تەلمان ەلدى مەكەنىندە فۋتبول الاڭى مەن بالالار الاڭى بار ۇلكەن اۋلا پايدا بولدى. كۇن سالقىنداعاننان باستاپ قوعامدىق كەڭىستىك كەڭەيتىلەدى. 
– تەلمان ەلدى مەكەنىنىڭ تۇرعىندارى كەزدەسۋ بارىسىندا اۋداندا اباتتاندىرىلعان اۋلالاردىڭ جوق ەكەندىگىن ايتقان ەدى. بيىل فۋتبولعا ارنالعان الاڭ مەن بالالار الاڭقايى بار ۇلكەن الاڭ سالىندى. قوعامدىق كەڭىستىكتىڭ اۋماعىن كەڭەيتىپ, كونكيمەن سىرعاناۋ ءۇشىن مۇز الاڭىن اشامىز. بۇل جوبا «Samruk-Kazyna Trust» الەۋمەتتىك جوبالاردى دامىتۋ قورىمەن بىرلەسە جۇزەگە اسىرىلدى. مۇنداي الاڭدار پوتانين, جۇرگەنوۆ جانە كراۆتسوۆ كوشەلەرىندە دە اشىلدى. قالا بويىنشا بارلىعى 150 اۋلا مەن 50 قوعامدىق كەڭىستىك اباتتاندىرىلدى, – دەپ جازدى نۇر-سۇلتان قالاسىنىڭ اكىمى ءوزىنىڭ ينستاگرامداعى پاراقشاسىندا.
سونداي-اق قالا اكىمى № 27 كوشەنىڭ بويىنداعى تۇرعىنداردىڭ قالاعا ءوتۋ جولىن ايتارلىقتاي قىسقارتۋ ءۇشىن Nova city اۋماعىندا جول قۇرىلىسىن جۇرگىزىپ جاتقانىن جەتكىزدى.
