قازاق ءتىلىن مەڭگەرۋگە باعىتتالعان تەگىن كۋرستار قاراشاعا دەيىن جالعاسادى. مەملەكەتتىك ءتىلدى كەز كەلگەن ادام وقىپ, ۇيرەنۋىنە بولادى دەپ حابارلايدى ەلوردا اكىمدىگىنىڭ رەسمي سايتى.
وقۋدىڭ ءبىرىنشى كەزەڭى ساۋىردە باستالعان بولاتىن. قازىرگى تاڭدا 750 ادام كۋرستى ءتامامدادى. ۇلتتىق ءتىل ورتالىعىنىڭ ديرەكتورى ايجان سۇمعاتوۆا وقۋشىلار دەڭگەيىنە قاراي توپقا بولىنگەنىن ايتتى. «بارلىعى 6 دەڭگەي قاراستىرىلعان. ا1 جانە ا2 – بازالىق دەڭگەي, ب1 جانە ب2 – ورتاشا, س1 جانە س2 – جەتىك مەڭگەرگەندەرگە ارنالعان. دەڭگەي تەست ارقىلى انىقتالادى. سوسىن قالاۋىنا قاراي ارنايى توپقا جازىلۋ باستالادى. ساۋىردەن شىلدەگە دەيىن بىزدە 51 توپ وقىپ كەتتى» دەيدى ورتالىق باسشىسى.
ءار توپ 10-13 ادامنان قۇرالعان. وقۋشىلارعا 12 ۇستاز ءبىلىم بەرەدى. كۋرستىڭ جالپى باعدارلاماسى 8 ايعا لايىقتالعان. سىناقتى ءساتتى تاپسىرعاننان كەيىن سەرتيفيكات بەرىلەدى. ءارى قاراي وقۋدى جالعاستىرعىسى كەلگەندەر كەلەسى كۋرسقا قاتىسا الادى. قازاق ءتىلىن ۇيرەنگىسى كەلەتىندەر مىنا تەلەفون بويىنشا حابارلاسۋىنا بولادى: 8 747 526 28 55, 8 701 390 02 25.
