استانادا پاۆلودار مەن جامبىل وبلىستارىنىڭ مادەني كۇندەرى وتەدى. قوس ءوڭىردىڭ اۋىل شارۋاشىلىعى جارمەڭكەسى ادەتتەگىدەي سەنبى, جەكسەنبى كۇندەرى وتەدى.
جارمەڭكەگە جامبىل وبلىسىنان جالپى قۇنى 300 ملن تەڭگەنىڭ 315 توننا ءونىمى جەتەدى. ەلوردا جۇرتىنا ساپالى, ەكولوگيالىق تازا جانە پايدالى ءونىمنىڭ 30 ءتۇرى ۇسىنىلادى. ازىق-تۇلىك ونىمدەرى بازارداعى باعادان 8-15% تومەن ساتىلادى. جارمەڭكە قالالىق اكىمدىك الدىنداعى الاڭدا وتەدى. «قازاقستاندا جاسالعان» اكتسيا اياسىندا اۋىل شارۋاشىلىق جانە وندىرىستىك كورمە ۇيىمداستىرىلادى.
بۇعان قوسا, پاۆلودارلىقتاردىڭ دا بازارلىعى كەلەدى. 24 جانە 25 قىركۇيەكتە «حانشاتىر» ساۋدا, ويىن-ساۋىق ورتالىعىنىڭ جانىندا وتەتىن جارمەڭكەدە 100-دەن اسا كاسىپكەر ءوز تاۋارىن ۇسىنادى. جارمەڭكەدە 90 توننا ەت جانە ەت ونىمدەرى, 300 توننا كارتوپ, 140 توننا كوكونىس جانە 150 توننادان استام اۋىل شارۋاشىلىق ونىمدەرى ساتىلادى.
جامبىل وبلىسى ونەرپازدارى بەيبىتشىلىك جانە كەلىسىم سارايىندا كوپشىلىك نازارىنا «ۇلى دالا ۇلىسىم» اتتى كونتسەرتتىك باعدارلاماسىن ۇسىنادى. سونداي-اق, «جاستار» تەاترىندا وبلىستىق قازاق دراما تەاترىنىڭ م.اۋەزوۆتىڭ پوۆەسىنىڭ جەلىسى بويىنشا ن.ءورازاليننىڭ «قيلى زامان» تاريحي دراماسى, ال ەرتەسىنە «ەڭلىك-كەبەك» تراگەدياسى قويىلادى.
