پرومىشلەننىي كەنتىنىڭ تۇرعىندارىنا قىزمەت كورسەتەتىن «نيەت» وتباسىلىق دەنساۋلىق ورتالىعى №2 قالالىق بالالار اۋرۋحاناسىنا كوشىپ, جاڭا عيماراتتا قونىس تويىن اتاپ ءوتتى.
وسىعان بايلانىستى «نيەتتىكتەردى» قۇتتىقتاپ بارعان استانا قالاسى دەنساۋلىق ساقتاۋ باسقارماسىنىڭ باسشىسى ايگۇل سەگىزباەۆا بۇرىنعى عيمارات ءورت قاۋىپسىزدىگىن ساقتاۋ جانە سانيتاريا تالاپتارىنا ساي كەلمەگەنىن, جالپى اۋماعى 169 شارشى مەتر عانا بولعانىن, ال قازىرگىسى مىڭ شارشى مەترگە جەتەتىنىن, وسىندا ءبىر اۋىسىمدا 150 ادامدى قابىلداۋ مۇمكىندىگى بارىن, ەندى حالىققا العاشقى مەديتسينالىق-سانيتارلىق جاردەم كورسەتۋ ءۇشىن بارلىق جاعداي جاسالعانىن ايتتى.
«1999 جىلى اشىلعان ورتالىعىمىز وسى ۋاقىتقا دەيىن قۋىقتاي بولمەدە جۇمىس ىستەپ كەلدى» دەيدى مەكەمە ارداگەرى – ۋچاسكەلىك مەدبيكە سۇڭقار ءجۇنىسوۆا. ونىڭ ايتۋىنشا, باستاپقىدا قارالاتىن ادامداردىڭ سانى 4 مىڭ 500 بولسا, وسى كۇنى ساياجايلار تۇرعىندارىن قوسقاندا 21 مىڭعا جەتكەن. دارىگەرلەردى ايتپاعاندا دەنىنە داۋا ىزدەپ كەلگەندەردىڭ تار جەردە بەرەكەسى كەتىپ, ءوز رەنىشتەرىن ءبىلدىرىپ كەتەتىن. «جاڭا عيماراتقا كوشكەنىمىزگە ءۇش كۇن بولدى. ءبىز دە, ەمدەلۋشىلەرىمىز دە قۋانىشتىمىز. ونى حالىقتىڭ ريزا پىكىرلەرىنەن ءبىلىپ وتىرمىز» دەيدى ول.
ونىڭ ءسوزىن دەنساۋلىعىن تەكسەرتىپ جۇرگەن ءابدىراش شالاباەۆ ەسىمدى ازامات تا راستادى. «دارىگەرلەرىمىزدىڭ بۇرىنعى قابىلدايتىن ورنى وتە تار بولاتىن. دالىزىندە ادام ءيىن تىرەسىپ, جۇرە المايتىن. قارالۋ ءۇشىن ۇزىن-سونار كەزەكتە تۇراتىنبىز. تازالىق جاعى دا كوڭىل كونشىتپەيتىن. ال, قازىرگى عيمارات – زاماناۋي تالاپتارعا ساي, كەڭ, جارىق, ادەمى, ءبىر سوزبەن ايتقاندا, ادامنىڭ كوڭىلىن سەرگىتەدى» دەيدى ول.
تاعى ءبىر اتاپ وتەتىن جاعداي, ورتالىقتىڭ جاڭا عيماراتقا كوشكەنى كوپتەگەن تۇيتكىلدى شەشتى. ەندى اناليز تاپسىرۋ جانە دارىگەر ماماننان كەڭەس الۋ ءۇشىن بالالاردى №6 ەمحاناعا اپارۋدىڭ قاجەتى جوق. ونىڭ ءبارى جاڭا عيماراتتا اتقارىلادى. ال, ەرەسەكتەرگە مۇنداي قىزمەتتى وسى مەكەمە ۇيىنە ءتيىپ تۇرعان №1 قالالىق اۋرۋحانا كورسەتەدى.
امانعالي شميتۇلى
