كەيىنگى كەزدە قوعامدا قارجى پيراميدالارى تۋرالى ءجيى ەستيتىن بولدىق. بۇل قازىر ءتيىمدى ينۆەستيتسيالاردى يميتاتسيالايتىن الاياقتىقتىڭ ەڭ استىرتىن ءتۇرى بولىپ وتىر. جىل سايىن مىڭداعان ادام وسىنداي حالىقتىڭ ۇستىنەن كۇن كورەتىندەردىڭ «قۇرىعىنا» ءىلىنىپ, بار جيعان-تەرگەندەرىنەن ايىرىلىپ جاتادى.
وتكەن جىلى لومباردتار جەلەۋىمەن وسىنداي الاياقتار بۇكىل ەل بويىنشا مىڭنان اسا ازاماتتىڭ مۇلكى مەن اقشاسىن الداپ-ارباپ الۋعا تىرىستى. شىعىن بىرنەشە ميلليارد تەڭگەنىڭ ۇستىنە شىقتى.
«قانشاما ۇگىت-ناسيحات جۇمىستارى جۇرگىزىلسە دە, قايتا-قايتا اۋىزدارى كۇيسە دە نەگە ادامدار وسى ارباۋشىلاردىڭ قاقپانىنا ءتۇسىپ قالا بەرەدى؟» دەگەن زاڭدى سۇراق تۋىندايدى. بىرىنشىدەن, بۇل جەردە ونداي قۇرىلىم قۇرعان ادامدار پسيحولوگيالىق جاعىنان مىقتى دايىندالعان, ادامدارمەن سويلەسە الاتىن, ولاردىڭ «جاندى جەرلەرىن» بىلەتىن ينەنىڭ كوزىنەن وتكەن جىلپوس بولىپ كەلەدى. ەكىنشىدەن, ءبىزدىڭ ازاماتتاردىڭ قارجىلىق ساۋاتتىلىق دەڭگەيى تومەن. ۇشىنشىدەن, ولار ۇنەمى تابىسى تومەن, سونىمەن بىرگە سەنگىش ادامداردى ىزدەيدى. مىنە, وسىنداي مۇمكىندىكتە ولار ۇنەمى تابىسقا جەتىپ, كوزدەگەن ماقساتتارىن جۇزەگە اسىرىپ وتىرادى.
ەندى قارجى پيراميداسىنىڭ بۇگىنگى كۇنى كەزدەسىپ وتىرعان تۇرىنە توقتالايىق.
ەڭ ءبىرىنشى, كوپدەڭگەيلى پيراميدالار, جەلىلىك ماركەتينگ قاعيداتى ويلاستىرىلعان پيراميدالار, مەسسەندجەرلەردە شاقىرۋ جىبەرۋ ارقىلى بەلگىلى ءبىر سىزبانى پايدالاناتىن پيراميدالار, ەكسكليۋزيۆتى كلۋبقا قاتىسۋعا (مۇشەلىككە) شاقىرىپ, ۋادەنى ءۇيىپ-توگەتىن پيراميدالار.
بۇلاردىڭ بارلىعى دا ۇستەمە اقشامەن قىزىقتىرىپ, ۋادەگە قارىق قىلادى.
نەگىزى ءاربىر پيراميدا – باستالۋ, ءوسۋ, داعدارىس, قۇلدىراۋ سياقتى ءومىردىڭ ءتورت كەزەڭىنەن وتەدى. «مىنەكي, ءبىز جاقسى باستاما الدىق, ءوسۋ-وركەندەۋ ۇستىندەمىز. اقشا تابۋعا مۇمكىندىك مول» دەپ سەندىرەدى. بىراق ءىس جۇزىندە اقشا تابىلمايدى, بىرىنىكىن الىپ, ەكىنشىگە بەرەدى.
پيراميدانىڭ ەڭ قۇيتىرقىلىعى – كومپانيا ناقتى ەكونوميكالىق قىزمەت جۇرگىزبەيدى, تاۋارلىق, نەسيەلىك, تۋريستىك, قۇرىلىس كومپانيالارى رەتىندە جاسىرىلادى.
ەكىنشى بەلگىسى – مۇنداي جوبالاردىڭ ماتەريالدىق-قۇقىقتىق بازاسى جوق, ياعني مۇنداي كومپانيالار, ادەتتە, قايتادان قۇرىلعان, قارجىلىق ەسەپتىلىككە يە ەمەس, كەلىسىمدەر جاسامايدى نەمەسە كەلىسىمدەر ۇيىمداستىرۋشىلاردىڭ پايداسىنا جاسالادى جانە زاڭناماعا سايكەس كەلمەيدى.
ءۇشىنشى بەلگىسى – الەۋمەتتىك جەلىلەرگە ءۇستى-ۇستىنە بەلسەندى تۇردە جارناما بەرە بەرەدى.
ءتورتىنشى بەلگىسى – پيراميدانىڭ العاشقى سالىمشىلارىنا پيراميدا تۋرالى دوستارىنا حابارلاۋ ءۇشىن العاشقى تولەمدەر جاسالادى. الەۋمەتتىك جەلىلەردە جاقسى پىكىرلەر ۇيىمداستىراتىن جالدامالى اگەنتتەر دە جۇمىس ىستەيدى.
بەلگىسىز ءبىر ۇيىمدار ءۇستى-ۇستىنە جارناما بەرىپ, تەز بايىپ كەتۋگە ۋادە ەتىپ, وزدەرىن بەلسەندى ناسيحاتتايتىن بولسا, ونداي ۇيىمنان وتە ساق بولۋ كەرەك.
ەگەر سىزگە تانىسىڭىز, كورشىڭىز, باسقا دا ادامدار ءبىر ساتتىك پايدا تۋرالى اڭگىمە ايتاتىن بولسا, ساقتانعان ءجون. ويتكەنى ولاردىڭ ارقايسىسى پيراميداعا كىرىپ, ۇلكەن تاۋەكەلدەردى كوتەرىپ ءجۇرۋى مۇمكىن.
ال ەندى وسى قارجى پيراميداسىنىڭ ارباۋىنا ىلىكپەس ءۇشىن نەنى ءبىلۋ كەرەك؟
ەڭ اۋەلى سول كومپانيانى زاڭدى قارجى ۇيىمدارىنىڭ تىزىلىمدەرىنەن ىزدەپ كورىڭىز. ينتەرنەتتەگى پىكىرلەردى وقىڭىز. جالعان ماداقتاۋلار كوپ بولۋى مۇمكىن. قۇجاتتاردى قاراپ شىعىڭىز. شارتتا, ۇيىمنىڭ سايتىندا, بانك پەن سالىق ورگاندارىنىڭ تىزىلىمدەرىندە كورسەتىلگەن كومپانيانىڭ تولىق اتاۋى مەن دەرەكتەمەلەرىن تەكسەرىڭىز. شەشىم قابىلداۋعا اسىقپاڭىز. مەرزىمى شەكتەۋلى اكتسيا, شارتقا تەز قول قويۋ جانە اقشا سالۋ قاجەتتىلىگى تۋرالى سەندىرۋلەرگە كونبەڭىز. قاجەت بولسا, ادۆوكاتپەن كەڭەسىڭىز.
ازاماتتاردى مۇنداي قاۋىپتەن ەرتەرەك حاباردار ەتۋ زارداپ شەگۋشىلەردىڭ سانىن ازايتۋعا مۇمكىندىك بەرەدى.
قارجىلىق (ينۆەستيتسيالىق) پيراميدا قۇرعانى جانە وعان باسشىلىق جاساعانى ءۇشىن (قازاقستان رەسپۋبليكاسى قىلمىستىق كودەكسىنىڭ 217-بابىنا سايكەس) قىلمىستىق جاۋاپكەرشىلىك;
قارجىلىق (ينۆەستيتسيالىق) پيراميدانىڭ قىزمەتiن جارنامالاعانى, تاراتقان جانە جاريالاعانى ءۇشىن قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 150-بابىنا سايكەس اكىمشىلىك جاۋاپكەرشىلىك جۇكتەلەدى.
ا. شامعانوۆا,
قازاقستان رەسپۋبليكاسى باس پروكۋراتۋراسىنىڭ نۇر-سۇلتان قالاسى بويىنشا قىلمىستىق سالاداعى قۇقىقتىق اقپاراتتى قالىپتاستىرۋ ءبولىمىنىڭ پروكۋرورى
