جۋىردا استانا حالىقارالىق قارجى ورتالىعىندا (احقو) «قازاق رۋحى» اتاۋىمەن مونۋمەنتالدى كوركەم ونەر تۋىندىلارىنىڭ كورمەسى اشىلدى. تاريحى مەن مادەنيەتى سوناۋ ساق داۋىرىنەن باستاۋ الاتىن حالقىمىزدىڭ بولمىسىن بەينەلەيتىن كورمەگە 12 تاقىرىپقا بولىنگەن توپتامالىق ەڭبەك قويىلعان. ءاربىر كارتينا ءبىر-بىرىمەن ءوزارا بايلانىسقان مونۋمەنتالدى كوركەم تۋىندى. ەڭ باستىسى, مۇنداي بىرەگەي كورمە ۇيىمداستىرۋ احقو-نىڭ مادەني-رۋحاني قۇندىلىقتارعا بەيجاي قارامايتىنىن كورسەتەدى.
توپتاماداعى ءبىرىنشى تۋىندىدا سۋرەتشى قازاقتىڭ ۇلان-بايتاق دالاسىن سۋرەتتەيدى. ەجەلگى تامعالى پەتروگليفتەرىن پروفيل ستيلىندە بەينەلەگەن. ال ەكىنشى كارتينادان اڭشى ايەلدىڭ, ياعني, قازاق ايەلىنىڭ باتىل بولمىسىن بايقايمىز. ءۇشىنشى سۋرەتتەن التىن وردا باتىرىنىڭ بەينەسىن كورسەك, ءتورتىنشى كارتينا قازاق حاندىعىنىڭ نەگىزىن قالاۋشى جانىبەك پەن كەرەي حانداردىڭ بەينەسىن سۋرەتتەيدى. وسىلايشا توپتاماداعى تۋىندىلار ءوزارا سيۋجەتتىك بىرىزدىلىكپەن بايلانىسا كەلە قازاقستاننىڭ الىس-جاقىن ەلدەرمەن ديپلوماتيالىق قارىم-قاتىناسىن كورسەتەتىن «ماڭگى كورشىلەر» اتتى تۋىندىمەن تۇيىندەلەدى.
12 تاقىرىپقا بولىنگەن توپتامالىق كوللەكتسيانى قازاقستاندىق سۋرەتشىگە شەتەلدىك تانىمال ينۆەستور ءارى كوللەكتسيونەر گەيۆين كريتچمار (Gavin Kretzmar) جانە الپەر اكدەنيز (Alper Akdeniz) ارنايى تاپسىرىسپەن جازدىرعان. 12 مونۋمەنتالدى كوركەم تۋىندىلاردا كونە داۋىردەن باستاپ قازاق حاندىعىنىڭ رەسەي جانە قىتايمەن ديپلوماتيالىق قارىم-قاتىناس ورناتقانىنا دەيىن سۋرەتتەلگەن.
«احقو ينۆەستيتسيا, قارجى سالاسىمەن قاتار تىڭ تەندەنتسيالارعا ەرەكشە كوڭىل بولەدى. قازىر جاڭاشىل ەكونوميكا دەگەن جاڭا تۇسىنىك قالىپتاسۋدا. بۇل – زاماناۋي فورمات پەن ۇلتتىق قۇندىلىقتاردىڭ قاتار ءجۇرۋى. كوپتەگەن حالىقارالىق قارجى ورتالىقتارىنان وسىنداي گالەرەيالاردى كورەمىز. مىسالى, دۋباي مەن شانحايداعى ورتالىقتاردا بىرنەشە قاباتقا جايعاسقان كورمە زالدارى بار. بۇل سول ەلدىڭ, حالىقتىڭ مادەنيەتىمەن, تاريحىمەن تانىسۋعا مۇمكىندىك بەرەدى. ءبىزدىڭ دە ماقساتىمىز – ونەرىمىز ارقىلى ەلىمىزدىڭ مىڭجىلدىق تاريحى مەن مادەنيەتىن كورسەتۋ» دەيدى احقو-نىڭ باسقارۋشى ديرەكتورى ايدار قازىباەۆ. باسقارۋشى ديرەكتور احقو-نىڭ اۋماعىندا 100-دەن اسا ەكسپات قىزمەت ەتەتىنىن, ولاردىڭ بوس ۋاقىتىندا قازاقتىڭ سالت-داستۇرىمەن, تاريحىمەن, مادەنيەتىمەن تانىسقىسى كەلەتىنىن, «قازاق رۋحى» كورمەسى سول قاجەتتىلىكتى تولىق قاناعاتتاندىراتىنىن ايتادى.
احقو-نىڭ الاڭىندا بۇعان دەيىن دە بىرنەشە كورمە وتكىزىلدى. بيىل شىلدە ايىندا AIFC Art Week اياسىندا كوللەكتسيونەر-سۋرەتشىلەردىڭ كورمەسى بولدى. وندا قازاقستاندىق سۋرەتشىلەر ءلايلا ماحات پەن باقىتنۇر بۇردەسبەكوۆتىڭ, سونداي-اق رەسەيلىك سۋرەتشىلەردىڭ تۋىندىلارى قويىلدى.
