الەمدە تەڭدەسى جوق ديۋ سولەي تسيركىنىڭ قۇرامىندا ونەر كورسەتۋ – ءاربىر ءارتىستىڭ ارمانى بولار, ءسىرا. بۇل ارمانعا ءبىزدىڭ قانداسىمىز گاۋحار احمەتوۆا-اتەرتون قول جەتكىزدى. ءوز جۇرتىمىزعا رەجيسسەر قانات بەيسەكەەۆتىڭ قىسقامەتراجدى ءفيلمى ارقىلى تانىلعان قازاق قىزى – بۇگىنگى ءبىزدىڭ كەيىپكەرىمىز.
– ديۋ سولەي تسيركىندە ونەر كورسەتۋ – ورىندالعان ارماندارىمنىڭ ءبىرى. و باستان شەتەلگە اۋىپ, سول جەردە تۇراقتانۋدى ەش ويلامادىم. تاعدىردىڭ قالاۋىمەن نيۋ-يورك قالاسىنا كەلدىم. سپورتقا كىشكەنتاي كەزىمنەن باستاپ بەيىم بولدىم. اپكەم كاسىبي سپورتپەن اينالىساتىن, مەن دە قالىسپاي, جاساعان جاتتىعۋلارىن, قيمىلدارىن اينا-قاتەسىز قايتالايتىنمىن. اپكەمنىڭ باپكەرى مەنىڭ تالابىمدى بايقاپ, اناما «كىشكەنتاي قىزىڭىز وتە دارىندى. ءتۇبى ءبىر جەردى جارىپ شىعادى. بويىنداعى دارىنىن دامىتىپ, شىعارماشىلىعىن شىڭداۋ كەرەك» دەپ ءجون سىلتەدى. سول كەزدەن باستاپ, الدىما ماقسات قويدىم. كىم بولىپ, نەمەن اينالىساتىنىمدى ايقىنداپ الدىم, – دەپ گاۋحار اڭگىمەسىن باستادى.
«اقىرىن ءجۇرىپ, انىق باس» دەگەندەي, ديۋ سولەيدىڭ بولاشاق جۇلدىزى ەڭ الدىمەن سپورت شەبەرلىگىنە ۇمىتكەر اتانعىسى كەلدى. ماقساتىنا جەتتى. كەيىن سپورت شەبەرى, ودان قالا بەردى حالىقارالىق سپورت شەبەرى دەگەن دەڭگەيگە جەتتى. ال ارمانىنىڭ ەڭ اسىلى تسيركتىڭ قۇرامىندا بولۋ ەدى. اتاقتى تسيركتە جۇمىس ىستەگىسى كەلەتىن كەز كەلگەن ءارتىس «كۇن تسيركىنىڭ» وتانى – مونرەالعا بارىپ, تاجىريبەدەن وتەدى. سوندا بارىپ بىرتە-بىرتە ىسىلادى, شىنىعادى, شىڭدالادى. گاۋحار 1 اي كولەمىندە دايىندىقتان ءوتىپ, كامەلەتكە تولعاننان كەيىن سيدنەيگە جولعا شىعىپ, ونەردەگى العاشقى قادامىن جاسايدى. «ەكى چەموداندى ارقالاپ, ەل جەردى ارالاپ ءجۇردىم. تسيرك ارتىستەرىنىڭ بار ءومىرى – وسى. جەر شارىن كەزىپ جۇرگەننەن كەيىن, قاتال قىسقا دا, جايماشۋاق جازعا دا دايىن بولۋ كەرەكسىڭ. ءبىر جەردە تۇراقتامايسىڭ, ءاربىر جارتى اي سايىن كوشىپ-قونىپ جۇرەسىڭ» دەپ اكروبات قىز تسيرك ارتىستەرىنە ءتان ءومىر سالتىن بايانداپ بەردى. ەڭ العاشقى جۇمىسى – «ۆارەكاي» شوۋىندا گاۋحار جولداسىمەن تانىستى. ءسويتىپ جۇرگەندە, ەكەۋى كومپانيا اتىنان كەلەسى شوۋعا جولداما الدى. لوس اندجەلەس, لاس ۆەگاس, نيۋ-يورك دەپ گاسترولدەر وسىلاي جالعاسا بەردى. «قاي جەردە جاقسى جۇمىس بولسا – سول جەردە ءومىر سۇرگەن جاقسى. ءومىر سونىسىمەن دە ءماندى» دەيدى ول.
جولداسى – بريتاندىق. گاۋحار باستاپقىدا اعىلشىن ءتىلىن بىلمەگەندىكتەن, سويلەسۋ, ءتۇسىنىسۋ قيىنعا سوعاتىن دەيدى. ۋاقىت وتە كەلە, دوستىق ماحابباتقا ۇلاستى. ەكى جارىم جىل بىرگە جۇمىس ىستەپ, ابدەن ءبىر-بىرىنە ۇيرەنىسىپ كەتكەن قوس ءارتىس بىرگە بولۋعا بەل بۋدى. گاۋحاردىڭ ءوزى جولداسى تۋرالى بىلاي دەيدى: «ەندريۋ – مەنىڭ اينام سياقتى. ءوزىم قانداي بولسام, كۇيەۋىم دە سونداي. ومىرىمدەگى جارتىمدى تاپتىم دەپ سەنىممەن ايتامىن. وتە قاراپايىم, جۇرەگى كەڭ. ارامىزداعى 13 جاس ايىرماشىلىعى دا بايقالمايدى. وزىمە جايلى, جۇرەگىمە جاقىن ادامدى كەزىكتىرگەنىمە قۋانىشتىمىن. جان جارىمنىڭ قاسىندا ءوزىمدى باقىتتى سەزىنەمىن».
قازىر گاۋحار ۇيدە, بالالارىنىڭ قاسىندا. «جۇمىس جايىنا قالدى دەي المايمىن, بۇنى ۋاقىتشا ءۇزىلىس دەۋگە بولادى. بالالارىمدى باعىپ, كوز الدىمدا ءوسىپ-جەتىلگەنىن قالادىم. اكەسى جۇمىس ىستەپ, ال اناسى ءۇي شارۋاسىندا بولۋى – زاڭدىلىق. ۋاقىتشا بولسا دا تسيركپەن قوش ايتىسۋ وڭايعا تۇسپەدى, ارينە. بىراق بالاپاندارىم كامالي مەن كەيسەن بوساڭسۋعا مۇمكىندىك بەرمەيدى» دەيدى جاس انا.
اكروبات قىزدىڭ ومىرىندە اكە-شەشەسى مەن وتباسىسى ەرەكشە ورىن الادى. ءاردايىم قولداۋ ءبىلدىرىپ, شەشۋشى ساتتەردە, قيىن-قىستاۋ كەزەڭدەردە جانىنان تابىلاتىن اناسى ءاربىر جەتىستىكتەرىنە سەبەپكەر دەسەم ارتىق ەمەس. سەبەبى قاناتى قاتايعاننان كەيىن, ۇيادان ۇشقان بالاپانىڭنىڭ ۇزاق ساپارىن باقىلاۋ – ءبىر جاعىنان كوڭىلگە ماقتانىش سەزىمىن ۇيالاتسا, ەكىنشى جاعىنان جۇرەگىڭدى تەربەتەدى.
قازاقستان سپورت قۇراماسىندا 17 جاسىنا دەيىن ويناعان گاۋحار تالاي دودالاردا تۋىمىزدى اسقاقتاتىپ, ءانۇرانىمىزدى شىرقاتتى. ال ونىڭ قاتىسۋىمەن وتكەن ديۋ سولەي تسيركىنىڭ ءار قويىلىمىندا جالاۋىمىز جەلبىرەپ تۇردى.
كۇنى كەشە عانا استانادا ديۋ سولەي تسيركىنىڭ «Reflekt» شوۋى العاش قويىلدى. جەرلەستەرىمىزدىڭ كوبىسى بۇل قويىلىمدا قازاق قىزىن كورگىسى كەلدى. ەكسپو اياسىندا وتكىزىلىپ جاتقان شوۋعا گاۋحاردىڭ قاتىسى بار ما, جوق پا دەگەندى ءوز اۋزىنان ەستۋدى ءجون كوردىك.
– استاناعا كەلۋگە ءوزىم دە ۇمتىلدىم, تسيركتىڭ وكىلى بولۋعا كەلىسىم بەردىم. بىراق سودان بەرى ەشقانداي جاڭالىق جوق. وتە وكىنىشتى. تۋعان ەلىمە, جەرىمە دەگەن ساعىنىشىمدى جاسىرا المايمىن. ورايى كەلسە, قالىڭ قازاق جۇرتىنىڭ الدىندا ءالى ونەر كورسەتەمىن, – دەپ گاۋحار جىلى لەبىزىن ءبىلدىرىپ, اڭگىمەمىزدى اياقتادى.
گۇلدانا تالعاتقىزى
