قازاقستان – جالعىزىم

استانا قالاسى اكىم­دىگىنىڭ قولداۋىمەن «ەكسپو-2017» حالىقارالىق مامانداندىرىلعان كورمەسى جانە استانا كۇنىنە ارنالعان «قازاقستانىم-عاجاپستانىم» اتتى ءمۇشايرا ءوتتى. ءبىز بۇگىن سول جىر دوداسىندا توپ جارعان ءبىر توپ اقىننىڭ ولەڭدەرىن وقىرمان نازارىنا ۇسىنامىز.

قازاقستان
جىرسىڭ عالام,
عالامات نۇرسىڭ دالام,
ەتەك-جەڭىن قاۋسىرىپ
قۋسىرماعان.
… قازاقستان, قارعام-اي, ءانىم ەدىڭ –
قاناتىندا اققۋدىڭ سۋسىلداعان.

ءمولدىر تامشى ىلىنگەن بۇرىندە ەمەن,
كوكجيەككە كوز سالسام كۇنىن كورەم.
… قازاقستان!
قاستەرلى كۇيىم مەنىڭ –
تۇياعىندا ءدۇلدۇلدىڭ دۇبىرلەگەن.

اق تاڭ تۋسا الاشقا ارىس كۇتكەن,
ارناسىنان اسادى اعىس بىتكەن.
قۇبا دالام ويلاسامتىنا قالام
دومبىرانىڭ ىشەگىندەي قاعىس كۇتكەن.

اسىلداردان امانات…تاپتى مەنى,
عاسىرلاردان كۇتكەنىم اق كۇن ەدى.
… قازاقستان – بابامنىڭ اق باتاسى
قازاقستان – انامنىڭ اق تىلەگى.

زامانانىڭ تەربەلسە شىنار باعى,
ۇلىتاۋدىڭ شۋلاماي ۇلارلارى…
قازاقستان – قىزىمنىڭ قىزعالداعى –
قازاقستان – ۇلىمنىڭ ۇلى ارمانى.

قازاقستان!كونەرمەس كوكتەم ەلىم,
وزىڭە ايان,كوگەرىپ كوكتەگەنىم…
قازاقستان – جالعىزىم,جالعىزىما –
جار بولا گور, جاراتقان, –
دەپ كەلەمىن.

شومىلاتىن شۋاققا شوق قاراعاي,
كۇننەن قۋات ىزدەگەن,وتتان اراي,
…قازاقستان – جۇرەگىم,
جۇرەگىمنىڭ –ماڭگىلىككە ءدۇرسىلى توقتاماعاي!
عالىم جايلىباي

استانا
مارتەبەسى ەلىمنىڭ,
كىندىگى بايتاق جەرىمنىڭ,
ايبىنى اسقاق ءتورىمنىڭ,
سەنسىڭ – استانا!

بوستاندىقتىڭ بەسىگى,
بولاشاقتىڭ ەسىگى.
ەلباسىنىڭ شەشىمى,
سەنسىڭ – استانا!

ارمانى وتكەن بابانىڭ,
تاريحى كونە دالانىڭ,
ويلارى ۇلى دانانىڭ,
سەنسىڭ – استانا!

ۇرپاقتىڭ وشپەس جىرىسىڭ,
بەيبىت كۇننىڭ نۇرىسىڭ.
سەنىمەن بىرگە تىنىسىم,
اياۋلى استانا!

بايتەرەگىڭ بويلاسىن,
كەلبەتىڭ كۇندە جايناسىن.
شاتتىعىڭدى تويلاسىن,
حالقىڭ, استانا!

ىقتيار مىرزاقۇلوۆ

استانا
الەمنىڭ كەتكەن سىيىپ بار اسىلى,
جايناپ تۇر Eحرو-نىڭ قالاشىعى.
كورسەتكەن كەرەمەتتىڭ نە ءتۇرلىسىن,
استانا, سەن كوزىمنىڭ قاراشىعى!

بولجايتىن بولاشاقتى ار جاعىنان,
تۋعانسىڭ ەلباسىنىڭ ارمانىنان!
كوركىڭە تاڭداي قاعىپ, كەڭ دۇنيە
جىرلايدى ويدا بۇلبۇل,
تاۋدا قىران.

سان عاسىر ءوزىڭدى اڭساپ كۇتكەن دالا,
كۇن سايىن كورىنەسىڭ تىپتەن جاڭا.
توگەسىڭ باقىت نۇرىن بايتاعىما
جارقىراپ ماڭدايىما بىتكەن قالا.

كورەيىن اجارىڭدى كوز بارىندا,
بوركىمدى اسپانعا اتىپ وزعانىڭدا.
جول تارتقان ماڭگىلىككە ۇلى كوشتىڭ,
تاعدىرى, تىزگىنى دە ءوز قولىڭدا!

قالانعان ءار كىرپىشىڭ قازاق ءۇشىن,
جاس ۇرپاق تاريحىڭدى جازادى شىن.
اتانسا قازاقستان – عاجاپستان,
عاجاپتىڭ ىشىندەگى عاجابىسىڭ!

ارمان شەريزات

ەسىل بويىن جاعالاتا ءۇي تىكتىم…

بىزگە وزگەشە ساۋلە توگىپ جارىق كۇن,
بەسىگىمدە سول ساۋلەگە قانىپپىن.
اقىنىمىن – استاناسى بار ەلدىڭ,
اقىنىمىن – بوستاندىعى بار ۇلتتىڭ.

اسپان استى, جەر ۇستىندە جەلپىنگەن,
بۇل دالانىڭ ەركىن جورتقان بولتىرىگى ەم.

جاستاپ جاتىپ ويانعانمىن
مەن العاش,

ەرتوقىمىن كوشپەندىنىڭ تەر سىڭگەن.

بەيمازا ءتۇن!
ەسىمدى الما, سەن ەندى,
جىلدار كورەر كۇن سيپاعان
توبەمدى.
تۇمسىعىمدى ايعا تىرەپ
العاش مەن,
اتاجۇرتقا قاراپ جازعام ولەڭدى.

باۋرايىڭدا باۋىرىم امان,
كۇن امان,
قازاق ەلى – الپەشتەگەن ۇلى انام!
ىرىمدايمىن, بوساعاما اق توگىپ,
ۇلىم كۇندە جول قاراسا قۋانام.

ەلدىك تاڭى كورىك قوسىپ كوگىمە,
شومىلامىن تىنىشتىقتىڭ
كولىنە.
اسپانىما اق كەپتەرلەر ۇشىرىپ,
قۇشاق-قۇشاق گۇل ەگەمىن جەرىمە.

قازاق جۇرتىن باۋىرىڭا باس,
عالام!
ۇلىڭ مەنمىن, ۇلى كۇرەس باستاعان.
جالعىز ءوزى جاۋعا تيەر جالاڭاش,
قانداي اۋىر ۇرىستاردان
قاشپاعان.

داۋىرلەردەن سىعالاعان عاسىردىڭ,
جانارىنا قاسىرەتىمدى جاسىردىم.
عارىش ءتۇستى كوك تۋىمدى
جامىلىپ,
اتاجۇرتتىڭ الدىنا كەپ
باس ۇردىم.

ادال بولىپ, ازات ەلدىڭ سەرتىنە,
مەن جىرلايمىن,
جىرلاي بەرەم جەلپىنە.
ماجنۇندەيىن ءجۇز اينالام –
استانا!
ەۋروپاڭدى ەكى ورايتىن كوركىڭە!

جاڭا عۇمىر جارقىراعان
سانامدا,
ەركىن رۋحىم تۇسپەس ەندى تالاۋعا.
ەسىل بويىن جاعالاتا ءۇي تىكتىم,
ەكسپو دەپ ەلەڭدەگەن عالامعا.

جەردىڭ بەلىن قايىستىرعان
سالماعى,
سامۇرىق قۇسىم – ايدان ءارى
سامعادى.
ەرتەڭىمە ەكسپو-دان جالعاسقان,
ەلباسىمنىڭ جاتىر ۇلى ارمانى!

ۇلاربەك دالەيۇلى