بۇگىن تاڭعى 7.00-دە باستالعان سايلاۋ ەلىمىزدىڭ بارلىق وڭىرىندە ساعات 21.00-دە اياقتالدى. ال وسك سايلاۋشىلاردىڭ قاتىسۋى تۋرالى قورىتىندى مالىمەتتى ساعات 22.30-دا ۇسىنباق. بۇل تۋرالى ورتالىق سايلاۋ كوميسسياسىنىڭ حاتشىسى باقىت مەلدەشوۆ وسك بريفينگى بارىسىندا مالىمدەدى, دەپ حابارلايدى BNews.kz.
«بۇگىن قر پارلامەنتى ءماجىلىسىنىڭ جانە ءماسليحات دەپۋتاتتارىن سايلاۋ اياقتالدى. قازىر ۋچاسكەلىك سايلاۋ كوميسسيالارىنىڭ مۇشەلەرى سايلاۋشىلاردىڭ داۋىستارىن ساناۋعا كىرىستى. قر سايلاۋ تۋرالى كونستيتۋتسيالىق زاڭنىڭ 43-ءشى بابى, 3-ءشى تارماعانا سايكەس, داۋىستاردى ساناۋ ءاربىر ساياسي پارتيا بويىنشا جانە ءاربىر كانديدات بويىنشا جەكە-جەكە جۇرگىزىلەدى. سايلاۋ ۋچاسكەسىندە داۋىستاردى ساناۋ ۋاقىتى ساناق باستالعاننان 12 ساعاتتان اسپاۋى ءتيىس. باتىس وڭىرلەرىندە, اقتوبە, اتىراۋ, باتىس قازاقستان, ماڭعىستاۋ وبلىستارىندا ۋاقىت ايىرماشىلىعىنا بايلانىستى داۋىس بەرۋ جاڭا عانا اياقتالدى», – دەدى ب.مەلدەشوۆ.
وسك حاتشىسىنىڭ ايتۋىنشا, شەت مەملەكەتتەردە قۇرىلعان سايلاۋ ۋچاسكەلەرىنىڭ كوپشىلىگىندە داۋىس بەرۋ ءالى اياقتالعان جوق. داۋىس بەرۋ 65 ۋچاسكەنىڭ 47-سىندە جالعاسىپ جاتىر. سايلاۋشىلاردىڭ كەلۋ قورىتىندىلارى تۋرالى الدىن الا دەرەكتەردى وسك ساعات 22.30 ۇسىنۋدى جوسپارلاپ وتىر.
astana-akshamy.kz
