمى كەلەدى. ول 65 كان فەستيۆالىنە قاتىسقان. كوپتەگەن كينو ماماندارىنىڭ كوركەم تۋىندى تۋرالى پايىمدى پىكىر بىلدىرگەن. قازاقستاندىق كورەرمەندەردىڭ دە بەرگەن باعاسى جوعارى. كينو دا حالقىمىزدىڭ قيىن-قىستاۋ شاقتاعى ءور رۋحى ەرەكشە سۋرەتتەلگەن.
ال ودان ءبىر كۇن بۇرىن كورنەكتى رەجيسسەر ساتىبالدى نارىمبەتوۆ تۇسىرگەن «امانات» ءفيلمى رەسەيلىكتەرگە جول تارقان ەدى. وندا حالقىمىزدىڭ ارداقتى پەرزەنتى, العاش تاريح عىلىمدارىنىڭ دوكتورى اتانعان ەرمۇحان بەكماحانوۆتىڭ قيىن تاعدىرى بەينەلەنگەن. قازاقتىڭ سوڭعى حانى كەنەسارى تۋرالى عىلىمي ەڭبەك جازىپ, ارتىنشا سول ءۇشىن قۋدالانىپ, 25 جىلعا باس بوستاندىعىنان ايىرىلىپ, بار بەينەت پەن تار ازاپتى باستان كەشكەن كورنەكتى تۇلعانىڭ ءومىرىن كينودا شەرلى اسەرگە تولى تولعانىستا ورىلگەن.
ماسكەۋلىكتەر ەكى كينونى دا قىزىعىپ تاماشالادى. كينودان كەيىن دە ءوز پىكىرلەرىمەن ءبولىستى. قازاقتىڭ تەرەڭ تاريحىمەن تانىسقاندارىن جەتكىزدى. قىسقاسى, كونە قالا تۇرعىندارى قازاقستاندىق كينەماتوگرافتاردىڭ كوركەم تۋىندىلارىنا ءدان ريزا بولدى.
