ۇلتتىق اكادەميالىق كىتاپحانادا قازاقستان جازۋشىلار وداعىنىڭ مۇشەسى, بەلگىلى قالامگەر زەينوللا سانىكتىڭ 15 تومدىعى مەن ونىڭ جارى اقىن, ۇستاز ءشامشىبانۋ حامزاقىزىنىڭ 2 تومدىق كىتابىنىڭ تانىستىرىلىمى بولدى.
شەتەلدەگى قازاق ادەبيەتى مەن تاريحىنىڭ كورنەكتى وكىلدەرىنىڭ قالامىنان تۋعان شىعارمالاردىڭ ۇلت رۋحانياتىنىڭ تۇتاستانۋىنا قوسقان ۇلەسى مول. سونداي قابىرعالى جازۋشىنىڭ ءبىرى – زەينوللا سانىك. بۇل كىسى قىتايدىڭ تارباعاتاي ايماعىندا ومىرگە كەلگەن. پەكين قالاسىنداعى ورتالىق جاستار ينستيتۋتىن ءتامامداپ, ەڭبەك جولىن باسپاگەرلىكتەن باستاعان. ۇرىمجىدەگى جاستار باسپاسىندا جاۋاپتى رەداكتور بولىپ قىرىق جىلداي قىزمەت اتقاردى. 1955 جىلدان باستاپ ادەبي زەرتتەۋ جۇمىستارىن جازا باستاعان. وسى كەزدە قىتايدا جۇرگىزىلگەن «مادەني توڭكەرىستىڭ» زاردابىن تارتىپ, اۋىر كۇندەردى باستان كەشتى. سۋرەتكەردىڭ 20-دان استام كىتابى جارىق كورگەن. اتامەكەنگە ورالعاننان كەيىن دە قولىنان قالامى تۇسپەي, «قاراكەرەي قابانباي», «حاس باتىر قابانباي», «تۇعىرىل حان», «دەمەجان باتىر», «حالىق كۇيشىسى قايراقباي», «باسپاي» اتتى ىرگەلى تۋىندىلار جازدى.
جازۋشىنىڭ جارى ءشامشىبانۋ حامزاقىزى دا ولەڭدى قاسيەت تۇتقان اقىن. بۇگىنگە دەيىن شايىردىڭ جەتى جىر جيناعى, ءتورت زەرتتەۋ كىتابى شىققان.
شارا بارىسىندا اكادەميكتەر سەيىت قاسقاباسوۆ, ديحان قامزابەكۇلى, پروفەسسورلار سەرىك نەگيموۆ, قۇنىپيا الپىسباەۆ, دۇكەن ءماسىمحانۇلى, جامبىل ارتىقباەۆ سەكىلدى ازاماتتار ءسوز الىپ, وقىرمانعا جول تارتقان كوپ تومدىقتىڭ قىرى مەن سىرى جايىندا ءسوز ءوربىتىپ, ونىڭ قازاق رۋحانياتىنا قوسىلعان مول ولجا ەكەندىگىن ايتتى.
سۇلتان سەيىت
