قازىر Birgemiz اتتى ەرىكتىلەردىڭ رەسپۋبليكالىق فرونت-كەڭسەسىندە «جازعى ۆولونتەرلەر مەكتەبى» جوباسى ءوتىپ جاتىر. وعان ەلىمىزدىڭ ءارتۇرلى وڭىرىندەگى ۆولونتەرلىك قوزعالىستاردىڭ كوشباسشىلارى قاتىسۋدا, دەپ حابارلايدى ەلوردا ينفو.
وندا جوبا قاتىسۋشىلارى تۇلعالىق جانە كوشباسشىلىق ماشىقتارىن دامىتىپ, تاجىريبەلى مامانداردىڭ جەتەكشىلىگىمەن ۆولونتەرلىك سالاسىنداعى جوبالىق مەنەدجمەنتتىڭ نەگىزدەرىن ۇيرەنۋدە. ۇيىمداستىرۋشىلاردىڭ ايتۋىنشا, ساباقتار Zoom پلاتفورماسىندا ونلاين فورماتتا جۇرگىزىلەدى.
ۆولونتەرلىك سالاسىندا ءتيىمدى جۇمىس اتقارىپ كەلە جاتقان ۇيىمداردىڭ ءبىرى «ترەنەرلەر مەكتەبى» دەپ اتالادى. جۋىردا اشىلعان بۇل مەكەمە ۆولونتەرلەرمەن جۇمىس ىستەيتىن جانە الەۋمەتتىك باعدارلامالاردى جۇزەگە اسىرۋمەن اينالىساتىن مامانداردىڭ مىقتى كومانداسىن قۇرۋعا باعىتتالعان, وندا قازاقستاننىڭ تۇكپىر-تۇكپىرىنەن ءارتۇرلى ۇكىمەتتىك ەمەس ۇيىمداردىڭ وكىلدەرى وقىتىلادى. ەلىمىزدەگى العاشقى ترەنەرلەر مەكتەبىندە جوبالىق مەنەدجمەنت, فاندرايزينگ, قارجىلىق اۋديت, جۋرناليستيكا جانە ەلەكتروندى باق, PR, سونداي-اق پسيحولوگيا سالاسىندا تاجىريبەسى مول وتاندىق جانە شەتەلدىك ماماندار ساباق بەرەدى.
پاندەميا ۋاقىتى حالىقتىڭ دەنساۋلىعى ەڭ باستى بايلىق ەكەنىن كورسەتتى. سوندىقتان مەديتسينا سالاسىندا دا ۆولونتەرلىك قىزمەتپەن اينالىساتىن ازاماتتار كوپتەپ كەرەك ەكەنى داۋسىز. بۇل تۇرعىدا بىلتىر شىمكەنتتە جۇمىسىن باستاعان «مەديتسينالىق ۆولونتەرلەر مەكتەبى» اتتى تۇڭعىش الەۋمەتتىك جوبانى ايتپاي كەتۋگە بولماس. «Qolda 2.0» توتەنشە كومەك بەرۋ باعدارلاماسى اياسىندا قۇرىلعان بۇل مەكتەپتە مەديتسينالىق ۇيىمدارعا ۆولونتەرلىك كومەك كورسەتۋ, حالىقتىڭ مەديتسينالىق ساۋاتىن ارتتىرۋعا كومەكتەسۋ, العاشقى مەديتسينالىق كومەك كورسەتۋگە ۇيرەتۋ, بۇقارا اراسىندا قان دونورلىعىن ناسيحاتتاۋ, COVID-19-دىڭ الدىن الۋ جانە دەنساۋلىق نىعايتۋ باعىتتارى بويىنشا ءدارىس وتكىزىلەدى. بىلتىردان بەرى جەر-جەردەگى مەديتسينالىق ۆولونتەرلەر مەكتەبىندە وقىتىلىپ شىققان ەرىكتىلەر ارتىق جۇكتەمەمەن جۇمىس ىستەپ جاتقان اۋرۋحانالارعا كومەكتەسسە, قازىرگى تاڭدا كوروناۆيرۋسقا قارسى ەگۋ پۋنكتەرىندە قولعابىس جاساپ ءجۇر.
بيىلدان باستاپ ەلىمىزدە ۆولونتەرلەردى توتەنشە جاعداي كەزىندەگى داعدىلارعا ۇيرەتەتىن مەكتەپ وز جۇمىسىن باستايدى. توتەنشە جاعدايلار مينيسترلىگى مەن «ۇلتتىق ۆولونتەرلىك جەلىسى» بىرلەسە مۇرىندىق بولعان بۇل جوبا شەڭبەرىندە توتەنشە جاعدايلاردىڭ الدىن الۋ جانە ولاردىڭ سالدارىن جويۋ, ىزدەستىرۋ ءىس-شارالارى مەن زارداپ شەككەندەرگە العاشقى مەديتسينالىق جانە پسيحولوگيالىق كومەك كورسەتۋ بويىنشا ۆولونتەر-شاكىرتتەر دايارلانادى.
نۇر-سۇلتاندا ۆولونتەر بولام دەسەڭىز…
جوعارىدا اتالعان رەسپۋبليكالىق دەڭگەيدەگى ۆولونتەرلەر مەكتەپتەرىنەن بولەك, ءار قالادا ۆولونتەرلىكپەن اينالىساتىن ۇيىمدار جانىندا دا كىشىگىرىم مەكتەپتەر قۇرىلعان. ماسەلەن, ەلوردادا بىرنەشە جىلدان بەرى الەۋمەتتىك, دەنساۋلىق ساقتاۋ, اعارتۋشىلىق, قايىرىمدىلىق سالالارى بويىنشا كوڭىل تولتىرارلىق ىستەر اتقارىپ كەلە جاتقان بىرنەشە ۇيىم بار. ماسەلەن, الەۋمەتتىك وسال توپتاردى ازىق-تۇلىكپەن قامتاماسىز ەتۋ, حالىقتى كوروناۆيرۋس جايلى اقپاراتپەن قۇلاقتاندىرۋ, قالانى قوقىستان تازارتۋ سەكىلدى يگى ىستەردىڭ ۇيىتقىسى بولىپ جۇرگەن ۆولونتەرلەردىڭ ءبىر توبىن «استانا جاستارى» جاستار رەسۋرستىق ورتالىعى وقىتىپ, ۇيرەتەدى.
ودان بولەك, بالالار ۇيىندە تاربيەلەنەتىندەردى الەۋمەتتىك بەيىمدەۋ بويىنشا «Best For Kids», مۇمكىندىكتەرى شەكتەۋلى بالالاردى وڭالتۋ بويىنشا «وكەان-ارت» ارت-تەراپيا شىعارماشىلىق ورتالىعى, ەستۋ قابىلەتى شەكتەۋلى ادامداردى قولداۋ بويىنشا «ءۇنسىز الەم/بەزمولۆنىي مير», ەرەكشە قاجەتتىلىكتەرى بار ادامداردىڭ قۇقىقتارىن قورعاۋ جانە مۇددەلەرىن ىلگەرىلەتۋ بويىنشا «دوس» تاۋەلسىز ءومىر ورتالىعى, قايىرىمدىلىقتى ناسيحاتتاۋ بويىنشا «نۇر الەم قازاقستان» قوعامدىق قايىرىمدىلىق قورى سەكىلدى بىرقاتار ۇيىم جەمىستى جۇمىس اتقارىپ كەلەدى.
