باس قالادا اۋىلشارۋاشىلىق جارمەڭكەلەرىنىڭ كۇزگى ماۋسىمى باستالدى. العاشقى بولىپ استاناعا تۇركىستان وبلىسى كەلدى.
«حان-شاتىر» جانىنداعى الاڭدا وتكەن جارمەڭكەگە اتالعان ايماقتان ەلورداعا 250 توننادان استام ءونىم اكەلىنىپ, 60-قا جۋىق تاۋار وندىرۋشىلەر ءوز ونىمدەرىن ۇسىندى.
جارمەڭكەگە نۇر-سۇلتان قالاسىنىڭ اكىمى التاي كولگىنوۆ پەن تۇركىستان وبلىسىنىڭ اكىمى ومىرزاق شوكەەۆ ادەيىلەپ ات باسىن بۇرىپ, ارالادى.
الاڭداعى ءاربىر ءونىم ءۇشىن جەكە سەكتسيالار بولىنگەن. ماسەلەن, جەمىس-جيدەكتەردىڭ باعالارى ارزان. جارمەڭكەگە كەلگەن جۇرتشىلىق كوكونىستەر مەن ەت جانە ءسۇت ونىمدەرىن ساتىپ الىپ جاتتى. ايتقانداي, ەت پەن ءسۇت ءبۇلىنىپ كەتپەۋ ءۇشىن توڭازىتقىش قويىلعان. سونداي-اق كەلۋشىلەر ءىرى دۇكەندەردەگىدەي ازىق-تۇلىك اربالارىن قولدانادى. سونىمەن بىرگە جارمەڭكەدە بالالارعا ارنالعان مەكتەپ فورماسى مەن وتاندىق جيھازدار دا ساۋداعا شىعارىلدى.
جارمەڭكەگە كەلگەن اعايىندار تەك ساۋدا جاساپ قانا قويماي, كيەلى تۇركىستاندىقتاردىڭ ونەرىن تاماشالاپ, قىزىق-قۋانىشقا كەنەلدى.
جىلداعىداي داستۇرگە اينالعان اۋىلشارۋاشىلىق جارمەڭكەسى 27 قازانعا دەيىن جالعاسادى.
