استانا قالاسى اكىمدىگىنىڭ جانىنداعى ۇكىمەتتىك ەمەس ۇيىمدارمەن ىنتىماقتاستىق جانە ءوزارا قارىم-قاتىناس جونىندەگى كونسۋلتاتيۆتىك كەڭەس وتىرىسى ءوتىپ, اتالعان ۇيىمداردىڭ جاستار ساياساتىن جۇزەگە اسىرۋدا مەملەكەتتىك ورگاندارمەن بايلانىسى, «ەكسپو-2017» حالىقارالىق كورمەسىن ۇيىمداستىرۋعا قاتىسۋى جانە وعان دايىندىعى پىسىقتالدى. ءماجىلىستى استانا قالاسى ىشكى ساياسات باسقارماسىنىڭ باسشىسى بولات تىلەپوۆ جۇرگىزىپ وتىردى.
كۇن تارتىبىنە قويىلعان العاشقى سۇراققا استانا قالاسى جاستار ساياساتى ماسەلەلەرى باسقارماسىنىڭ ءبولىم باسشىسى ايدانا قالدىبەكوۆا جاۋاپ بەردى. ونىڭ ايتۋىنشا, بۇگىنگى تاڭدا ەلورداداعى جاستاردىڭ جالپى سانى – 253 مىڭ 683 ادام بولىپ وتىر. بۇل استانا حالقىنىڭ 31 پايىزىن قۇرايدى. وسىلاردىڭ 55 مىڭى, ياعني 22 پايىزى قوعامدىق ۇيىمداردىڭ جۇمىسىنا تارتىلعان. بىلتىردان بەرى جاستار 100-دەن اسا ءىس-شاراعا قاتىسقان. سولاردىڭ ىشىندە دەلفي ويىندارى, «ستۋدەنت كوكتەمى» فەستيۆالى, قۇقىقبۇزۋشىلىقتىڭ الدىن الۋ, جەمقورلىققا قارسى اكتسيالار, ستۋدەنتتىك قۇرىلىس جاساقتارى مەن «جاسىل ەل» شتابىنىڭ جۇمىستارى بار. بۇل شارالارعا بيىل جاستار اراسىندا يننوۆاتسيالىق يدەيالار مەن جوبالار كونكۋرسى, ەتنومادەني بىرلەستىكتەردىڭ جاستار قاناتتارى فەستيۆالى قوسىلدى.
وتكەن جىلى ۇەۇ جانە جاستاردىڭ قاتىسۋىمەن ءۇش الەۋمەتتىك زەرتتەۋ جۇرگىزىلگەن. مەملەكەتتىك جاستار ساياساتىنا جاستاردىڭ كوزقاراسىن, ولاردى مازالايتىن ماسەلەلەردى انىقتاۋ ماقساتىندا 7,5 مىڭ جاستان ساۋالداما الىندى. زەرتتەۋلەر ءالى دە جالعاسۋدا. سونىڭ اۋقىمدىسى – استانا كاسىپورىندارىنداعى سۇرانىسقا يە جانە سۇرانىسى جوق ماماندىقتاردى انىقتاۋعا قاتىستى بولىپ وتىر.
جالپى, اتالمىش باسقارما اعىمداعى جىلى ۇەۇ-مەن بىرگە 6 جوبانى جۇزەگە اسىرعان ەكەن. جىل سوڭىنا دەيىن تاعى 8 جوبانى اياقتاۋ جوسپارلانۋدا.
الايدا, جاستار ساياساتى ماسەلەلەرى باسقارماسىنىڭ جۇمىسىندا جەتىسپەيتىن تۇستار دا بار ەكەن. «استانا قالاسىنداعى اۋعانستان سوعىسى مۇگەدەكتەرى مەن ارداگەرلەرى وداعى» قوعامدىق بىرلەستىگى مەن باسقارما اراسىندا بايلانىس جوق بولىپ شىقتى. ۇيىم توراعاسى سەرىك كەنجەبەكوۆ باسقارمامەن بىرىككەن شارالاردى وتكىزۋگە نيەتتى ەكەنىن جەتكىزسە, ا.قالدىبەكوۆا ودان قاشپايتىندىقتارىن ايتتى. مەكتەپ وقۋشىلارىن اۋلا كلۋبتارىنا تارتۋ, ەڭبەككەر جاستارمەن جۇمىس جايى دا قوزعالدى.
«فورۋم نكو استانى» زاڭدى تۇلعالار بىرلەستىگىنىڭ پرەزيدەنتى بايان احمەتجانوۆانىڭ پىكىرىنشە, «ەكسپو-2017» حالىقارالىق كورمەسىن ۇيىمداستىرۋعا ەل, حالىق بولىپ جۇمىلۋعا ءتيىستىمىز. ەڭ بىرىنشىدەن, كورمەگە كەلەتىن شەتەلدىك قوناقتارعا كورسەتە الاتىنداي قازاقستاندا تۇراتىن حالىقتاردىڭ مادەنيەتى مەن سالت-داستۇرلەرىن ءبىلۋ كەرەكپىز. «قازاقستان حالقى اسسامبلەياسى مەن ەتنومادەني بىرلەستىكتەر ۇلتتار مادەنيەتى مەن سالت-داستۇرلەرىن ناسيحاتتاۋدى ماڭدىتپاي وتىر. ءوز ىشىندە بىردەڭە ىستەپ جاتقان شىعار, بىراق جالپى جۇرت ونى كورمەي وتىر» دەدى ول بۇل جونىندە. سونداي-اق, «ەكسپو-2017» ازاماتتىق قوعام كەڭەسىنىڭ جۇمىس توبىن قۇرۋدى ۇسىندى.
«ۇلاعات» مادەنيەت جانە دامۋ قورى «ەكسپو-2017» كورمەسىنە ارنالعان الەۋمەتتىك جوبانى جاساپ شىعارىپتى. «حالىقارالىق دەڭگەيدە قىزمەت كورسەتۋشىنىڭ تىلدىك-كوگنيتيۆتىك قۇزىرەتتىلىگى» اتالاتىن بۇل جوبامەن قور قۇرىلتايشىسى قاماجان جۇماقاسوۆا تانىستىردى. ونىڭ نەگىزىنە «ءۇش تۇعىرلى ءتىل» باعدارلاماسى الىنعان. ول 2014 جىلدىڭ ەكىنشى جارتىسى مەن 2016 جىلدىڭ ارالىعىندا ىسكە اسىرىلماق. الايدا, الدىمەن ءتىل ماماندارىنىڭ ساراپتاماسىنان وتكىزىلمەك.
امانعالي شميتۇلى
