نۇر-سۇلتان قالاسىنداعى ارداگەرلەر ورتالىعىنىڭ ءماجىلىس زالىندا قالالىق ارداگەرلەر كەڭەسىنىڭ پلەنۋمى ءوتتى. باسقوسۋدا 2021 جىلدىڭ قورىتىندىلارى جانە مەملەكەت باسشىسى قاسىم-جومارت توقاەۆتىڭ «جاڭا قازاقستان: جاڭارۋ مەن جاڭعىرۋ جولى» اتتى جولداۋىنا وراي اتقارىلاتىن ءىس-شارالار تالقىلاندى. جيىنعا «ارداگەرلەر ۇيىمى» رقب ورتالىق كەڭەسىنىڭ توراعاسى باقتىقوجا ىزمۇحامبەتوۆ, نۇر-سۇلتان قالاسى ىشكى ساياسات باسقارماسىنىڭ باسشىسى داۋرەن بابامۇراتوۆ قاتىسىپ, ءسوز سويلەدى.
پلەنۋمنىڭ جۇمىسىن اشىپ, بايانداما جاساعان قالالىق ارداگەرلەر كەڭەسىنىڭ توراعاسى سانسىزباي ەسىلوۆ ۇيىمنىڭ 30 جىلدىعى اياسىندا اتقارىلعان ءىس-شارالارعا توقتالدى. پرەزيدەنت جولداۋىنىڭ نەگىزگى باعىتتارىن تىلگە تيەك ەتكەن سپيكەر ارداگەرلەر قاۋىمداستىعىنىڭ الدىندا تۇرعان مىندەتتەرگە ەكپىن ءتۇسىردى. «قالانىڭ ارداگەرلەر قاۋىمىنىڭ الدىندا تۇرعان ابىرويلى مىندەتتىڭ ءبىرى – جولداۋدىڭ باعىتتارىن, جاڭالىعىن ءار زەينەتكەرگە جەتكىزۋ. ءبىز قالا ارداگەرلەرى, «جاڭا قازاقستاندى» قۇرۋعا قوعامدى جاڭارتۋعا باعىت العان پرەزيدەنتتىڭ ساياساتىن تولىق قولدايمىز!» دەدى سانسىزباي ەسىلوۆ.
جىل سايىن قالا بيۋدجەتىنەن زەينەتكەرلەرگە بىرجولعى تولەمدەر تولەنەدى. الەۋمەتتىك جاعىنان ءالسىز ازاماتتاردى قولداۋ – ەلوردا اكىمدىگىنىڭ باسىمدىق بەرىپ وتىرعان ساياساتى. بيىلدان باستاپ حالىقتىڭ بەلگىلى ءبىر ساناتتارىنا تولەنەتىن تۇرعىن ءۇي جاردەماقىسى 10 000 تەڭگەدەن 18 000 تەڭگەگە دەيىن ءوستى. بۇل كومەك زەينەتكەرلەرگە, ەرەكشە قاجەتتىلىگى بار بالالاردى, مۇگەدەكتەردى تاربيەلەپ وتىرعان وتباسىلارعا, تولىق ەمەس وتباسىلارعا كورسەتىلەدى. بايانداماشى وتكەن جىلدىڭ ەلەۋلى وقيعاسى رەتىندە ەلوردا اكىمى التاي كولگىنوۆتىڭ قاتىسۋىمەن ەسىل اۋدانىنداعى ارداگەرلەر ورتالىعىنىڭ (دوستىق ك-ءسى, 13 ءۇي) اشىلۋىن اتاپ ءوتتى. بۇل جەردە زەينەتكەرلەردىڭ كۇندەلىكتى تۇرمىسىنا قاجەتتى بارلىق جاعداي جاسالعان: ءار ادامنىڭ قىزىعۋشىلىعىنا ارنالعان ۇيىرمەلەر, سپورتتىق جابدىقتار, مۋزىكالىق اسپاپتار بار, كومپيۋتەردە ساۋات اشۋ جانە اعىلشىن ءتىلى كۋرستارى جۇمىس ىستەيدى. مۇنداي ورتالىقتار قالانىڭ بارلىق اۋداندارىندا بار.
سانسىزباي ەسىلوۆ جالعىزباستى جانە ماتەريالدىق-رۋحاني كومەككە ءزارۋ ارداگەرلەرگە جاردەم جاساۋ ەرەكشە باقىلاۋداعى ماسەلە ەكەنىن قاداپ ايتتى. سونداي-اق ول ارداگەرلەر ۇيىمدارىنىڭ قىزمەتىندەگى كۇرمەۋى شەشىلمەگەن ماسەلەلەردى اشىق ايتتى. ماسەلەن, قالاداعى زەينەتكەرلەردىڭ باستاۋىش ۇيىمدارمەن قامتىلۋى 54 پايىزدى قۇرايدى, دەمەك 50 مىڭنان استام ادام نازار مەن قولداۋسىز قالدى دەگەن ءسوز. «ىندەتتىڭ جانە وزگە دە سىن-قاتەرلەردىڭ اسەرىنەن بولعان ينفلياتسيا جىلدام وسۋدە. وسىعان وراي, رەسپۋبليكالىق جانە جەرگىلىكتى اتقارۋشى ورگاندارعا تىل ەڭبەككەرلەرىنە, الەۋمەتتىك ءال-اۋقاتى تومەن ازاماتتارعا, جالعىزباستى زەينەتكەرلەرگە كوممۋنالدىق تولەمدەر, ءدارى-دارمەك, ازىق-تۇلىك بويىنشا كورسەتىلەتىن جەڭىلدىكتەردىڭ كولەمىن كوتەرۋ تۋرالى ۇسىنىس ەنگىزەمىز. زاڭدىق نەگىزدە تىل ەڭبەككەرلەرىنىڭ مارتەبەسىن ۇلى وتان سوعىسىنا قاتىسۋشىلار مەن مۇگەدەكتەردىڭ زەينەتاقىسى مەن جەڭىلدىكتەرى كولەمىنە تەڭەستىرۋدى سۇرايمىز» دەدى بايانداماشى.
پلەنۋمنىڭ جۇمىسى بارىسىندا پرەزيدەنت جولداۋىنىڭ نەگىزگى باعىتتارى تالقىلانىپ, كوپتەگەن باستامالار مەن ۇسىنىستار ايتىلدى. ءماجىلىس سوڭىندا ارنايى قاۋلى قابىلدانىپ, اعىمداعى ۇيىمداستىرۋشىلىق جۇمىستار ناقتىلاندى.
