قۇتتى وردانىڭ قۇرداسى

باس شاھاردىڭ باستى باسىلىمى سانالاتىن «استانا اقشامى» گازەتىندە قىزمەت اتقارا ءجۇرىپ, تاعدىرى قىزىق ءتۇرلى ادامدارمەن, تالاي تانىمال تۇلعالارمەن تانىسىپ-تىلدەسۋدىڭ, كەيبىرىمەن دوستاسىپ, تۋىسقانداي ارالاسىپ كەتۋدىڭ ءساتى تۇسكەنى انىق. سولاردىڭ ءبىرى – ەلوردالىق شىنىبەكوۆتەر وتباسى.

شامكەن اقساقالدىڭ شاتتىعى شالقىعان شاڭىراعىندا دۇنيەگە كەلگەن شەكەسى تورسىقتاي ەر بالا مىنا ءومىردىڭ ەسىگىن ىڭگالاپ اشقان ساتتەن باستاپ ءبىزدىڭ باسىلىمنىڭ سۇيىكتى كەيىپكەرلەرىنىڭ بىرىنە اينالدى. سەبەبى, ول قۇتتى وردا ءۇشىن ەرەكشە ەستە قالار قۋانىشتى كەزەڭدە, سارىارقانىڭ ءدال كىندىگىنە الىپ شاھاردىڭ قازىعى قاعىلعان كۇنى, ناقتىراق ايتساق, استانانىڭ رەسمي تۇساۋكەسەرىندە, ياعني 1998 جىلعى 10 ماۋسىمدا دۇنيەگە كەلگەن بولاتىن. بۇل جونىندە «استانا اقشامى» گازەتىنىڭ سول جىلعى 17 ماۋسىمداعى №20 (484) سانىندا, ءبىرىنشى بەتتىڭ جوعارعى جاعىنان «استانا قويدىق اتىڭدى» دەگەن ماقالا سۋرەتىمەن جارىق كورگەن ەدى.
كوپ ۇزاماي شاڭىراقتىڭ ۇلكەندەرى اقىلداسا كەلە, باس قالانىڭ قۇرداسىنا نۇر-استان دەپ ات قويىپ, دۇرىلدەتىپ توي جاسايدى. اراعا جىل سالىپ تۇساۋى كەسىلگەن سول ءسابيدىڭ ءتاي-ءتاي باسقان العاشقى قادامىنان باستاپ بىلدىرلاپ سويلەگەنىن, مەكتەپكە بارعانىن, قىسقاسى, اسەم شاھارمەن بىرگە ەسەيىپ, الاڭسىز ءوسىپ جاتقانى جونىندە گازەت بەتىندە ءجيى-ءجيى جازىپ تۇردىق.
ەندى, مىنە, باسىلىمنىڭ شيرەك عاسىرلىق مەرەيتويى قارساڭىندا سول باياعى ءبۇلدىرشىننىڭ تاعدىرىنان تاعى دا سىرت اينالىپ كەتە المادىق. كوزى قاراقتى وقىرماندى «كونە» كەيىپكەرىمنىڭ قازىر قايدا جۇرگەنىنەن, قانداي ازامات بولىپ ەر جەتكەنى مەن نەنى ارمانداپ, نەگە قول جەتكىزگىسى كەلەتىنىنەن حاباردار ەتۋ نيەتىمەن بولات پەن اراي شىنىبەكوۆتەردىڭ ەسىگىن قاقتىق…
قارسى الدىمنان شىققان ورتا بويلى, بيداي وڭدەس بالانى بىردەن تانىدىم. كۇنى كەشە عانا مەكتەپ تابالدىرىعىن اتتاعان تويىنا كۋا بولىپ ەدىك, كوزدى اشىپ-جۇمعانشا ات جالىن تارتىپ مىنەر جاسقا جەتىپ قالىپتى. قايران, ۋاقىت!
كىشكەنتايىنان كوپشىلىكتىڭ اراسىندا, جاقىن-جۋىق, تۋىستىڭ عانا ەمەس, ءدۇيىم جۇرتتىڭ ىقىلاسىنا بولەنىپ وسكەندىكتەن بە ەكەن, كوپتەن كورمەسە دە, ءبىزدى ەش جاتسىنبادى. جىلى شىراي تانىتىپ, تورگە شىعۋىمىزدى ءوتىندى. كەيىپكەرىمدى سۇراقتىڭ استىنا الدىم. ول بولسا ءار ءسوزىن بايىپپەن تۇيىندەپ, توسىلماي جاۋاپ بەرىپ جاتىر.
– استانانى جانىمداي جاقسى كورەمىن. ول – مەن ءۇشىن ەڭ سۇيىكتى, الەمدەگى ەڭ ادەمى قالا,- دەپ باستادى ول اڭگىمەسىن. – ءالى ەسىمدە, كىشكەنتاي كەزىمنىڭ وزىندە اتا-اناممەن بىرگە الماتىعا نە تالدىقورعانعا بارساق, ۇيگە قايتقانشا تىنىشسىزداناتىنمىن. سول ادەتىمنەن كۇنى بۇگىنگە دەيىن ارىلا الماي كەلەمىن. سىرتقا شىقسام, استانانى ساعىنامىن. بۇل مەنىڭ تۋعان قالاما دەگەن شەكسىز سۇيىسپەنشىلىگىمنەن بولسا كەرەك. اجارلى استانانىڭ كورىكتى جەرلەرىن ارالاعاندى, اسىرەسە ەسىلدىڭ سول جاعالاۋىنداعى جاڭا قالادا قىدىرعاندى ۇناتامىن. تىنباي, تالماي وقۋ ارقىلى ۇلكەن جەتىستىكتەرگە جەتىپ, باس قالا سەكىلدى مەن دە از عانا ۋاقىتتىڭ ىشىندە بيىك بەلەستەردى باعىندىرعىم كەلەدى.
ەرەكشە كۇندە دۇنيەگە كەلگەن نۇر-استاننىڭ اڭگىمەسىنەن ونىڭ بويىمەن بىرگە ويىنىڭ دا ءوسىپ, جىگىت بولىپ قالعانىن اڭعاردىم.
بۇگىندە استاناداعى № 57 ورتا مەكتەپتىڭ 11 «ءا» سىنىبىنا كوشكەن نۇر-استان ەلىمىزدىڭ ماڭگىلىك بەيبىتشىلىكتە, بىرلىكتە ءومىر سۇرگەنىن, بولاشاقتا ءبىزدىڭ ەلدى كۇردەلى ماماندىقتاردى مەڭگەرگەن ءبىلىمدى ازاماتتاردىڭ باسقارعانىن, ەل يگىلىگى جولىندا ءوزى دە ايانباي ەڭبەك ەتىپ, تەر توگۋدى قالايتىنىن, ال كەلەشەگىن ەلوردانىڭ ەرتەڭىمەن بايلانىستىراتىنىن, قارقىنداپ دامىپ كەلە جاتقان تاۋەلسىز قازاقستاننىڭ كەمەلدەنگەنىن كوزىمەن كورگىسى كەلەتىنىن, سوعان ءوزى تيتتەي دە بولسا ۇلەس قوسقىسى كەلەتىنىن, ول ءۇشىن مىقتى بىلىممەن قارۋلانۋى كەرەكتىگىن جاقسى سەزىنەتىنىن جەتكىزدى. قابانباي اتامىزدىڭ «بىلەككە سەنگەن زاماندا ەشكىمگە ەسە بەرمەدىك, بىلىمگە سەنگەن زاماندا قاپى قالىپ جۇرمەيىك!» دەگەن سوزدەرىن ەسكەرە وتىرىپ, بابالارىمىزدىڭ اماناتىن اقتاۋعا ۇمتىلادى. ءبىلىمى ارقىلى باسقا ەلدەرمەن باسەكەگە تۇسە الاتىنداي قابىلەتتى, ءبىلىمدى بولۋعا كۇش سالىپ كەلەدى.
اكەسى بولات ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە, اناسى اراي قازاق ۇلتتىق مۋزىكا اكادەمياسىندا ءدارىس بەرەدى. سوڭىنان ەرگەن باۋىرلارى جاڭعاس, سۇلتان, دارىن دا اعالارىن ماقتان تۇتادى. «كەز كەلگەننىڭ ماڭدايىنا بۇيىرا بەرمەيتىن ەرەكشە تاعدىر سىيىنا قۇرمەتپەن قاراسا ەكەن دەگەن نيەتپەن نۇر-استاننىڭ اقىلدى, ادەپتى, ءبىلىمدى ازامات بولىپ وسۋىنە اناسى ەكەۋىمىز قولىمىزدان كەلگەنشە تەر توگىپ كەلەمىز. ول ءبىزدىڭ عانا ەمەس, ەلدىڭ بالاسى بولادى دەگەن ۇمىتتەمىز جانە سول ءۇمىتىمىزدى اقتايدى دەپ سەنەمىز» دەيدى بولات شامكەنۇلى.
نۇر-استان بولسا, دامىلسىز دامۋ ۇستىندەگى اسەم شاھارمەن ءبىر كۇندە تۋعانىنا, كوز ىلەسپەس قارقىنمەن سالىنىپ جاتقان سۇلۋ استانامەن بىرگە ءوسىپ, بىرگە ەسەيىپ كەلە جاتقانىنا قۋانادى. قۋانىشى ۇزاعىنان بولعاي!
قۇتتى وردانىڭ قۇرداسىنان ەلىنىڭ دە كۇتەرى مول. تەك, ءتىل-كوزدەن امان بولعاي!

گۇلبارشىن وكەشقىزى