كەشە پرەمەر-مينيستر اسقار مامين نۇر-سۇلتان قالاسىنىڭ اكىمى التاي كولگىنوۆپەن بىرگە ەلورداداعى №1 يندۋستريالدى پارك اۋماعىندا سالىنىپ جاتقان ModeX ءمودۋلدى ءۇي قۇرىلىسى زاۋىتىنا بارىپ, ءوندىرىس وشاعىن ىسكە قوستى.
ءمودۋلدى ءۇي قۇرىلىسى گەرمانيا, سينگاپۋر, قىتاي جانە باسقا دا ەلدەردە قولدانىلاتىن زاماناۋي وزىق تەحنولوگيا. بۇل تەحنولوگيا تۇرعىن ءۇيدىڭ وزىندىك قۇنى مەن سالىنۋ ۋاقىتىن ءتيىمدى ازايتۋعا مۇمكىندىك بەرىپ, باسپانانى قازاقستاندىقتارعا قولجەتىمدى ەتەدى. ماسەلەن, تازا ارلەنگەن 16 قاباتتى, ءبىر كىرەبەرىستەن تۇراتىن تۇرعىن ءۇي ادەتتە 12-18 اي سالىناتىن بولسا, بۇل تەحنولوگيامەن نەبارى 4 ايدىڭ ىشىندە سالىپ شىعۋعا بولادى. مۇنداي ناتيجەگە مودۋلدىك بلوكتاردىڭ – تازا ارلەنگەن دايىن بولمەلەردىڭ ارقاسىندا قول جەتكىزۋگە بولادى. ياعني ولار قۇرامالى بولشەكتەر ءتارىزدى ءبىرتۇتاس بولىپ جيناقتالادى.
«قۇرىلىس سەكتورى – قازاقستان ەكونوميكاسىنىڭ ەڭ سەرپىندى دامىپ كەلە جاتقان سالاسى. ونىڭ ءوسىمى 11,5 پايىزدى قۇرايدى. بۇل جوبا ەل حالقى ءۇشىن تۇرعىن ءۇيدىڭ قولجەتىمدىلىگىن ارتتىرىپ قانا قويماي, قۇرىلىس يندۋسترياسىنىڭ دامۋىنا قارقىن بەرۋگە مۇمكىندىك تۋدىرادى» دەدى پرەمەر-مينيستر.
جوبانى BI Group حولدينگ جۇزەگە اسىرىپ جاتىر. زاۋىت 700-دەن استام جۇمىس ورنىن قۇرىپ, جىلىنا 405 مىڭ شارشى مەتر تۇرعىن ءۇي سالۋعا قاۋقارلى. زاۋىتتىڭ ءبىرىنشى كەزەگىن وسى جىلدىڭ 1 جەلتوقسانىنا دەيىن, ال ەكىنشى كەزەگىن – 2020 جىلى, ءۇشىنشى كەزەگىن 2021 جىلى پايدالانۋعا بەرۋ جوسپارلانعان.
نىساندى ارالاۋ كەزىندە ۇكىمەت باسشىسى كەرامزيت بەتون مەن تەمىر بەتون بۇيىمداردان جاسالعان ءمودۋلدى بلوك-بولمەلەردى ءوندىرۋ تەحنولوگياسىمەن, سونىڭ ىشىندە ينتەللەكتۋالدى تۇرعىن ءۇيدىڭ 100-گە جۋىق فۋنكتسياسىن قامتيتىن «اقىلدى ءۇي» وپتسياسىمەن تانىستى.
