جاقىندا نۇر-سۇلتان قالاسى ءماسليحاتىندا قالادا تۇرعىن ۇيلەر جانە الەۋمەتتىك نىسانداردى جوبالاۋ مەن سالۋ ساپاسىنا ارنالعان وتىرىس وتەدى. سونىڭ قارساڭىندا ءماسليحات حاتشىسى ەرلان كاناليموۆ باستاعان دەپۋتاتتار ر.قوشقارباەۆ, ايناكول جانە №23-17 كوشەلەرىنىڭ قيىلىسىندا «ساتىپ الۋ قۇقىعىنسىز جالعا بەرىلەتىن تۇرعىن ءۇي» باعدارلاماسى بويىنشا سالىنعان تۇرعىن ءۇي كەشەنى تۇرعىندارىمەن كەزدەسىپ, ولاردىڭ ماسەلەلەرىن تىڭدادى. سونداي-اق مايقايىڭ مەن ا351 كوشەلەرى تۇسىندا بوي كوتەرگەن جاڭا №91 مەكتەپپەن تانىستى.
تۇرعىندار دەپۋتاتتارعا تۇرعىن ءۇي كەشەنىنىڭ اۋماعى ءالى اباتتاندىرىلماعانىن جانە كوگالداندىرىلماعانىن, سىرتقى ينجەنەرلىك جەلىلەر تەڭگەرىمگە بەرىلمەگەنىن ايتتى. «استاناەنەرگوسبىت», «استانا سۋ ارناسى» كاسىپورىندارىمەن ءالى كەلىسىمشارت جاساماعاندارىن جەتكىزدى. بۇعان قوسا, قوقىس كونتەينەرلەرىنە ارنالعان الاڭ جايلاستىرىلماعانىنا, قوزعالۋى قيىنداعان ازاماتتارعا ارنالعان ليفت ىستەيمەيتىنىنە شاعىمداندى. قالالىق ءماسليحات حاتشىسى ەرلان كاناليموۆ مەردىگەرلەرگە اتالعان كەمشىلىكتەردى ەكى اپتا ىشىندە جويۋدى تاپسىردى.
ءبىر اتاپ وتەرلىگى, بۇل تۇرعىن ۇيگە ءۇش مەردىگەر بەكىتىلگەن. ءبىرىنشى ۇيىم – ءۇي سالۋعا, ەكىنشىسى – سىرتقى ينجەنەرلىك جەلىلەردى تارتۋعا, ال ءۇشىنشىسى اباتتاندىرۋعا جاۋاپتى بولعان.
– مەردىگەرلەردىڭ جۇمىسى ءبىر-بىرىنە تاۋەلدى بولعانىنا قاراماستان, اقىلداسىپ, كەڭەسىپ جۇمىس ىستەۋ دەگەن جوق. سوندىقتان تۇپكىلىكتى ناتيجەدە ءارتۇرلى ماسەلەلەر تۋىندايدى. وسىعان بايلانىستى ەندى مۇنداي جوبالاردى ءبىر مەردىگەردىڭ قولىنا بەرۋ تۋرالى ۇسىنىس ايتىلدى. بۇل مەردىگەردىڭ جاۋاپكەرشىلىگىن ارتتىرىپ, بارلىق قۇرىلىس-مونتاج جۇمىستارىنىڭ ساپاسىنا وڭ اسەرىن تيگىزەر ەدى, – دەدى قالالىق ءماسليحات دەپۋتاتى تالعات قوجاحمەتوۆ.
ال 1200 ورىنعا شاقتالعان جاڭا مەكتەپتى بۇگىندە زامانعا ساي جابدىقتارمەن جابدىقتاۋ ماسەلەسىن شەشۋ قاجەت. ەرلان كاناليموۆ قالالىق ءبىلىم باسقارماسىنا بيۋدجەتتىك ءوتىنىم دايىنداۋدى تاپسىردى. جاڭا ورتا ءبىلىم بەرۋ نىسانىنىڭ وقۋ بولمەلەرى كەڭ, سپورتزالى, اسحاناسى, ءماجىلىس زالى ءتيىستى تالاپقا ساي.
