ديۋ سولەي تسيركى استانادا! ەندى ءۇش اي بويى استانالىقتار مەن قالا قوناقتارى اتاقتى تسيرك ارتىستەرىنىڭ ونەرىن ەكسكليۋزيۆتى «REFLEKT» شوۋىندا تاماشالايدى. كەشە باستالىپ, 9 قىركۇيەككە دەيىن جالعاساتىن تسيرك نەندەي قىزىق دايىندادى؟ بىرگە بىلەيىك.
كوك ءتۇستى كوستيۋم كيگەن ءبىر توپ ءارتىس ءتورتبۇرىش تارىزدەس شىنىدا كۇردەلى اكروباتتىق ءنومىردى دايىندادى. ولاردىڭ كيىمى قازاقتىڭ ويۋ-ورنەگىمەن اشەكەيلەندى. بۇل كەزدەيسوقتىق ەمەس. «Reflekt» شوۋى – قازاقى ناقىشتا, قازاق جۇرتى ءۇشىن ارنايى قويىلىپ وتىر.
ولاردان كەيىن ساحناعا دوڭگەلەكتە شىر كوبەلەك اينالىپ جۇرگەن ءارتىس شىقتى. ايتا كەتەيىك, ءار قويىلىمداعى مۋزىكادا قازاقتىڭ ءداستۇرلى اۋەنىن, قوڭىر اۋەزىن ەستيسىزدەر. قازاقشا كيىنگەن ساربازدار اتتى تىزگىندەپ, تسيرك تورىنە شىقتى. ات دەگەندە, كادىمگى ات ەمەس, اعاشتان جاسالعان ونەر تۋىندىسى. سەبەبى, ديۋ سولەي تسيركىندە جانۋار جوق ەكەندىگىن ۇمىتپاڭىزدار.
ارتىستەردىڭ شەبەرلىگى سونداي, ءبىر سەكۋند تا جالىقتىرمايدى, كورەرمەن نازارىن ۇستاپ وتىرادى. تال شىبىقتاي مايىسقان اكروباتتاردىڭ ءبيىن تاماشالاپ وتىرعان ساتتە, كۇتپەگەن جەردەن باسقا ءبىر ءارتىس جارق ەتىپ شىعا كەلەدى. سودان بولار, 75 مينۋتقا سوزىلعان قويىلىم 7 مينۋتتاي ءوتتى دە كەتتى.
ەڭ كۇردەلى نومىرلەردىڭ ءبىرى – قىز بەن جىگىتتىڭ ۇلكەن شار شەڭبەرىندە اينالىپ ونەر كورسەتۋى دەر ەم. ساحناداعى ءار كەيىپكەر قوزعالىستا بولىپ, پانتوميما ارقىلى وزدەرىنە تاڭدالعان بەينەلەرىن جەتكىزە ءبىلدى. ءارى بۇل ويىندى جانداندىرا ءتۇستى.
كەش بارىسىندا ءانشى قىز سيقىرلى داۋسىن سوزىپ, عاجايىپ الەمگە جەتەلەگەندەي بولدى. ءبىر كەزدە جارىق ءوشىپ, زال تىپ-تيپىل بولدى. الاۋلاتىپ, جالاۋلاتىپ بايكەر زۋ-زۋ ەتىپ ءوتىپ شىقتى. ەكسپو كورمەسىنىڭ تاقىرىبىنا ساي, موتوتسيكلدەردىڭ بارلىعى ەلەكترلى بولدى. تاعى ءبىر اكروبات قوس دوڭگەلەكپەن ارقان جىپتە سەكىرىپ, كۇردەلى تريۋكتەر جاسادى. ەڭ قيىنى وسى شىعار دەپ وتىرعان كەزدە, وعان اۋەدە قالقىپ ءجۇرىپ, توڭكەرىلگەن ۆەلوسيپەدتى ايداعان ءارتىس قوسىلدى. جەرگە تۇسكەن ول يەگىنىڭ ۇشىنا ۇزىن تاياقتى قويىپ, گيتارانىڭ قۇلاعىندا وينادى.
سايقىمازاقسىز تسيرك ەشقايدا وتپەيتىن شىعار. ديۋ سولەي تسيركىندە دە كىشكەنتاي كولىكتى ايداپ ءبىر كلوۋن كەلدى. بۇل جەردە فرانتسۋزداردىڭ كلاسسيكالىق ونەرىن تاماشالادىق. اۋديتوريامەن بايلانىس ورناتىپ, حالىقتىڭ كوڭىلىن تاپتى. شىنىمەن دە, ەزۋىڭدى جيماي وتىراسىڭ.
ۇيىمداستىرۋشىلار ءاۋ باستان وتتى شوۋ بولاتىنىن ايتىپ قالعان ەدى. ايتىلعان ءسوز جەردە قالمادى. وتقا ورانعان سامۇرىق قۇسى ۇشىپ كەلىپ, باستى كەيىپكەرگە وت ۇشقىنىن الا كەلدى. ال ول بولسا, جەرگە جاتىپ الىپ, وتپەن الىستى. ارتىستەر وتتى ءارى لاقتىرىپ, بەرى لاقتىرىپ, قويىلىمنان لازەرلىك شوۋ جاسادى.
تسيرك تۋرالى قالىپتاسقان ۇعىمدى تۇبەگەيلى وزگەرتكىڭىز كەلسە, مىندەتتى تۇردە ديۋ سولەيگە كەلىڭىز.
گۇلدانا تالعاتقىزى
